Tshooj 56
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Rau Hli Ntuj hnub tim 15, xyoo 1831. Kev tshwm sim no qhuab ntuas Ezra Thayre vim nws tsis ua raws li ib lo lus txib dhau los (“lo lus txib” nyob hauv nqe 8), uas Joseph Smith tau txais rau nws, uas qhia Thayre txog nws tej dej num nyob hauv Frederick G. Williams daim teb uas nws nyob. Txoj kev tshwm sim no kuj thim txoj kev hu Thayre mus rau Missouri nrog Thomas B. Marsh (saib tshooj 52:22).
1–2, Haiv Neeg Ntseeg yuav tsum kwv lawv tus ntoo khaub lig thiab coj raws li tus Tswv es thiaj tau txoj kev cawm seej; 3–13, Tus Tswv txib thiab thim, thiab cov tsis mloog lus raug muab pov tseg; 14–17, Kev txom nyem raug cov nplua nuj uas tsis pab cov pluag, thiab kev txom nyem raug cov pluag uas lub siab tsis puas tas; 18–20, Cov pluag uas muaj lub siab dawb tau koob hmoov, vim lawv yuav tau lub ntiaj teb ua lawv tug.
1 Cia li mloog, auj nej cov uas ris kuv lub npe, tus Tswv nej tus Vajtswv hais li; vim saib seb, kuv txoj kev chim siab twb npau rau cov ntxeev siab, thiab lawv yuav paub kuv txhais npab thiab kuv txoj kev chim siab, nyob rau hnub los rau txim thiab hnub npau taws rau tej haiv neeg.
2 Thiab tus uas tsis kwv nws tus ntoo khaub lig thiab coj raws li kuv, thiab ua raws li kuv tej lus txib, tus ntawd yuav tsis dim.
3 Saib seb, kuv, tus uas yog tus Tswv, txib; thiab tus uas tsis mloog lus yuav raug muab txiav tawm thaum txog lub sij hawm kuv pom zoo, tom qab kuv tau txib thiab lo lus txib ntawd raug muab rhuav lawm.
4 Yog li ntawd kuv, tus uas yog tus Tswv, txib thiab thim, raws li kuv pom zoo; thiab tag nrho qhov no yuav tso rau saum cov ntxeev siab lub taub hau, tus Tswv hais li.
5 Yog li ntawd, kuv thim lo lus txib uas tau muab rau kuv ob tug tub qhe Thomas B. Marsh thiab Ezra Thayre, thiab muab ib lo lus txib tshiab rau kuv tus tub qhe Thomas, kom nws cia li mus nrawm nroos lawm tim thaj av Missouri, thiab kuv tus tub qhe Selah J. Griffin yuav nrog nws mus thiab.
6 Vim saib seb, kuv thim lo lus txib uas tau muab rau kuv ob tug tub qhe Selah J. Griffin thiab Newel Knight, vim yog txoj kev tawv ncauj ntawm kuv cov neeg uas nyob hauv Thompson, thiab lawv tej kev ntxeev siab.
7 Yog li ntawd, cia kuv tus tub qhe Newel Knight nrog lawv nyob; thiab tag nrho cov uas yuav mus ces cia mus, cov uas kuv pom tias muaj siab xav ua zoo, thiab kom nws coj lawv mus lawm tim thaj av uas kuv tau txib.
8 Thiab ntxiv, kuv hais tseeb rau nej tias, kuv tus tub qhe Ezra Thayre yuav tsum hloov siab lees txim rau nws txoj kev muab hlob, thiab rau nws txoj kev cuaj khaum, thiab ua raws li lo lus txib kuv muab rau nws ua ntej ntsig txog qhov chaw uas nws nyob.
9 Thiab yog hais tias nws yuav ua li no, vim yuav tsis muaj kev muab thaj av faib, ces tus Tswv tseem txib nws li qub kom mus lawm tim thaj av Missouri.
10 Yog tsis li ces nws yuav tsum tau txais qhov nyiaj uas nws tau them, thiab yuav tsum tawm qhov chaw ntawd mus, thiab yuav tsum raug txiav tawm ntawm kuv lub koom txoos mus, ib tsoom tub rog tus Tswv uas yog Vajtswv hais li;
11 Thiab txawm tias lub ntuj thiab lub ntiaj teb yuav ploj mus, cov lus no yuav tsis ploj mus, tiam sis yuav muaj raws li tau hais.
12 Thiab yog hais tias kuv tus tub qhe Joseph Smith, tus Hluas, yeej yuav tsum them cov nyiaj, saib seb, kuv, uas yog tus Tswv, yuav rov qab them rau nws dua nyob hauv thaj av Missouri, kom cov uas nws txais yuav thiaj tau nqi zog dua raws li qhov uas lawv ua;
13 Vim lawv yuav tau txais raws li qhov uas lawv ua, tsis hais tej av ua lawv qub txeeg qub teg los yog.
14 Saib seb, tus Tswv hais li no rau kuv cov neeg—nej muaj ntau yam ua thiab muaj ntau yam rau nej hloov siab lees txim, vim saib seb, nej tej kev txhaum tau nce tuaj txog kuv, thiab tsis tau zam txim, vim nej nrhiav kev ua raws li nej tus kheej lub siab nyiam.
15 Thiab tsis tau txaus nej lub siab. Thiab nej tsis ua raws li qhov tseeb, tiam sis muaj kev zoo siab rau tej kev tsis ncaj ncees.
16 Kev txom nyem raug nej cov neeg nplua nuj, cov uas tsis kam muab nej tej khoom rau cov pluag, vim nej tej kev nplua nuj yuav ua rau nej tus ntsuj plig liam; thiab qhov no yuav yog nej txoj kev nyiav nyob rau hnub los rau txim, thiab hnub txiav txim, thiab hnub ntawm kev npau taws: Txoj kev sau qoob loo twb dhau lawm, lub caij ntuj sov twb tag lawm thiab kuv tus ntsuj plig tsis dim!
17 Kev txom nyem raug nej cov neeg pluag, uas tsis muaj lub siab mob, cov uas tsis muaj lub siab xav ua zoo, thiab cov uas lub plab pheej noj tsis txaus, thiab cov uas lawv txhais tes pheej tsis tseg txoj kev muab lwm tus tej khoom, cov uas lawv lub qhov muag ntshaw luag tug kom puv npo, thiab cov uas tsis siv lawv tus kheej txhais tes ua hauj lwm!
18 Tiam sis cov neeg pluag uas muaj lub siab dawb, cov uas siab puas tag, thiab cov uas muaj siab xav ua zoo tau koob hmoov, vim lawv yuav pom Vajtswv lub nceeg vaj los nrog hwj chim thiab yeeb koob loj los cawm lawv dim; vim tej kev nplua mias ntawm lub ntiaj teb yog lawv li.
19 Vim saib seb, tus Tswv yuav los, thiab nws txoj kev them nqi zog yuav nrog nws los, thiab nws yuav muab nqi zog rau txhua tus neeg, thiab cov pluag yuav xyiv fab;
20 Thiab lawv tej tiam xeeb ntxwv yuav tau lub ntiaj teb ua lawv tug ntawm ib tiam neeg mus rau ib tiam, nyob mus ib txhiab thiab ib txhis. Thiab nim no kuv hais lus rau nej tas. Twb yog li ntawd. Amees.