Tshooj 39
Kev tshwm sim uas tus Yaj Saub Joseph Smith tau txais kom qhia James Covel, nyob hauv Fayette, New York, lub Ib Hlis Ntuj hnub tim 5, xyoo 1831. James Covel, uas yog ib tug xib hwb nyob hauv koom txoos Methodist tau li plaub caug xyoo, tau khi lus nrog tus Tswv tias nws yuav ua raws li txhua lo lus txib uas tus Tswv yuav muab rau nws los ntawm tus Yaj Saub Joseph.
1–4, Haiv Neeg Ntseeg muaj hwj chim hloov los ua Vajtswv cov tub; 5–6, Kev txais txoj moo zoo ces yog kev txais Khetos; 7–14, Tus Tswv txib James Covel kom ua kev cai raus dej thiab ua hauj lwm hauv tus Tswv lub vaj txiv hmab; 15–21, Tus Tswv cov tub qhe yuav tau mus tshaj tawm txoj moo zoo ua ntej txoj Kev Los Zaum Ob; 22–24, Yuav muab cov uas txais yuav txoj moo zoo sau los ua ke hauv lub neej no thiab lub neej nyob mus ib txhis.
1 Cia li mloog thiab cuab pob ntseg rau lub suab ntawm tus uas nyob tag nrho ib txhiab mus tag nrho ib txhis, tus Kuv Yeej Yog uas Muaj Hwj Chim, uas twb yog Yexus Khetos—
2 Txoj kev kaj thiab txoj sia ntawm neeg ntiaj teb, txoj kev kaj uas ci nyob hauv qhov tsaus thiab qhov tsaus tsis to taub txoj kev kaj ntawd;
3 Tus uas tau los thaum lub caij nyoog nruab nrab rau kuv cov neeg, thiab kuv cov neeg tsis txais yuav kuv;
4 Tiam sis rau tag nrho cov uas txais yuav kuv, kuv muab hwj chim rau kom hloov los ua kuv cov tub; thiab kuv yuav muab hwj chim zoo li ntawd rau tag nrho cov uas txais yuav kuv, kom hloov los ua kuv cov tub.
5 Thiab kuv hais tseeb tseeb rau koj tias, tus uas txais yuav kuv txoj moo zoo txais yuav kuv; thiab tus uas tsis txais yuav kuv txoj moo zoo tsis txais yuav kuv.
6 Thiab qhov no yog kuv txoj moo zoo—kev hloov siab lees txim thiab kev cai raus los ntawm dej, thiab tom qab ntawd ces yog kev cai raus ntawm hluav taws thiab ntawm tus Vaj Ntsuj Plig Dawb Huv, uas twb yog tus Nplij Siab, tus uas muab txhua yam los qhia, thiab qhia txog tej yam kaj siab lug ntawm lub nceeg vaj.
7 Thiab nim no, saib seb, kuv hais rau koj, kuv tus tub qhe James, kuv tau ntsia tej yam uas koj ua thiab kuv paub koj.
8 Thiab kuv hais tseeb rau koj, kuv pom tias lub sij hawm no koj muaj lub siab ncaj ncees; thiab, saib seb, kuv tau foom cov koob hmoov tseem ceeb rau saum koj taub hau;
9 Txawm li ntawd los, koj tau pom tej kev tu siab loj, rau qhov koj tau xyeej kuv ntau zaus vim yog txoj kev muab hlob thiab tej kev txhawj txog tej yam ntawm lub ntiaj teb.
10 Tiam sis, saib seb, lub sij hawm uas koj yuav dim twb los lawm, yog hais tias koj mloog kuv lub suab, uas hais rau koj tias: Sawv thiab ua kev cai raus dej, thiab ntxuav koj tej kev txhaum pov tseg, hu txog kuv lub npe, ces koj yuav tau txais kuv tus Ntsuj Plig, thiab ib txoj koob hmoov tseem ceeb heev uas koj tsis tau paub dua.
11 Thiab yog koj ua li no, kuv tau npaj koj mus ua ib txoj hauj lwm tseem ceeb dua. Koj yuav tshaj tawm kuv txoj moo zoo muaj txhij txhua, uas kuv tau xa los rau thaum hnub nyoog kawg no, txoj kev khi lus uas kuv tau xa los mus sau kuv haiv neeg, uas yog tsev neeg Ixayees.
12 Thiab yuav muaj tias hwj chim yuav los rau koj; koj yuav muaj kev ntseeg loj, thiab kuv yuav nrog koj thiab yuav mus ua koj ntej.
13 Kuv hu koj mus ua hauj lwm hauv kuv lub vaj txiv hmab, thiab mus txhim tsa kuv lub koom txoos, thiab mus tsim Xi-oos, kom Xi-oos yuav xyiv fab rau saum tej pov roob thiab vam meej.
14 Saib seb, kuv hais tseeb tseeb rau koj tias, tus Tswv tsis hu koj mus tim tej teb chaws sab hnub tuaj, tiam sis hu koj mus tim Ohio.
15 Thiab rau qhov kuv cov neeg yuav mus sib txoos ua ke nyob tim Ohio, kuv tau khaws cia ib txoj koob hmoov uas noob neej tsis tau paub txog, thiab yuav foom koob hmoov ntawd rau saum lawv lub taub hau. Thiab tib neeg yuav tawm tim Ohio mus rau txhua haiv neeg.
16 Saib seb, kuv hais tseeb tseeb rau koj tias, cov neeg nyob tim Ohio muaj kev ntseeg loj thov kuv, lawv xav tias kuv yuav tsis coj kev txiav txim los rau tej haiv neeg, tiam sis kuv xyeej tsis tau kuv txoj lus.
17 Yog li ntawd cia li pib ua hauj lwm nrog koj lub peev xwm thiab hu cov neeg rau siab ua hauj lwm mus rau hauv kuv lub vaj txiv hmab, kom yuav muab lub vaj yim ua zaum kawg.
18 Thiab npaum li uas lawv yuav hloov siab lees txim thiab txais qhov txhij txhua ntawm kuv txoj moo zoo, thiab hloov ua neeg dawb huv, kuv yuav tseg es tsis coj kev txiav txim los.
19 Yog li ntawd, cia li mus, hu ib lub suab nrov nrov, hais tias: Twb yuav txog lub sij hawm rau lub nceeg vaj ceeb tsheej lawm; hais nrov nrov tias: Hauxanas! cia li qhuas tus Vajtswv Siab Tshaj Plaws lub npe.
20 Cia li mus muab neeg ua kev cai raus dej, npaj txoj kev rau kuv rau lub sij hawm kuv yuav los;
21 Vim twb yuav txog lub sij hawm lawm; hnub twg los sis teev twg tsis muaj neeg paub; tiam sis lub sij hawm yeej yuav los.
22 Thiab tus uas txais tej yam no ces yog txais yuav kuv; thiab yuav sau lawv los rau kuv hauv lub neej no thiab lub neej nyob mus ib txhis.
23 Thiab ntxiv, yuav muaj tias tag nrho cov uas nej yuav muab ua kev cai raus dej, nej yuav tsum tso tes rau saum taub hau, thiab lawv yuav tau txais lub txiaj ntsim Vaj Ntsuj Plig Dawb Huv, thiab yuav nrhiav tej cim ntawm kuv txoj kev los, thiab yuav paub kuv.
24 Saib seb, kuv los sai sai no. Twb yog li ntawd. Amees.