1 Thiab ntxiv, peb xav kom nej ua zoo xav txog qhov uas tsim nyog kom tag nrho haiv neeg ntseeg khaws tej kev paub tag nrho tej yam uas muaj tseeb, thiab tej kev txom nyem thiab tej kev tsim txom uas cov neeg nyob hauv lub Xeev no ua rau lawv;

2 Thiab kuj tag nrho tej teej tug thiab saib lawv raug tej kev puas tsuaj npaum li cas, tag nrho ntawm sab xeeb ceem thiab sab cev nqaij daim tawv, thiab tej vaj tsev;

3 Thiab kuj tag nrho tej lub npe ntawm txhua tus neeg uas tau koom tes quab yuam lawv, npaum li uas lawv muaj peev xwm muab tau tej ntawd thiab nrhiav tau tej ntawd.

4 Thiab tej zaum yuav tsa ib pab los nrhiav txog tej yam no, thiab los sau tej zaj lus tim khawv thiab ntawv pov thawj; thiab kuj los khaws tej ntawv luam tawm cuav uas pheej ncig mus ncig los;

5 Thiab tag nrho tej uas muaj nyob hauv tej phau xov xwm, thiab hauv tej phau khaws kev txawj ntse, thiab tag nrho tej keeb kwm cuav uas muab luam tawm, thiab tseem sau, thiab los ntawm leej twg, thiab muab los qhia tag nrho tej zaj sib txuas zuj zus ntawm tus dab phem tej kev lim hiam thiab txhua yam phem thiab tua neeg uas tau ua rau cov neeg no—

6 Kom tsis yog peb yuav muab luam rau tag nrho neeg ntiaj teb xwb, tiam sis muab tej ntawd qhia rau cov thawj nom tswv nyob hauv tag nrho lawv tej duab ntxoo ntawm kev tsaus ntuj thiab kev phem, raws li txoj hauj lwm kawg uas peb Leej Txiv Saum Ntuj Ceeb Tsheej kom peb ua, ua ntej peb yuav muaj peev xwm aws tau tag nrho thiab txhua nrho txoj kev cog lus uas yuav hu nws tawm hauv nws qhov chaw nkaum los; thiab kuj kom tag nrho lub teb chaws yuav tsis muaj lus hais ua ntej nws yuav xa tau lub hwj chim ntawm nws txhais npab muaj zog los.

7 Yog dej num uas peb yuav tsum ua rau Vajtswv, rau cov tim tswv, cov uas Vajtswv yuav coj peb los sawv nrog, thiab rau peb tus kheej, rau peb cov poj niam thiab me nyuam, cov uas raug txom nyem heev nrog kev nyuaj siab, kev tu siab, thiab tej kev teeb meem, los ntawm cov neeg tua neeg, tej nom tswv phem, thiab kev quab yuam txhais tes ntxub ntxaug, uas txhawb nqa thiab txhaub thiab pom zoo rau lub hwj huam ntawm tus ntsuj plig uas tau muab tej kev cai ntseeg cuav ntawm cov poj koob yawm txwv uas tau txais tej kev dag ntxias, ua lawv teej tug coj los khuam rau tej xeeb leej xeeb ntxwv tej siab khov kho, thiab muab txoj kev xav yuam kev tso mus puv ntiaj teb, thiab tau muaj zog zuj zus, thiab nim no yog kiag lub zog ntawm txhua txhua yam kev liam sij, thiab tag nrho neeg ntiaj teb nroo ris lub nra ntawm nws txoj kev ua phem.

8 Yog ib tug quab hlau, yog ib txoj hlua khov; twb yog kiag cov khawm xauv tes, thiab cov saw hlau, thiab cov cuab xauv tes, thiab cov cuab xauv taw ntawm ntuj txiag teb tsaus.

9 Yog li ntawd yog dej num uas peb tshuav yuav tsum ua, tsis yog rau peb tus kheej cov poj niam thiab cov me nyuam xwb, tiam sis yog rau cov poj ntsuam thiab cov me nyuam tsis muaj txiv, cov uas lawv cov txiv thiab cov me nyuam txiv raug tua tuag los ntawm nws txhais tes hlau;

10 Tej hauj lwm tsaus ntuj thiab dub uas txaus ua rau ntuj txiag teb tsaus tshee hnyo, thiab ceeb hlo thiab daj ntseg lis, thiab ua rau tus dab phem kiag txhais tes tshee nkaws thiab tshee hnyo.

11 Thiab kuj yog dej num uas peb tshuav yuav tsum ua rau tag nrho tiam neeg uas tab tom loj hlob tuaj, thiab rau tag nrho cov neeg muaj siab dawb—

12 Vim hais tias tseem muaj ntau tus nyob hauv ntiaj teb hauv txhua pab, txhua pawg, thiab txhua lub koom txoos, cov uas tib neeg txoj kev txawj ntxias ua rau lawv dig muag, qhov uas lawv nkaum tos dag ntxias, thiab cov uas tsis paub qhov tseeb tsuas yog vim lawv tsis paub mus nrhiav qhov tseeb nyob rau qhov twg—

13 Yog li ntawd, qhov uas peb yuav siv tag nrho peb lub neej rau txoj kev coj txhua yam nraim nroos ntawm txoj kev tsaus ntuj tawm los rau txoj kev kaj, npaum li uas peb paub tej no; thiab tseeb tiag yuav muab tej no qhia tshwm saum ntuj ceeb tsheej los—

14 Peb thiaj li yuav tsum mob siab ua tej yam no.

15 Tsis txhob pub ib tug neeg suav tej no ua tej yam me me; vim muaj ntau heev tos rau yav tom ntej, ntsig txog haiv neeg ntseeg, uas nyob ntawm tej yam no.

16 Nej yeej paub, cov kwv tij, hais tias ib lub nkoj loj loj yeej tau kev pab heev los ntawm ib tug duav kiv dej me me nyob rau lub sij hawm muaj cua daj cua dub, es ceev kom lub nkoj mus taus zoo nrog tej cua thiab tej dej ntas.

17 Yog li ntawd, cov kwv tij uas kuv hlub heev, cia peb zoo siab hlo ua txhua yam uas peb muaj hwj chim ua tau; thiab tom qab ntawd kom peb sawv twj ywm, nrog txoj kev tso siab hlo, los paub Vajtswv txoj kev cawm seej, thiab tos nws txhais npab tshwm sim los.