Tshooj 100
Kev tshwm sim uas tus Yaj Saub Joseph Smith thiab Sidney Rigdon tau txais, nyob hauv Perrysburg, New York, lub Kaum Hli Ntuj hnub tim 12, xyoo 1833. Ob tug kwv tij, vim tau ncaim ntawm nkawd ob tsev neeg tau ob peb hnub, tau txhawj txog lawv.
1–4, Kom Joseph thiab Sidney nkawd mus tshaj tawm txoj moo zoo rau tib neeg txoj kev cawm seej; 5–8, Mam muab tej uas nkawd yuav tsum hais thaum lub sij hawm ntawd kiag; 9–12, Sidney yuav tsum ua tus cev lus thiab Joseph yuav tsum ua tus txais kev tshwm sim thiab muaj hwj chim hais lus tim khawv; 13–17, Tus Tswv yuav tsa ib haiv neeg siab dawb, thiab yuav cawm cov mloog lus dim.
1 Tus Tswv hais tseeb li no rau neb, kuv ob tug phooj ywg Sidney thiab Joseph, neb ob tsev neeg noj qab nyob zoo; lawv nyob hauv kuv txhais tes, thiab kuv yuav ua rau lawv li kuv pom zoo; vim muaj hwj chim tag nrho nyob ntawm kuv.
2 Yog li ntawd, coj raws li kuv, thiab mloog tej lus ntuas uas kuv yuav muab los rau neb.
3 Saib seb, thiab xyuas seb, kuv muaj neeg coob nyob hauv qhov chaw no, nyob hauv tej thaj tsam puag ncig no; thiab ib lub qhov rooj tij lim yuav qhib nyob hauv tej cheeb tsam puag ncig hauv thaj av sab hnub tuaj no.
4 Yog li ntawd, kuv, tus uas yog tus Tswv, tau cia neb tuaj rau hauv qhov chaw no; vim ua li no es thiaj tsim nyog rau kuv kom tib neeg txais kev cawm seej.
5 Yog li ntawd, kuv hais tseeb rau neb tias, tsa neb lub suab mus rau cov neeg no; hais tej lus uas kuv yuav muab tso rau hauv neb lub siab, ces neb yuav tsis poob ntsej muag rau neeg pom;
6 Vim yuav muab rau neb thaum lub sij hawm ntawd kiag, muaj tseeb tiag, tam sim ntawd kiag, tej uas neb yuav hais.
7 Tiam sis ib lo lus txib kuv muab rau neb, kom neb tshaj tawm txhua yam neb yuav tsum tshaj los ntawm kuv lub npe, muaj siab tiag tiag, ua lub siab mos siab muag, thaum ua txhua yam.
8 Thiab kuv muab lo lus cog tseg no rau neb tias, npaum li uas neb ua li no tus Tswv yuav txib tus Vaj Ntsuj Plig Dawb Huv los ua tim khawv txog txhua tsav txhua yam uas neb hais.
9 Thiab kuv xav tias tsim nyog uas koj, kuv tus tub qhe Sidney, yuav tsum ua ib tug cev lus rau cov neeg no; muaj tseeb tiag, kuv yuav tsa koj los ua qhov uas tus Tswv hu koj ua no, uas twb yog ua ib tug cev lus rau kuv tus tub qhe Joseph.
10 Thiab kuv yuav muab hwj chim rau nws kom muaj zog ua tim khawv.
11 Thiab kuv yuav muab hwj chim rau koj kom muaj hwj chim piav tag nrho cov vaj lug kub, kom koj ua tau ib tug cev lus rau nws, thiab nws yuav ua ib tug txais kev tshwm sim rau koj, kom koj yuav paub tseeb txog txhua yam hais txog tej ntawm kuv lub nceeg vaj nyob hauv lub ntiaj teb.
12 Yog li ntawd, neb cia li mus ntxiv thiab kom neb lub siab cia li xyiv fab; vim saib seb, thiab xyuas seb, kuv twb yuav nrog neb nyob kom txog thaum kawg.
13 Thiab nim no kuv muab ib lo lus ntsig txog Xi-oos rau neb. Yuav txhiv Xi-oos dim, txawm hais tias nws raug qhuab ntuas rau ib nyuag ntus.
14 Neb ob tug kwv tij, uas yog kuv ob tug tub qhe Orson Hyde thiab John Gould, nkawd nyob hauv kuv txhais tes; thiab npaum li uas nkawd ua raws li kuv tej lus txib ces tus Tswv yuav cawm nkawd dim.
15 Yog li ntawd, nej cia li txais kev nplij siab; vim txhua yam yuav ua hauj lwm ua ke kom zoo rau cov uas taug kev ncaj, thiab kom lub koom txoos hloov ua dawb huv.
16 Vim kuv yuav tsa ib haiv neeg huv los rau kuv, cov uas yuav ua ncaj ncees teev tiam kuv;
17 Thiab tag nrho cov uas hu txog tus Tswv lub npe, thiab ua raws li nws tej lus txib, cov ntawd yuav txais kev cawm dim. Twb yog li ntawd. Amees.