Tshooj 32
Kev tshwm sim uas tus Yaj Saub Joseph Smith tau txais kom qhia Parley P. Pratt thiab Ziba Peterson, nyob hauv Manchester, New York, thaum ntxov ntawm lub Kaum Hli Ntuj xyoo 1830. Cov txwj laug xav paub txog thiab xav pab cov Neeg Lamas, pab neeg uas cov Ntseeg tau kawm txog lawv cov koob hmoov nyob hauv Phau Ntawv Maumoos. Lawv thiaj tau thov kom tus Tswv qhia Nws lub siab xav saib lub sij hawm ntawd puas tsim nyog xa cov txwj laug mus rau tej pawg neeg Qhab nyob rau Sab Hnub Poob. Txoj kev tshwm sim no txawm los.
1–3, Tus Tswv hu Parley P. Pratt thiab Ziba Peterson mus tshaj tawm txoj moo zoo rau cov Neeg Lamas thiab mus ua Oliver Cowdery thiab Peter Whitmer tus Hluas, nkawd luag; 4–5, Lawv yuav tsum thov Vajtswv kom to taub cov vaj lug kub.
1 Thiab nim no hais txog kuv tus tub qhe Parley P. Pratt, saib seb, kuv hais rau nws tias ib yam li kuv muaj sia zees nyob kuv xav kom nws tshaj tawm kuv txoj moo zoo thiab kawm ntawm kuv, thiab muaj siab mos siab muag thiab txo siab txo ntsws.
2 Thiab qhov uas kuv tau muab rau nws yog kom nws mus nrog kuv ob tug tub qhe, Oliver Cowdery thiab Peter Whitmer, tus Hluas, mus tom cov Neeg Lamas hauv hav zoov.
3 Thiab Ziba Peterson yuav tsum mus nrog lawv thiab; thiab kuv tus kheej los yuav mus nrog lawv thiab nyob nrog nraim lawv; thiab kuv yog lawv tus sawv cev uas daws lawv zaj thov Leej Txiv, thiab yuav tsis muaj dab tsi kov yeej lawv.
4 Thiab lawv yuav tsum mloog tej uas tau muab sau cia, thiab txhob ua txuj muaj dua lwm txoj kev tshwm sim; thiab lawv yuav tsum thov Vajtswv tas mus li kom kuv thiaj yuav nthuav tej ntawd rau lawv to taub.
5 Thiab lawv yuav tsum ua raws li tej lus no thiab tsis txhob muab suav tsis muaj nqis, thiab kuv yuav foom koob hmoov rau lawv. Amees.