Tshooj 119
Kev tshwm sim uas tus Yaj Saub Joseph Smith tau txais, nyob hauv Far West, Missouri, lub Xya Hli Ntuj hnub tim 8, xyoo 1838, los teb rau nws lo lus thov tias: “Auj tus Tswv! Qhia los rau koj cov tub qhe saib koj xav kom koj cov neeg yuav tsum muab npaum li cas ntawm lawv tej khoom los them rau ib feem kaum.” Txoj kev cai them ib feem kaum, li uas to taub niaj hnub nim no, tsis tau muab rau lub Koom Txoos ua ntej txoj kev tshwm sim no. Lo lus ib feem kaum nyob hauv txoj kev thov Vajtswv nyuam qhuav hais no thiab nyob hauv tej kev tshwm sim ua ntej (64:23; 85:3; 97:11) tsis yog hais txog ib feem kaum xwb, tiam sis yog tag nrho tej uas lawv zoo siab hlo muab tiam, los yog kev muab pab, rau hauv lub Koom Txoos pob nyiaj txiag. Ua ntej no tus Tswv tau muab txoj kev cai fij siab thiab txoj kev cai hauj lwm saib xyuas ntawm tej teej tug rau lub Koom Txoos, uas cov mej zeej (tshwj xeeb yog cov thawj txwj laug) tau txaus siab ua los ntawm ib txoj kev khi lus uas kom kav ib txhis. Vim rau qhov muaj ntau leej ceev tsis tau txoj kev khi lus no, tus Tswv thiaj tau thim txoj kev khi lus no mus ib ntus thiab muab txoj kev cai them ib feem kaum los rau tag nrho cov Ntseeg. Tus Yaj Saub nug tus Tswv saib Nws xav tau pes tsawg ntawm lawv tej teej tug coj mus siv rau tej hom phiaj dawb ceev. Txoj kev tshwm sim no yog lo lus teb.
1–5, Haiv Neeg Ntseeg yuav tsum muab lawv tej teej tug uas siv tsis tag them thiab tom qab ntawd muab ib feem kaum ntawm lawv tej paj laum txhua xyoo los them rau ntawm txoj kev cai ib feem kaum; 6–7, Ib txoj kev zoo li no yuav ua rau thaj av Xi-oos hloov ua dawb huv.
1 Tus Tswv hais tseeb li no tias, kuv kom lawv muab tag nrho lawv tej teej tug uas siv tsis tag coj mus tso rau ntawm tus npisov ntawm kuv lub koom txoos hauv Xi-oos txhais tes.
2 Rau txoj kev txhim tsa kuv lub tsev, thiab rau txoj kev teeb lub hauv paus ntawm Xi-oos thiab rau lub pov thawj hwj, thiab rau tej nuj nqis ntawm pawg Thawj Tswj Hwm ntawm kuv lub Koom Txoos.
3 Thiab qhov no yuav yog qhov chiv keeb ntawm txoj kev them ib feem kaum ntawm kuv cov neeg.
4 Thiab tom qab ntawd, cov uas tau them ib feem kaum lawm yuav muab ib feem kaum ntawm tag nrho lawv tej paj laum txhua xyoo los them; thiab qhov no yog ib txoj kev cai ruaj khov rau lawv mus ib txhis li, rau kuv lub pov thawj hwj dawb huv, tus Tswv hais li.
5 Kuv hais tseeb rau nej tias, yuav tau muaj tias tag nrho cov uas sib sau mus rau hauv thaj av Xi-oos yuav tsum them ib feem kaum ntawm lawv tej teej tug uas siv tsis tag, thiab yuav tsum ua raws li txoj kev cai no, los yog tsis li ces yuav tsis pom tias lawv yog neeg tsim nyog nyob hauv nej.
6 Thiab kuv hais rau nej tias, yog kuv cov neeg tsis ua raws li txoj kev cai no, kom ua dawb huv, thiab los ntawm txoj kev cai no muab thaj av Xi-oos hloov ua dawb huv rau kuv, kom yuav ua raws li kuv tej kev cai thiab kuv tej kev txiav txim nyob rau haud, kom tej no yuav dawb huv tshaj plaws, saib seb, kuv hais tseeb rau nej tias, thaj av no yuav tsis ua ib thaj av Xi-oos rau nej.
7 Thiab qhov no yuav yog ib tug yam ntxwv rau tag nrho tej ceg txheem ntseeg ntawm Xi-oos. Twb yog li ntawd. Amees.