Tshooj 30
Kev tshwm sim uas tus Yaj Saub Joseph Smith tau txais kom qhia David Whitmer, Peter Whitmer tus Hluas, thiab John Whitmer, nyob hauv Fayette, New York, lub Cuaj Hlis Ntuj xyoo 1830, tom qab lub rooj sab laj uas sib ntsib tau peb hnub nyob hauv Fayette, tiam sis ua ntej thaum cov txwj laug ntawm lub Koom Txoos sib ncaim nyias mus nyias. Thaum xub thawj lub Koom Txoos muab cov lus no luam tawm ua peb zaj kev tshwm sim; tus Yaj Saub tau muab cov lus no los tso ua ke ua ib tshooj rau hauv phau Lus Qhuab Qhia thiab Kev Khi Lus uas luam tawm thaum xyoo 1835.
1–4, David Whitmer raug qhuab ntuas vim nws tsis rau siab ntso ua hauj lwm; 5–8, Peter Whitmer tus Hluas yuav tsum ua Oliver Cowdery luag mus tshaj tawm txoj moo zoo rau cov Neeg Lamas; 9–11, Tus Tswv hu John Whitmer mus tshaj tawm txoj moo zoo.
1 Saib seb, kuv hais rau koj, David tias, koj tau ntshai tib neeg thiab tsis tau vam khom kuv kom muaj zog li tsim nyog koj yuav tsum ua.
2 Tiam sis koj lub siab xav txog tej yam ntawm lub ntiaj teb ntau dua li xav txog tej uas los ntawm kuv, tus uas Tsim koj, thiab txoj kev ua hauj lwm qhuab qhia uas tus Tswv hu koj mus ua; thiab koj tsis tau mloog kuv tus Ntsuj Plig, thiab cov uas tau tsa los saib koj, tiam sis koj raug haub ntxias los ntawm cov neeg uas kuv tsis tau txib.
3 Yog li ntawd, tus Tswv thiaj li tseg koj kom koj nrhiav los ntawm kuv txhais tes, thiab cia koj xav txog tej yam uas koj tau txais.
4 Thiab koj qhov chaw nyob yuav yog tom koj txiv lub tsev, kom txog thaum kuv muab tej lus txib ntxiv rau koj tso. Thiab koj yuav tsum ua txoj hauj lwm qhuab qhia nyob hauv lub koom txoos, thiab rau neeg ntiaj teb, thiab rau tej thaj tsam ib puag ncig. Amees.
5 Saib seb, kuv hais rau koj, Peter, hais tias koj yuav tsum taug kev mus ncig nrog koj tus tij laug Oliver; vim lub sij hawm tau los txog lawm uas kuv xav tias tsim nyog kom koj yuav tsum qhib koj lub qhov ncauj tshaj tawm kuv txoj moo zoo; yog li ntawd, tsis txhob ntshai, tiam sis cia li mloog koj tus kwv tij tej lus thiab tej kev ntuas, uas nws yuav muab rau koj.
6 Thiab koj cia li nrog nws ris tag nrho tej kev txom nyem nws raug, muab koj lub siab tig hlo los rau kuv los ntawm kev thov Vajtswv thiab kev ntseeg, rau nws thiab koj txoj kev cawm dim; vim kuv tau muab hwj chim rau nws mus txhim tsa kuv lub koom txoos nyob hauv cov Neeg Lamas;
7 Thiab tsis muaj ib tug twg uas kuv tau tsa los ua nws tus pab cuam saib nws nyob hauv lub koom txoos, ntsig txog lub koom txoos tej xwm, tsuas yog nws tus kwv tij, Joseph Smith, tus Hluas.
8 Yog li ntawd, cia li ua raws li tej yam no thiab rau siab ntso ua raws li kuv tej lus txib, ces koj yuav tau koob hmoov txais txoj sia nyob mus ib txhis. Amees.
9 Saib seb, kuv hais rau koj, kuv tus tub qhe John, hais tias txij lub sij hawm no mus koj yuav tsum pib tshaj tawm kuv txoj moo zoo, yam li nrog lub suab raj hlau nrov.
10 Thiab koj tej hauj lwm yuav nyob tom koj tus kwv tij Philip Burroughs tsev, thiab nyob rau thaj tsam ib puag ncig ntawd, muaj tseeb tiag, txhua qhov chaw uas muaj neeg mloog koj, kom txog thaum kuv txib koj mus ntawm qhov chaw ntawd mus tso.
11 Thiab tag nrho koj txoj hauj lwm yuav yog rau hauv Xi-oos, nrog tag nrho koj lub siab, txij no mus; muaj tseeb tiag, koj yuav tsum qhib koj lub qhov ncauj txhua lub caij rau kuv lub hom phiaj, tsis txhob ntshai tej yam uas neeg ua tau, vim kuv nrog koj. Amees.