Tshooj 14
Kev tshwm sim uas tus Yaj Saub Joseph Smith tau txais kom qhia David Whitmer, hauv Fayette, New York, lub Rau Hli Ntuj xyoo 1829. Tsev neeg Whitmer xav paub heev txog txoj kev txhais Phau Ntawv Maumoos. Tus Yaj Saub muab Peter Whitmer tus Laus, lub tsev ua nws qhov chaw nyob, qhov uas nws tau nyob kom txog ntua thaum ua txoj hauj lwm txhais lus thiab ua cov ntaub ntawv kom tau cai luam phau ntawv ntawd tiav. Peter Whitmer peb tug tub, lawv puav leej tau txais kev ua tim khawv txog qhov tseeb ntawm txoj hauj lwm, lawv tau txhawj heev txog lawv tus kheej qhov dej num. Txoj kev tshwm sim no thiab ob zaj kev tshwm sim tom qab (tshooj 15 thiab 16) yog muab los teb rau lus nug thaum siv lub Ulees thiab Thumees. Yav tom qab no David Whitmer los ua ib tug ntawm Peb tug Tim Khawv rau Phau Ntawv Maumoos.
1–6, Cov neeg ua hauj lwm hauv lub vaj txiv hmab yuav tau txais kev cawm seej; 7–8, Txoj sia nyob mus ib txhis yog lub txiaj ntsim zoo tshaj plaws ntawm Vajtswv tej txiaj ntsim; 9–11, Khetos tau tsim lub ntuj thiab lub ntiaj teb.
1 Ib txoj hauj lwm tseem ceeb thiab zoo kawg nkaus tab tom yuav tawm los mus rau noob neej.
2 Saib seb, kuv yog Vajtswv; cia li mloog kuv txoj lus, uas muaj sia zees nyob thiab muaj hwj chim, ntse dua li rab ntaj uas muaj ob sab hniav, yuav faib hlo tej pob qij txha thiab tej hlwb txha ua ob sab; yog li ntawd cia li mloog kuv txoj lus.
3 Saib seb, thaj teb twb daj rhuv zoo sau qoob loo lawm, yog li ntawd, yog leej twg xav mus sau cia nws cev nws rab liag sib zog mus hlais, thiab sau los thaum tseem tshuav sij hawm, kom nws yuav khaws tau txoj kev cawm seej uas kav ib txhis cia rau nws tus ntsuj plig nyob hauv Vajtswv lub nceeg vaj.
4 Muaj tseeb tiag, tus uas yuav cev nws rab liag mus sau, ces Vajtswv hu tus ntawd.
5 Yog li ntawd, yog koj thov kuv ces koj yuav tau txais; yog koj khob ces yuav qhib rau koj.
6 Nrhiav kev pab tsa thiab coj kuv lub Xi-oos los. Ua raws li kuv tej lus txib thaum koj ua txhua yam tsav.
7 Thiab, yog hais tias koj ua raws li kuv tej lus txib thiab nyiaj mus kom txog thaum kawg ces koj yuav tau txoj sia nyob mus ib txhis, uas yog lub txiaj ntsim zoo tshaj plaws ntawm tag nrho Vajtswv tej txiaj ntsim.
8 Thiab yuav muaj tias, yog tias koj tuav kuv lub npe thov Leej Txiv, nrog txoj kev ntseeg cia siab ntsoov, ces koj yuav tau txais tus Vaj Ntsuj Plig Dawb Huv, tus uas ua kom yus txawj hais lus, kom koj yuav nyob nraim ua pov thawj txog tej yam uas koj yuav hnov thiab pom, thiab kuj kom koj yuav tshaj tawm txog kev hloov siab lees txim mus rau tiam neeg no.
9 Saib seb, kuv yog Yexus Khetos, Vajtswv tus uas muaj txoj sia nyob Leej Tub, tus uas tau tsim lub ntuj thiab lub ntiaj teb, uas yog txoj kev kaj uas muab nraim tsis tau nyob hauv qhov tsaus ntuj.
10 Yog li ntawd, kuv yeej yuav coj kuv txoj moo zoo txhij txhua tawm hauv Lwm Haiv Neeg los mus rau tsev neeg Ixayees.
11 Thiab saib seb, koj yog David, thiab tus Tswv twb hu koj los pab; qhov uas yog hais tias koj ua, thiab yog koj rau siab ntseeg, ces koj yuav tau koob hmoov tag nrho ntawm sab ntsuj plig thiab sab nqaij daim tawv, thiab koj nqi zog yuav loj heev. Amees.