Tshooj 31
Kev tshwm sim uas tus Yaj Saub Joseph Smith tau txais kom qhia Thomas B. Marsh, lub Cuaj Hlis Ntuj xyoo 1830. Zaum no yog tom qab kiag ntawm lub rooj sab laj ntawm lub Koom Txoos (saib cov lus piav lub ntsiab ntawm tshooj 30). Thomas B. Marsh tau ua kev cai raus dej ntxov zog ntawm lub hlis los lawm thiab tau tsa nws ua ib tug txwj laug nyob hauv lub Koom Txoos ua ntej muab txoj kev tshwm sim no los.
1–6, Tus Tswv hu Thomas B. Marsh mus tshaj tawm txoj moo zoo thiab nplij nws lub siab txog nws tsev neeg txoj kev noj qab nyob zoo; 7–13, Tus Tswv ntuas nws kom ua siab ntev, thov Vajtswv tas mus li, thiab coj raws li tus Nplij Siab.
1 Thomas, kuv tus tub, koj tau koob hmoov vim yog koj txoj kev ntseeg kuv txoj hauj lwm.
2 Saib seb, koj tau muaj kev txom nyem ntau vim yog koj tsev neeg; txawm li ntawd los, kuv yuav foom koob hmoov rau koj thiab koj tsev neeg, muaj tseeb tiag, koj cov me nyuam; thiab hnub ntawd yuav los thaum lawv yuav ntseeg thiab paub qhov tseeb thiab koom siab nrog koj nyob hauv kuv lub koom txoos.
3 Cia li zoo siab thiab xyiv fab, vim lub sij hawm rau koj ntiag tug hauj lwm twb los txog lawm; thiab koj tus nplaig yuav npliag, thiab koj yuav tshaj tej moo zoo siab ntawm txoj kev xyiv fab heev mus rau tiam neeg no.
4 Koj yuav tsum tshaj tawm tej yam uas tau muab tshwm sim los rau kuv tus tub qhe, Joseph Smith, tus Hluas. Koj yuav tsum pib tshaj tawm txij lub sij hawm no mus, muaj tseeb tiag, mus sau hauv thaj teb uas twb daj rhuv zoo muab hlawv lawm.
5 Yog li ntawd, cev koj rab liag nrog tag nrho koj lub siab, ces tus Tswv yuav zam txim rau koj tej kev txhaum lawm, thiab koj yuav tau tej teg nplej puv nkaus rau nraum koj nraub qaum, vim tus neeg khwv yeej tsim nyog tau nws nqi zog. Yog li ntawd, koj tsev neeg yuav muaj sia nyob.
6 Saib seb, kuv hais tseeb rau koj tias, tsuas ncaim lawv mus ib nyuag ntus xwb, thiab tshaj tawm kuv txoj lus, thiab kuv yuav npaj ib qho chaw nyob rau lawv.
7 Muaj tseeb tiag, kuv yuav qhib cov neeg lub siab, thiab lawv yuav txais koj. Thiab kuv yuav tsa ib pawg ntseeg los ntawm koj txhais tes;
8 Thiab koj yuav tsum txhawb lawv zog thiab npaj lawv rau lub sij hawm lawv yuav sib sau ua ke.
9 Ua siab ntev rau tej kev txom nyem, tsis txhob cem cov neeg uas cem. Tswj koj tsev neeg nrog siab mos siab muag, thiab nyob khov kho.
10 Saib seb, kuv hais rau koj tias koj yuav ua ib tug kws kho mob rau cov ntseeg, tiam sis tsis yog rau neeg ntiaj teb, vim lawv yuav tsis txais koj.
11 Koj cia li mus qhov twg uas kuv xav kom koj mus, thiab tus Nplij Siab yuav qhia rau koj tias koj yuav tsum ua dab tsi thiab yuav tsum mus qhov twg.
12 Thov Vajtswv tas mus li, tsam koj pib raug kev ntxias thiab poob koj nqi zog.
13 Rau siab ntseeg kom txog thaum kawg, thiab xyuas seb, kuv nrog koj. Cov lus no tsis yog los ntawm ib tug neeg los yog tib neeg los, tiam sis yog los ntawm kuv los, uas twb yog Yexus Khetos, koj tus Txhiv Dim, los ntawm Leej Txiv lub siab nyiam. Amees.