Tshooj 86
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Kaum Ob Hlis Ntuj hnub tim 6, xyoo 1832. Tau txais txoj kev tshwm sim no thaum tus Yaj Saub tab tom tshawb xyuas thiab kho cov ntawv txhais phau Npaivnpaum.
1–7, Tus Tswv qhia lub ntsiab ntawm zaj lus piv txwv txog cov nplej thiab cov txhauv; 8–11, Nws piav txog tej koob hmoov ntawm lub pov thawj hwj rau cov uas txais Vajtswv tug raws cai raws li sab cev nqaij daim tawv.
1 Tus Tswv hais tseeb rau nej uas yog kuv cov tub qhe li no, ntsig txog zaj lus piv txwv ntawm cov nplej thiab cov txhauv:
2 Saib seb, kuv hais tseeb tias, thaj teb yog lub ntiaj teb, thiab cov thwj tim yog cov uas tseb cov noob;
3 Thiab tom qab lawv tsaug zog lawm tus tsim txom lub koom txoos, tus uas muaj zog, tus neeg tso qhov tseeb tseg, tus niam ntiav, uas twb yog Npanpiloos, uas ua rau txhua haiv neeg haus ntawm nws lub khob, es tus yeeb ncuab, uas twb yog Dab Ntxwg Nyoog, zaum rawv hauv lawv lub siab kav lawv—saib seb nws tseb cov txhauv; yog li ntawd, cov txhauv tuaj laum cov nplej thiab ntiab lub koom txoos mus rau tom roob moj sab qhua.
4 Tiam sis saib seb, thaum hnub nyoog kawg, uas twb yog lub sij hawm no thaum tus Tswv twb pib coj txoj lus tawm los, thiab tej yub nplej tab tom hlob tuaj thiab tseem mos—
5 Saib seb, kuv hais tseeb rau nej tias, cov tim tswv tab tom thov tus Tswv txhua hnub thiab txhua hmo, cov uas twb npaj txhij thiab tos rawv yuav raug xa los sau tej nplej hauv tej thaj teb;
6 Tiam sis tus Tswv hais rau lawv tias, tsis txhob muab cov txhauv dob pov tseg thaum cov yub nplej tseem mos (vim nej txoj kev ntseeg tsis muaj zog), tsam nej ua rau cov nplej puas tsuaj lawm thiab.
7 Yog li ntawd, cia cov nplej thiab cov txhauv hlob tuaj ua ke kom txog thaum cov qoob loo siav siav tas lawm tso; thaum ntawd nej mam xub mus sau cov nplej tawm hauv cov txhauv los, thiab tom qab sau cov nplej tag lawm, saib seb thiab xyuas seb, yuav muab cov txhauv khi ua tej twb teg, thiab tshuav thaj teb uas yuav muab hlawv.
8 Yog li ntawd, tus Tswv hais li no rau nej, cov uas muaj lub pov thawj hwj nyob mus ntxiv los ntawm nej tej yawg koob caj ceg los—
9 Vim nej yog cov uas txais Vajtswv tug raws cai, raws li sab cev nqaij daim tawv, thiab raug muab nraim ntawm neeg ntiaj teb nrog Khetos los ntawm Vajtswv—
10 Yog li ntawd nej txoj sia thiab lub pov thawj hwj tseem muaj nyob, thiab yeej yuav tsum muaj nyob los ntawm nej thiab nej caj ceg mus kom txog lub sij hawm yuav muab txhua yam uas cov yaj saub dawb huv lub qhov ncauj tau hais txij thaum lub ntiaj teb chiv keeb los txum tim rov qab los.
11 Yog li ntawd, nej tau koob hmoov yog nej ua raws li kuv tej kev zoo mus ntxiv, ua ib lub teeb rau Lwm Haiv Neeg, thiab los ntawm lub pov thawj hwj no, ua ib tug cawm seej rau kuv haiv neeg Ixayees. Tus Tswv tau hais li. Amees.