1 Auj cia li mloog, nej cov txwj laug ntawm kuv lub koom txoos, thiab cuab pob ntseg rau tej lus uas kuv yuav hais rau nej.

2 Vim saib seb, kuv hais tseeb tseeb rau nej tias, nej tau txais ib lo lus txib los ua ib txoj kev cai rau kuv lub koom txoos, los ntawm tus uas kuv tau tsa rau nej los txais tej lus txib thiab tej kev tshwm sim los ntawm kuv txhais tes.

3 Thiab qhov no nej yeej yuav paub tseeb tias—tsis muaj dua lwm tus uas tau tsa los rau nej los txais tej lus txib thiab tej kev tshwm sim kom txog thaum tus Tswv coj nws mus lawm tso, yog hais tias nws nrog nraim kuv.

4 Tiam sis kuv hais tseeb tseeb rau nej tias, tsis muaj dua lwm tus uas yuav tsa los rau lub txiaj ntsim no tsuas yog los ntawm nws xwb; vim hais tias yog muab qhov txiaj ntsim ntawd tshem ntawm nws mus lawm ces nws yuav tsis muaj hwj chim tsuas yog yuav tau tsa dua ib tug nyob nws qhov chaw.

5 Thiab qhov no yuav yog ib txoj kev cai rau nej, kom nej tsis txhob txais tej lus qhia ntawm ib tug twg uas yuav tuaj rau nej ua tej kev tshwm sim los yog tej lus txib;

6 Thiab kuv muab qhov no rau nej kom nej tsis txhob raug dag ntxias, kom nej yuav paub tias tej lus qhia ntawd tsis yog los ntawm kuv.

7 Vim kuv hais tseeb rau nej tias, tus uas kuv tsa yeej yuav nkag tom lub qhov rooj los thiab yuav muab nws tsa raws li kuv tau qhia rau nej ua ntej, kom qhia tej kev tshwm sim uas nej tau txais thiab yuav tau txais los ntawm tus uas kuv tau tsa.

8 Thiab nim no, saib seb, kuv muab ib lo lus txib rau nej, hais tias thaum nej tuaj txoos ua ke nej ib leeg yuav qhia thiab txhawb ib leeg, kom nej yuav paub ua thiab coj kuv lub koom txoos, kom paub coj raws li tej ntsiab lus ntawm kuv txoj kev cai thiab tej lus txib, uas kuv tau muab.

9 Thiab li no nej yuav txais tau lus qhia txog kuv lub koom txoos txoj kev cai, thiab hloov ua neeg dawb huv los ntawm qhov uas nej tau txais, thiab nej yuav tsum lav nej tus kheej los coj dawb huv tag nrho rau ntawm kuv qhov muag—

10 Kom npaum li uas nej ua qhov no, yuav muab yeeb koob ntxiv rau lub nceeg vaj uas nej tau txais. Npaum li uas nej tsis ua qhov no, yuav muab tej no tshem mus, tsis hais tej uas nej twb tau txais lawm los yog.

11 Nej cia li ntxuav tej kev ua phem uas nyob hauv nej tawm mus; hloov nej tus kheej ua neeg dawb huv rau kuv pom;

12 Thiab yog nej xav tau tej yeeb koob ntawm lub nceeg vaj, nej cia li tsa kuv tus tub qhe Joseph Smith, tus Hluas, thiab ua rau kuv pom tias nej txhawb nqa nws los ntawm txoj kev thov Vajtswv nrog kev ntseeg.

13 Thiab ntxiv, kuv hais rau nej tias, yog nej xav tau tej txuj ci uas neeg tsis paub txog lub nceeg vaj, nrhiav khoom noj thiab khaub ncaws rau nws, thiab txhua yam uas nws yuav tsum muaj los ua txoj hauj lwm uas kuv tau txib nws lawm tiav;

14 Thiab yog nej tsis ua li no nws yeej yuav nyob nrog cov tau txais nws, kom kuv yuav tshwj rau kuv tus kheej ib haiv neeg uas kuv pom tias yog neeg dawb huv.

15 Kuv hais ntxiv tias, nej uas yog txwj laug ntawm kuv lub koom txoos cia li mloog, cov uas kuv tau tsa: Tus Tswv tsis xa nej mus kom lwm tus qhia nej, tiam sis kom mus qhia noob neej tej yam uas kuv tau muab rau hauv nej txhais tes lawm los ntawm kuv tus Ntsuj Plig lub hwj chim;

16 Thiab nej yuav tsum txais kev qhia los saum ntuj los. Hloov nej tus kheej ua neeg dawb huv thiab nej yuav tau txais vaj txiaj ntsim hwj chim, kom nej yuav muab raws li kuv tau hais lawm.

17 Nej cia li mloog, vim, saib seb, twb yuav txog hnub tseem ceeb ntawm tus Tswv lawm.

18 Vim hnub ntawd yuav los thaum tus Tswv yuav ua nws lub suab tawm saum ntuj ceeb tsheej los; lub ntuj yuav co nto thiab lub ntiaj teb yuav tshee hnyo, thiab Vajtswv lub raj hlau yuav nrov kom ntev thiab muaj ceem, thiab yuav hais rau tej teb chaws uas tsaug zog tias: Nej cov uas yog haiv neeg ntseeg cia li sawv los thiab ua neej; nej cov uas yog neeg txhaum nyob twj ywm thiab tsaug zog kom txog thaum kuv yuav hu dua tso.

19 Yog li ntawd muab nej tej siv sia tsam tus Tswv pom nej nrog cov phem.

20 Tsa nej lub suab thiab tsis txhob tseg. Hu tej haiv neeg kom hloov siab lees txim, tag nrho cov laus thiab cov hluas, tag nrho cov ua qhev thiab cov ywj pheej, hais tias: Npaj nej tus kheej rau hnub tseem ceeb ntawm tus Tswv;

21 Vim yog kuv, tus uas yog ib tug txiv neej, tsa kuv lub suab thiab hu nej kom hloov siab lees txim, thiab nej cia li ntxub kuv, nej yuav hais li cas thaum txog hnub xob yuav ua nws lub suab nroo thoob plaws lub ntiaj teb tuaj, hais lus rau tag nrho cov muaj sia nyob lub pob ntseg, hais tias—Hloov siab lees txim, thiab npaj rau hnub tseem ceeb ntawm tus Tswv?

22 Muaj tseeb tiag, thiab ntxiv, thaum xob laim yuav ci tim sab hnub tuaj mus txog sab hnub poob, thiab yuav ua nws lub suab nroo tuaj rau tag nrho cov muaj sia nyob, thiab yuav ua kom txhua tus pob ntseg rhiab uas hnov, yuav hais cov lus no—Nej cia li hloov siab lees txim, vim hnub tseem ceeb ntawm tus Tswv twb los lawm?

23 Thiab ntxiv, tus Tswv yuav ua kom nws lub suab tawm saum ntuj ceeb tsheej los, hais tias: Cia li mloog, auj nej uas yog tej haiv neeg hauv lub ntiaj teb, thiab cia li hnov tej lus ntawm tus Vajtswv uas tau tsim nej.

24 Auj, nej uas yog tej haiv neeg hauv lub ntiaj teb, muaj ntau zaus uas kuv twb xav sau nej los ua ke ib yam li ib tug poj qaib sau nws cov me nyuam los rau hauv nws qab tis, tiam sis nej tsis kam!

25 Muaj ntau zaus uas kuv tau hu rau nej los ntawm kuv cov tub qhe lub qhov ncauj, thiab los ntawm cov tim tswv tej kev los txhawb pab, thiab los ntawm kuv lub suab, thiab los ntawm lub suab ntawm xob quaj, thiab los ntawm lub suab ntawm xob laim, thiab los ntawm lub suab ntawm cua daj cua dub, thiab los ntawm lub suab ntawm av qeeg, thiab kob lawg loj, thiab los ntawm lub suab ntawm kev tshaib nqhis thiab tej kab mob phem txhua yam, thiab los ntawm lub suab raj hlau muaj ceem, thiab los ntawm lub suab txiav txim, thiab los ntawm lub suab hlub tshua uas nrov tas hnub, thiab los ntawm lub suab yeeb koob thiab sam xeeb thiab kev nplua nuj ntawm txoj sia nyob mus ib txhis, thiab twb xav cawm nej nrog txoj kev cawm seej kav ib txhis, tiam sis nej tsis kam!

26 Saib seb, lub sij hawm tau los txog lawm, es lub khob ntawm txoj kev npau taws ntawm kuv txoj kev chim siab puv lawm.

27 Saib seb, kuv hais tseeb rau nej tias, tej lus no yog tej lus ntawm tus Tswv nej tus Vajtswv.

28 Yog li ntawd, nej cia li ua hauj lwm, nej cia li ua hauj lwm nyob hauv kuv lub vaj txiv hmab rau zaum kawg—zaum kawg mus hu cov neeg nyob hauv lub ntiaj teb.

29 Vim thaum txog lub sij hawm kuv pom zoo lawm kuv yuav los rau hauv lub ntiaj teb nrog kev txiav txim, thiab kuv cov neeg yuav txais kev txhiv dim thiab yuav kav nrog kuv nyob hauv lub ntiaj teb.

30 Vim hnub nyoog Milenias zoo kawg nkaus, uas kuv tau hais txog los ntawm kuv cov tub qhe lub qhov ncauj, yuav los.

31 Vim Dab Ntxwg Nyoog yuav raug muab khi, thiab thaum rov qab muab nws tso nws tsuas yuav kav ib nyuag ntus xwb, thiab tom qab ntawd ces qhov kawg ntawm lub ntiaj teb los.

32 Thiab tus Tswv yuav muab tus uas ua neej ncaj ncees hloov hlo thaum tib ntsais muag, thiab lub ntiaj teb yuav dhau mus ib yam li ntawd los ntawm hluav taws.

33 Thiab cov phem yuav mus rau hauv cub tawg uas tsis txawj tuag, thiab qhov kawg ntawm lawv los tsis muaj neeg hauv ntiaj teb paub, thiab yeej yuav tsis paub, kom txog thaum lawv los rau ntawm kuv los txiav txim tso.

34 Nej cia li mloog cov lus no. Saib seb, kuv yog Yexus Khetos, tus Cawm Seej ntawm neeg ntiaj teb. Muab tej yam no khaws zoo cia rau hauv nej lub siab, thiab cia tej yam tiag tiag ntawm kev nyob mus ib txhis nyob hauv nej lub cim xeeb.

35 Ua tiag tiag. Ua raws li tag nrho kuv tej lus txib. Twb yog li ntawd. Amees.