Tshooj 35
Kev tshwm sim uas tus Yaj Saub Joseph Smith thiab Sidney Rigdon tau txais, hauv los yog ze hauv Fayette New York, lub Kaum Ob Hlis Ntuj hnub tim 7, xyoo 1830. Lub sij hawm no, tus Yaj Saub tau raus tes los txhais phau Npaivnpaum yuav luag txhua hnub. Txoj kev txhais lus no twb pib ntxov puag thaum lub Rau Hli Ntuj xyoo 1830 los lawm, thiab Oliver Cowdery thiab John Whitmer nkawd ob leeg tau pab ua tus teev ntawv. Vim ziag no tau muab nkawd hu mus ua lwm yam dej num, tus Tswv thiaj tau hu Sidney Rigdon los mus pab ua tus teev ntawv rau tus Yaj Saub thaum ua txoj hauj lwm no (saib nqe 20). Ua zaj lus qhia ua ntej zaj ceev xwm txheej ntawm txoj kev tshwm sim no, Joseph Smith zaj keeb kwm hais tias: “Thaum lub Kaum Ob Hlis Ntuj Sidney Rigdon tau tuaj [Ohio tuaj] nug tus Tswv, thiab Edward Partridge tau nrog nws tuaj. … Tsis ntev tom qab ob tug kwv tij no tuaj txog, tus Tswv hais lus li no.”
1–2, Neeg yuav ua li cas thiaj los ua tau Vajtswv cov tub; 3–7, Tus Tswv hu Sidney Rigdon mus muab neeg ua kev cai raus dej thiab muab tus Vaj Ntsuj Plig Dawb Huv rau lawv; 8–12, Tej cim thiab tej txuj ci tseem ceeb muaj taus los ntawm kev ntseeg; 13–16, Tus Tswv cov tub qhe yuav muab tej haiv neeg sib cais los ntawm tus Ntsuj Plig lub hwj chim; 17–19, Joseph Smith tuav cov yawm sij ntawm tej txuj ci uas neeg paub tsis txog; 20–21, Cov neeg uas tau xaiv tseg lawm yuav tiv taus hnub uas tus Tswv los; 22–27, Ixayees yuav txais kev cawm dim.
1 Cia li mloog tus Tswv nej tus Vajtswv lub suab, uas twb yog Alafas thiab Aumenkas, qhov chiv keeb thiab qhov kawg, tus uas nws txoj kev yog ib txoj uas ncig mus ib txhis li, tus uas hnub no zoo tib yam li nag hmo, thiab mus ib txhis li.
2 Kuv yog Yexus Khetos, Vajtswv Leej Tub, tus uas raug muab ntsia rau saum ntoo khaub lig rau neeg ntiaj teb tej kev txhaum, twb ua rau tag nrho cov uas yuav ntseeg kuv lub npe, kom lawv yuav los ua Vajtswv cov tub, koom nrog kuv ib yam li kuv koom nrog Leej Txiv, ib yam li Leej Txiv koom nrog kuv, kom peb yuav koom ib lub siab.
3 Saib seb, kuv hais tseeb tseeb rau kuv tus tub qhe Sidney tias, kuv tau ntsia koj thiab tej yam koj ua. Kuv tau hnov koj tej lus thov Vajtswv, thiab tau npaj koj rau ib txoj hauj lwm tseem ceeb zog.
4 Koj tau koob hmoov, vim koj yuav ua tej yam tseem ceeb. Saib seb tus Tswv tau xa koj mus, twb ib yam li Yauhas, mus npaj txoj kev rau kuv, thiab rau Eliyas uas yuav los, thiab koj twb tsis tau paub txog.
5 Koj tau muab neeg ua kev cai raus dej rau txoj kev hloov siab lees txim, tiam sis lawv tsis tau txais tus Vaj Ntsuj Plig Dawb Huv;
6 Tiam sis ziag no kuv muab ib lo lus txib rau koj, kom koj yuav tsum muab neeg ua kev cai raus dej, thiab lawv yuav tau txais tus Vaj Ntsuj Plig Dawb Huv los ntawm kev tso tes rau saum taub hau, twb ib yam li cov thwj tim thaum ub.
7 Thiab yuav muaj tias yuav muaj ib txoj hauj lwm tseem ceeb rau hauv thaj av, twb nyob hauv Lwm Haiv Neeg, vim tus Tswv yuav qhia lawv tej kev ruam thiab lawv tej kev qias rau txhua haiv neeg tej qhov muag pom.
8 Vim kuv yog Vajtswv, thiab twb tsis tau nkaum kuv txhais npab; thiab kuv yuav ua tej txuj ci tseem ceeb, tej cim, thiab tej txuj ci uas xav tsis thoob, rau txhua tus uas ntseeg kuv lub npe pom.
9 Thiab cov uas yuav thov los ntawm kuv lub npe nrog txoj kev ntseeg, lawv yuav ntiab cov dab phem tawm; lawv yuav kho kom cov neeg mob zoo; lawv yuav ua kom cov dig muag pom kev tuaj, thiab kom cov lag ntseg hnov lus, thiab kom cov ruam hais tau lus, thiab kom cov ceg tawv mus taus kev.
10 Thiab lub sij hawm yuav los ceev heev uas tus Tswv yuav muab tej yam tseem ceeb qhia los rau noob neej;
11 Tiam sis yog tsis muaj kev ntseeg ces yuav tsis muab ib yam dab tsi qhia los tsuas yog tej kev puas ntsoog rau Npanpiloos, nws twb yog tus tau ua kom txhua haiv neeg haus cov cawv txiv hmab npau taws ntawm nws txoj kev deev nkauj nraug.
12 Thiab twb tsis muaj ib tug uas ua zoo tsuas yog cov uas npaj txhij los txais kuv txoj moo zoo muaj txhij txhua, uas kuv tau xa los rau tiam neeg no.
13 Yog li ntawd, kuv hu cov neeg qaug zog ntawm lub ntiaj teb, cov uas tsis txawj ntse thiab raug tsim txom, kom mus muab tej haiv neeg sib cais los ntawm kuv tus Ntsuj Plig lub hwj chim;
14 Thiab lawv txhais npab yuav ua kuv txhais npab, thiab kuv yuav ua lawv daim hlau thiab daim phiaj thaiv lawv; thiab kuv yuav muab lawv txoj siv sia, thiab lawv yuav sib ntaus sib tua li txiv neej yawg rau kuv; thiab lawv cov yeeb ncuab yuav nyob hauv lawv qab xib taws; thiab kuv yuav viag rab ntaj los tua sawv cev rau lawv, thiab los ntawm hluav taws ntawm kuv txoj kev npau taws kuv yuav tsom kwm lawv.
15 Thiab cov pluag thiab cov siab mos siab muag yuav tau txoj moo zoo tshaj tawm mus rau lawv, thiab lawv yuav tos ntsoov rau hnub kuv yuav los, vim twb yuav txog lub sij hawm lawm—
16 Thiab lawv yuav tau kawm zaj lus piv txwv ntawm tsob ntoo cev, vim ziag no kiag twb yuav txog lub caij sov.
17 Thiab kuv tau xa kuv txoj moo zoo muaj txhij txhua los ntawm kuv tus tub qhe Joseph txhais tes; thiab kuv tau foom koob hmoov rau nws thaum nws qaug zog;
18 Thiab kuv tau muab cov yawm sij ntawm tej yam neeg paub tsis txog uas tau muab khi cia lawm rau nws, twb yog tej yam uas tau muaj txij thaum ntuj tsim teb raug los, thiab tej yam uas yuav muaj los txij lub sij hawm no kom txog hnub kuv los, yog hais tias nws nrog nraim kuv, thiab yog tsis li ces, kuv yuav tsa lwm tus los nyob nws chaw.
19 Yog li ntawd, cia li saib xyuas nws kom nws txoj kev ntseeg tsis txhob ploj mus, thiab yuav muab cov yawm sij ntawd los ntawm tus Nplij Siab, tus Vaj Ntsuj Plig Dawb Huv, uas paub txhua yam.
20 Thiab kuv muab ib txoj txib rau koj—hais tias koj yuav tsum sau ntawv rau nws; thiab tus Tswv yuav muab cov vaj lug kub los, ib yam li yog los ntawm kuv lub siab kiag los, kom cawm cov neeg uas kuv tau xaiv tseg dim;
21 Vim lawv yuav hnov kuv lub suab, thiab yuav pom kuv, thiab yuav tsis tsaug zog, thiab yuav tiv taus hnub kuv los; vim lawv yuav hloov ua neeg huv, twb ib yam li kuv dawb huv.
22 Thiab nim no kuv hais rau koj tias, nyob nrog nws, thiab nws yuav mus nrog koj; txhob tso nws tseg, ces tej yam no yeej yuav muaj raws li hais tiag.
23 Thiab rau qhov koj tsis sau, saib seb, tus Tswv yuav muab rau nws kom qhia tej yuav muaj los yav tom ntej; thiab koj yuav tshaj tawm kuv txoj moo zoo thiab hais txog cov yaj saub dawb huv tej lus los ua pov thawj tias nws cov lus muaj tseeb, thaum yuav muab tej lus ntawd rau nws.
24 Ua raws li tag nrho tej lus txib thiab kev khi lus uas koj tau khi; ces kuv yuav ua kom lub ntuj co nto rau koj, thiab Dab Ntxwg Nyoog yuav tshee hnyo thiab Xi-oos yuav xyiv fab rau saum tej pov roob thiab vam meej;
25 Thiab Ixayees yuav txais kev cawm dim thaum txog lub sij hawm kuv pom zoo; thiab yuav coj lawv kev los ntawm cov yawm sij uas kuv tau muab, thiab lawv yuav tsis raug kev ntxhov hnyo kiag li lawm.
26 Neb cia li zoo siab thiab xyiv fab, twb yuav txog lub sij hawm rau neb txoj kev txhiv dim lawm.
27 Tsis txhob ntshai, pab me nyuam yaj, lub nceeg vaj yog nej li kom txog thaum kuv los. Saib seb, kuv los sai sai no. Twb yog li ntawd. Amees.