1 Cia li mloog, auj nej cov txwj laug ntawm kuv lub koom txoos, thiab cuab pob ntseg rau kuv txoj lus, thiab kawm ntawm kuv txog kuv lub siab nyiam rau nej, thiab ntsig txog thaj av no uas kuv tau xa nej mus rau thiab.

2 Vim kuv hais tseeb rau nej tias, tus uas ua raws li kuv tej lus txib tau koob hmoov, txawm yog tseem ciaj los sis tuag; thiab tus uas rau siab ntseeg thaum raug kev txom nyem, tus ntawd yuav tau nqi zog tseem ceeb dua nyob saum lub nceeg vaj ceeb tsheej.

3 Nej pom tsis tau nej tus Vajtswv lub tswv yim nrog nej lub qhov muag ntawm sab nqaij daim tawv, thaum lub sij hawm no, ntsig txog tej yam uas yuav muaj los tom qab no mus, thiab lub yeeb koob uas yuav muaj tom qab dhau tej kev txom nyem ntau.

4 Vim tom qab dhau tej kev txom nyem ntau ces tej koob hmoov yuav los. Yog li ntawd lub sij hawm yuav los uas yuav muab yeeb koob ntau rau nej ntoo, lub sij hawm tsis tau txog, tiam sis twb yuav txog lawm.

5 Nco ntsoov qhov no, qhov uas kuv qhia nej ua ntej, kom nej yuav khaws cia rau nruab siab, thiab txais tej uas yuav muaj tom qab tej no.

6 Saib seb, kuv hais tseeb rau nej tias, vim tej no kuv thiaj tau xa nej mus—xwv kom nej yuav mloog lus, thiab xwv kom nej npaj nej lub siab los mus ua tim khawv txog tej yam uas tseem yuav los;

7 Thiab xwv kom tus Tswv qhuas nej rau txoj kev teeb lub hauv paus, thiab ua tim khawv txog thaj av uas Vajtswv lub nroog Xi-oos yuav nyob.

8 Thiab yuav npaj muaj ib rooj noj rooj haus muaj tej khoom noj zoo los rau cov pluag, muaj tseeb tiag, ib rooj noj rooj haus muaj tej khoom noj zoo, muaj tej cawv txiv hmab ntshiab huv, xwv kom ntiaj teb yuav paub tias yeej yuav muaj raws li cov yaj saub hais;

9 Muaj tseeb tiag, ib rooj mov loj hauv tus Tswv lub tsev uas tau npaj zoo, uas yuav caw tag nrho txhua haiv neeg mus koom.

10 Ua ntej tshaj plaws, cov nplua nuj thiab cov kawm txawj, cov muaj tswv yim thiab cov ua nom ua tswv;

11 Thiab tom qab ntawd hnub ntawm kuv lub hwj chim yuav los, thaum ntawd cov pluag, cov ceg tawv, thiab cov dig muag, thiab cov lag ntseg yuav los mus koom tus Me Nyuam Yaj rooj tshoob, thiab noj tus Tswv rooj mov, uas tau npaj rau hnub tseem ceeb uas yuav los.

12 Saib seb, kuv tus Tswv, tau hais li ntawd.

13 Thiab xwv kom zaj lus tim khawv yuav tawm hauv Xi-oos mus, muaj tseeb tiag, los ntawm lub qhov ncauj ntawm lub nroog uas muaj Vajtswv tej teej tug—

14 Muaj tseeb tiag, vim qhov no kuv thiaj tau xa nej los ntawm no, thiab tau xaiv kuv tus tub qhe Edward Partridge, thiab tau tsa nws los ua nws ntiag tug hauj lwm rau hauv thaj av no.

15 Tiam sis yog nws tsis hloov siab lees txim rau nws tej kev txhaum, xws li nws tsis ntseeg thiab nws tsis thoob tsib to nrog, ces hais kom nws cia li mloog lus tsam nws ntog.

16 Saib seb twb muab nws ntiag tug hauj lwm rau nws, thiab yuav tsis rov qab muab dua.

17 Thiab tus uas ua ntiag tug hauj lwm no ces tus Tswv tsa nws los ua ib tug txiav txim hauv Ixayees, zoo tib yam li yav puag thaum ub, los mus faib tej av uas yog Vajtswv teej tug rau nws cov me nyuam;

18 Thiab txiav txim rau nws cov neeg los ntawm cov neeg ncaj ncees zaj lus tim khawv, thiab los ntawm nws ob tug pab cuam txoj kev pab, raws li lub nceeg vaj tej kev cai uas yog Vajtswv cov yaj saub muab.

19 Vim kuv hais tseeb rau nej tias, yuav tsum ua raws li kuv txoj kev cai nyob rau hauv thaj av no.

20 Txhob cia kom muaj neeg xav tias nws yog tus kav, tiam sis cia Vajtswv kav tus uas txiav txim, raws li tej lus ntuas ntawm nws lub siab nyiam, los yog hais tias, tus uas ntuas lwm tus los yog tus uas zaum saum lub rooj txiav txim.

21 Txhob cia neeg ua txhaum tej kev cai ntawm thaj av, vim tus uas ua raws li Vajtswv tej kev cai tsis tas ua txhaum tej kev cai ntawm thaj av.

22 Yog li ntawd, cia li mloog tej nom tswv uas nej muaj tej lus, kom txog thaum tus uas muaj txoj cai kav los kav, thiab muab tag nrho cov yeeb ncuab tsuj kiag rau hauv nws qab xib taws tso.

23 Saib seb, tej kev cai uas nej tau txais los ntawm kuv txhais tes yog tej kev cai ntawm lub koom txoos, thiab nyob hauv txoj kev kaj no nej yuav tau tuav rawv tej kev cai no mus lawm yav tom ntej. Saib seb, qhov no yog laj lim tswv yim.

24 Thiab nim no, ib yam li kuv tau hais txog kuv tus tub qhe Edward Partridge, thaj av no yog thaj av nws yuav nyob, thiab rau cov uas nws tau tsa los ua nws ob tug pab cuam; thiab kuj yog thaj av rau tus uas kuv tau tsa los tswj kuv lub tsev rau khoom;

25 Yog li ntawd, cia lawv coj lawv tej tsev neeg los rau thaj av no, raws li lawv sib sab laj nrog lawv tus kheej thiab nrog kuv.

26 Vim saib seb, tsis tsim nyog kom kuv yuav tsum txib txhua yam; vim tus uas raug yuam mus ua txhua yam, tus ntawd yog tus tub qhe tub nkeeg thiab tsis muaj tswv yim; yog li ntawd nws yuav tsis tau txais nqi zog.

27 Kuv hais tseeb tias, neeg yuav tsum mob siab ua tej yam zoo, thiab ua ntau yam los ntawm lawv tus kheej txoj kev ywj siab xaiv, thiab coj kom muaj kev ncaj ncees ntau los;

28 Vim lawv twb muaj lub hwj chim, uas lawv xaiv ywj siab rau lawv tus kheej. Thiab npaum li uas neeg ua qhov zoo ces lawv yeej yuav tsis poob lawv nqi zog.

29 Tiam sis tus uas tsis ua ib yam dab tsi li kom txog thaum tus Tswv txib nws tso, thiab txais ib lo lus txib nrog lub siab uas ua xyem xyav, thiab tub nkeeg ua raws li lo lus txib ntawd, tus ntawd yuav raug txim.

30 Tus Tswv hais tias, kuv yog leej twg, tus uas tau tsim neeg, uas yuav tsis phua txim rau tus uas tsis ua raws li kuv cov lus txib?

31 Tus Tswv hais tias, kuv yog leej twg, uas tsis ua kom muaj raws li kuv tau cog lus tseg?

32 Kuv txib tiam sis neeg tsis mloog lus; kuv thim ces lawv tsis tau txoj koob hmoov.

33 Ces lawv hais hauv lawv lub siab tias: Qhov no twb tsis yog tus Tswv txoj hauj lwm, vim twb tsis muaj raws li nws tej kev cog lus. Tiam sis kev txom nyem raug cov zoo li no, vim lawv nqi zog nyob sab hauv nkaum rawv tos, thiab tsis yog los saum ntuj los.

34 Thiab nim no kuv muab lus qhia ntxiv rau nej ntsig txog thaj av no.

35 Yog kuv lub tswv yim uas kuv tus tub qhe Martin Harris yuav tau ua tus yam ntxwv rau cov ntseeg ntawm kev muab nws cov nyiaj txiag mus rau tus npisov ntawm lub koom txoos.

36 Thiab qhov no kuj yog ib txoj kev cai rau txhua tus neeg uas los rau thaj av no los txais ib qho qub txeeg qub teg; thiab nws yuav tsum siv nws tej nyiaj txiag raws li txoj kev cai qhia.

37 Thiab kuj yog tswv yim hais tias yuav tau muas tej av hauv Independence, rau qhov chaw ua lub tsev rau khoom, kuj rau lub tsev luam ntawv thiab.

38 Thiab yuav muab lwm cov lus qhia txog kuv tus tub qhe Martin Harris rau nws los ntawm tus Ntsuj Plig, xwv kom nws yuav tau txais nws qhov qub txeeg qub teg uas nws pom tias zoo rau nws.

39 Thiab cia nws hloov siab lees txim rau nws tej kev txhaum, vim nws tab tom nrhiav txoj kev qhuas los ntawm neeg ntiaj teb.

40 Thiab kuj cia kuv tus tub qhe William W. Phelps ua lub luag hauj lwm uas kuv tau tsa nws los ua, thiab txais nws qhov qub txeeg qub teg nyob hauv thaj av;

41 Thiab nws kuj yuav tsum hloov siab lees txim, vim kuv, tus uas yog tus Tswv, tsis txaus siab rau nws, vim nws nrhiav hwj chim, thiab kuv pom tias nws tsis ua siab mos siab muag kom txaus.

42 Saib seb, tus uas tau hloov siab lees txim rau nws tej kev txhaum, ces twb zam txim rau tus ntawd, thiab kuv, tus uas yog tus Tswv, tsis nco qab txog tej ntawd ntxiv.

43 Zoo li no nej thiaj yuav paub yog tias ib tug neeg tau hloov siab lees txim rau nws tej kev txhaum—saib seb, nws yuav lees txhaum thiab tso tej kev txhaum ntawd tseg.

44 Thiab nim no, kuv hais tseeb ntsig txog cov txwj laug seem tshuav ntawm kuv lub koom txoos, lub sij hawm tsis tau los, tseem tshuav ntau xyoo, lawv mam txais tau lawv tej qub txeeg qub teg nyob hauv thaj av no, tsuas yog lawv xav tau los ntawm kev thov Vajtswv nrog txoj kev ntseeg, raws li tus Tswv yuav muab rau lawv nkaus xwb.

45 Vim saib seb, lawv yuav mus raws cov neeg nyob thoob plaws lub ntiaj teb los ua ke.

46 Yog li ntawd, sib txoos nej tus kheej tuaj ua ke, thiab cov uas tus Tswv tsis txib kom nyob hauv thaj av no, cia lawv mus tshaj tawm txoj moo zoo rau tej thaj tsam ib puag ncig; thiab tom qab ntawd cia lawv rov qab mus rau tom lawv tej vaj tsev.

47 Cia lawv tshaj tawm thaum lawv taug kev, thiab ua tim khawv txog qhov tseeb nyob rau hauv tag nrho txhua qhov chaw, thiab hu cov nplua nuj, cov siab thiab cov qis, thiab cov pluag kom hloov siab lees txim.

48 Thiab cia lawv txhim tsa tej pawg ntseeg, npaum li uas cov neeg hauv ntiaj teb no yuav hloov siab lees txim.

49 Thiab cia kom cov ntseeg lub suab tsa ib tug sawv cev, rau pawg ntseeg hauv Ohio, los mus sau tej nyiaj txiag los mus muas av hauv Xi-oos.

50 Thiab kuv muab ib lo lus txib rau kuv tus tub qhe Sidney Rigdon tias, nws yuav sau ib zaj lus piav txog thaj av Xi-oos, thiab ib zaj txog Vajtswv lub siab nyiam, raws li tus Ntsuj Plig yuav qhia rau nws paub;

51 Thiab sau ib tsab ntawv muaj chaw sau npe pom yeem muab nyiaj, kom coj mus qhia rau tag nrho tej pawg ntseeg mus sau nyiaj los, kom yuav coj mus rau tus npisov txhais tes, rau nws tus kheej los yog tus sawv cev txhais tes, raws li nws pom zoo los sis raws li nws yuav qhia, los mus muas av los ua ib qho qub txeeg qub teg rau Vajtswv cov me nyuam.

52 Vim, saib seb, kuv hais tseeb rau nej tias, tus Tswv xav kom cov thwj tim thiab noob neej qhib lawv lub siab lub ntsws, kom mus muas tag nrho thaj tsam teb chaws no, sai npaum li txog lub sij hawm uas lawv muas tau.

53 Saib seb, qhov no yog laj lim tswv yim. Cia lawv ua li no nyob tsam lawv tsis tau txais ib qho qub txeeg qub teg, tsuas yog los ntawm kev ua nqaij ntuag ntshav nrog.

54 Thiab ntxiv, npaum li uas tau av lawm, cia li xa txhua yam neeg ua hauj lwm mus rau thaj av no, mus ua hauj lwm rau Vajtswv haiv neeg ntseeg.

55 Cia ua txhua yam no raws txheej txheem; thiab kom tus npisov los yog tus sawv cev ntawm lub koom txoos ua kom neeg paub txog tej cai siv tej thaj av, tej lub sij hawm.

56 Thiab cia txoj hauj lwm sib sau tsis txhob maj maj, los yog nrawm nroos; tiam sis cia ua raws li cov txwj laug ntawm lub koom txoos yuav ntuas nyob hauv tej rooj sab laj, raws li txoj kev txawj ntse uas tej lub sij hawm lawv txais tau.

57 Thiab cia kuv tus tub qhe Sidney Rigdon muab thaj av no thiab qhov chaw yuav ua lub tuam tsev tshwj tseg thiab muab fij tseg rau tus Tswv.

58 Thiab cia li tsa ib lub rooj sab laj los sib ntsib; thiab tom qab ntawd cia kuv ob tug tub qhe Sidney Rigdon thiab Joseph Smith tus Hluas, rov qab mus, thiab kom Oliver Cowdery nrog nkawd thiab, mus ua tej hauj lwm seem tshuav uas kuv tau muab rau lawv ua nyob tom lawv tus kheej thaj av kom tiav, thiab tej seem tshuav uas yuav qhia txog los ntawm tej rooj sab laj.

59 Thiab tsis txhob cia ib tug neeg rov qab ntawm thaj av no mus tsuas yog nws ua pov thawj txog qhov uas nws paub tseeb thiab ntseeg tiag tiag thaum taug kev mus.

60 Cia li muab txoj hauj lwm uas tau muab rau Ziba Peterson rho tawm ntawm nws mus; thiab cia nws ua ib tug mej zeej nyob hauv lub koom txoos, thiab khwv nrog nws ob txhais tes, nrog cov kwv tij, kom txog thaum nws raug qhuab ntuas txaus nkaus rau tag nrho nws tej kev txhaum; vim nws tsis lees txhaum, thiab nws xav muab nws tej kev txhaum zais.

61 Cia cov txwj laug seem tshuav ntawm lub koom txoos no, cov uas tab tom los rau thaj av no, lawv ib txhia tau koob hmoov ntau tshaj qhov uas ntsuas tau, thiab tsa ib lub rooj sab laj rau ntawm thaj av no.

62 Thiab cia kuv tus tub qhe Edward Partridge coj lub rooj sab laj uas lawv yuav tsa.

63 Thiab cia lawv rov qab los, tshaj tawm txoj moo zoo thaum taug kev los, ua tim khawv rau tej yam uas tau muab ua tshwm sim los rau lawv.

64 Vim, tseeb tiag, lub suab yuav tsum tawm ntawm qhov chaw no mus rau tag nrho neeg ntiaj teb, thiab mus rau tej chaw deb tshaj plaws hauv lub ntiaj teb—yuav tsum tshaj tawm txoj moo zoo rau txhua tus neeg, muaj tej cim los rau cov uas ntseeg.

65 Thiab saib seb, Neeg Leej Tub twb yuav los. Amees.