Tshooj 51
Kev tshwm sim uas tus Yaj Saub Joseph Smith tau txais, hauv Thompson, Ohio, lub Tsib Hlis Ntuj hnub tim 20, xyoo 1831. Lub sij hawm no Haiv Neeg Ntseeg uas tsiv tim tej xeev sab hnub tuaj los tau pib los txog rau hauv Ohio, thiab lawv yuav tsum nrhiav chaw los nyob. Vim txoj hauj lwm no yeej yog tus npisov lub luag hauj lwm, Npisov Edward Partridge thiaj xav paub txog qhov ntawd, thiab tus Yaj Saub nug tus Tswv.
1–8, Tus Tswv tsa Edward Partridge los kav tej hauj lwm saib xyuas thiab tej teej tug; 9–12, Haiv Neeg Ntseeg yuav tsum coj ncaj ncees thiab tau teej tug sib npaug; 13–15, Lawv yuav tsum tsim kom muaj npisov lub tsev rau khoom thiab muab tej teej tug khaws cia kom raws li tus Tswv txoj kev cai; 16–20, Ohio yuav yog qhov chaw sib sau nyob ib ntus.
1 Tus Tswv nej tus Vajtswv hais tias, Cia li mloog, thiab kuv yuav hais lus rau kuv tus tub qhe Edward Partridge, thiab muab tej kev coj qhia rau nws; vim nws yeej yuav tsum tau txais kev coj qhia es thiaj paub muab cov neeg no faib li cas.
2 Vim yeej yuav tsum muab lawv faib raws li kuv tej kev cai; yog tsis li ces lawv yuav raug muab txiav tawm mus.
3 Yog li ntawd, cia kuv tus tub qhe Edward Partridge, thiab cov uas nws tau xaiv, cov uas ua rau kuv txaus siab, muab cov neeg no tej feem xyuam faib rau lawv, rau txhua tus kom sib npaug raws li nws tsev neeg, raws li qhov uas haum nws tej xwm txheej thiab tej nws xav tau thiab tej nws yuav tsum muaj.
4 Thiab cia kuv tus tub qhe Edward Partridge, thaum nws faib ib tug neeg qhov feem xyuam rau nws, sau ib daim ntawv lav nws qhov feem xyuam thiab muab rau nws, kom nws tuav cia, twb yog txoj cai no thiab qhov qub txeeg qub teg no uas nyob hauv lub koom txoos, kom txog thaum nws tau ua txhaum thiab raug cov ntseeg tawm suab hais tias tsis tsim nyog nws zwm rau lub koom txoos lawm tso, raws li tej kev cai thiab tej kev khi lus ntawm lub koom txoos.
5 Thiab yog hais tias nws ho ua txhaum thiab raug suav hais tias tsis tsim nyog zwm rau lub koom txoos, nws yuav tsis muaj hwj chim mus aws qhov feem xyuam uas nws tau muab fij tseg rau tus npisov coj mus pab cov pluag thiab cov txom nyem ntawm kuv lub koom txoos; yog li ntawd, nws yuav tsis tau lub txiaj ntsim ntawd rov qab, tiam sis tsuas aws tau qhov feem xyuam uas tau muab zwm npe rau nws lawm xwb.
6 Thiab yuav tsum ua txhua yam kom ruaj khov zoo li no, raws li tej kev cai ntawm thaj av.
7 Thiab muab qhov uas yog cov neeg no li rau cov neeg no.
8 Thiab cov nyiaj uas seem rau cov neeg no—cia li tsa ib tug neeg sawv cev rau cov neeg no, mus khaws cov nyiaj coj mus nrhiav khoom noj thiab khaub ncaws, raws li tej kev xav tau ntawm cov neeg no.
9 Thiab cia kom txhua tus neeg coj ncaj ncees, thiab coj sib xws nyob hauv cov neeg no, thiab tau teej tug sib npaug, kom nej koom ib lub siab, ib yam li kuv tau txib nej.
10 Thiab tsis txhob muab tej uas yog cov neeg no li coj mus thiab pub rau lwm pawg ntseeg.
11 Yog li ntawd, yog hais tias lwm pawg ntseeg xav txais nyiaj ntawm pawg ntseeg no, cia lawv rov qab them rau pawg ntseeg no raws li lawv yuav sib pom zoo;
12 Thiab qhov no yuav tsum ua los ntawm tus npisov los yog tus sawv cev, uas yuav tsa los ntawm cov ntseeg lub suab los.
13 Thiab ntxiv, cia kom tus npisov txhim tsa ib lub tsev rau khoom rau pawg ntseeg no; thiab cia txhua yam tag nrho tej nyiaj txiag thiab tej nqaij, tej uas ntau tshaj cov neeg no muaj chaw siv, kom muab ceev rau ntawm tus npisov tes.
14 Thiab kuj cia nws tshwj tseg rau nws tus kheej tej uas nws muaj chaw siv thiab, thiab rau tej uas nws tsev neeg muaj chaw siv, thaum nws ua dej num ntawm txoj hauj lwm no.
15 Thiab kuv muab lub cib fim rau cov neeg no los tsim kho lawv tus kheej zoo li no kom raws li kuv tej kev cai.
16 Thiab kuv muab thaj av no fij rau lawv ib nyuag ntus, kom txog thaum kuv, tus uas yog tus Tswv, yuav nrhiav dua lwm qhov chaw rau lawv, thiab txib lawv kom mus rau qhov ntawd;
17 Thiab teev twg thiab hnub twg los tsis qhia rau lawv, yog li ntawd cia lawv nyob hauv thaj av no yam li nyob ob peb xyoos, thiab qhov no yuav tig los ua qhov zoo rau lawv.
18 Saib seb, qhov no yuav ua ib tug yam ntxwv rau kuv tus tub qhe Edward Partridge, nyob lwm qhov chaw, hauv txhua pawg ntseeg.
19 Thiab tus uas yog ib tug saib xyuas rau siab ntseeg, ncaj ncees, thiab muaj tswv yim ces tus ntawd yuav tau txais tus Tswv txoj kev xyiv fab, thiab yuav tau txais txoj sia nyob mus ib txhis ua nws tug.
20 Kuv hais tseeb rau nej tias, kuv yog Yexus Khetos, tus uas yuav los sai sai, nyob rau lub sij hawm nej xav tsis txog. Twb yog li ntawd. Amees.