1 Nim no, saib seb, kuv tus tub qhe Oliver Cowdery, vim tej uas koj tau xav paub ntawm kuv, kuv muab cov lus no rau koj:

2 Saib seb, kuv twb tau ua rau koj pom, los ntawm kuv tus Ntsuj Plig ntau zaus tias, tej yam koj tau sau muaj tseeb; yog li ntawd koj paub hais tias tej ntawd muaj tseeb.

3 Thiab yog koj paub hais tias tej ntawd muaj tseeb, saib seb, kuv muab ib lo lus txib rau koj tias, koj cia li vam khom rau tej yam uas twb tau muab sau cia;

4 Vim tau muab txhua yam ntsig txog lub hauv paus ntawm kuv lub koom txoos, kuv txoj moo zoo, thiab kuv lub pob zeb sau rau haud.

5 Yog li ntawd, yog koj yuav txhim tsa kuv lub koom txoos, rau saum lub hauv paus ntawm kuv txoj moo zoo thiab kuv lub pob zeb, ces tej qhov rooj ntawm ntuj txiag teb tsaus yuav kov tsis yeej koj.

6 Saib seb, neeg ntiaj teb tej kev ua phem tab tom siav; thiab yeej yuav tsum muab noob neej txhaub kom hloov siab lees txim, tag nrho cov uas yog Lwm Haiv Neeg thiab tsev neeg Ixayees thiab.

7 Yog li ntawd, vim koj tau ua kev cai raus dej los ntawm kuv tus tub qhe Joseph Smith, tus Hluas, ob txhais tes, raws li qhov uas kuv tau txib nws, nws tau ua tiav raws li qhov uas kuv txib nws.

8 Thiab nim no, tsis txhob xav tsis thoob hais tias kuv tau hu nws los mus ua raws li kuv lub hom phiaj, lub hom phiaj uas kuv yeej paub; yog li ntawd, yog hais tias nws yuav rau siab ntso ua raws li kuv tej lus txib ces nws yuav tau koob hmoov mus txais txoj sia nyob mus ib txhis; thiab nws lub npe yog Joseph.

9 Thiab nim no, Oliver Cowdery, kuv hais lus rau koj, thiab rau David Whitmer thiab, los ntawm txoj kev txib; vim saib seb, kuv txib kom tag nrho neeg qhov txhia chaw hloov siab lees txim, thiab kuv hais lus rau neb, twb zoo tib yam li tau hais rau kuv tus thwj tim Povlauj, vim tus Tswv twb siv tib txoj kev hu uas tus Tswv hu nws los hu neb.

10 Nco ntsoov tias tib neeg muaj nqis heev rau Vajtswv;

11 Vim, saib seb, tus Tswv neb tus Txhiv Dim tau raug kev tuag ntawm sab cev nqaij daim tawv; yog li ntawd nws tau raug tag nrho tib neeg tej kev mob, xwv kom tag nrho tib neeg yuav hloov siab lees txim thiab los cuag nws.

12 Thiab nws tau sawv hauv qhov tuag rov qab los, xwv kom nws yuav coj tau tag nrho tib neeg los cuag nws, yog tias lawv hloov siab lees txim.

13 Thiab nws txoj kev xyiv fab loj heev rau tus neeg uas hloov siab lees txim!

14 Yog li ntawd, tus Tswv hu neb kom mus tshaj tawm kev hloov siab lees txim rau cov neeg no.

15 Thiab txawm hais tias neb yuav khwv tag nrho neb lub neej mus tshaj tawm kev hloov siab lees txim rau cov neeg no, es coj tau ib tug neeg los cuag kuv xwb los, neb yuav muaj txoj kev xyiv fab loj nrog tus ntawd nyob hauv kuv Txiv lub nceeg vaj!

16 Thiab nim no, yog hais tias neb yuav muaj txoj kev xyiv fab loj thaum neb coj tau ib tug neeg los cuag kuv los rau hauv kuv Txiv lub nceeg vaj, ces neb yuav muaj txoj kev xyiv fab loj heev yog hais tias neb coj tau ntau tus neeg los cuag kuv!

17 Saib seb, neb muaj kuv txoj moo zoo, thiab kuv lub pob zeb, thiab kuv txoj kev cawm seej.

18 Tuav kuv lub npe thov Leej Txiv los ntawm txoj kev ntseeg, hais tias neb yuav tau txais, ces neb yuav muaj tus Vaj Ntsuj Plig Dawb Huv, tus uas yuav muab txhua yam uas tsim nyog coj los qhia tawm rau noob neej.

19 Thiab yog hais tias neb tsis muaj kev ntseeg, kev cia siab, thiab kev siab hlub, ces neb yuav tsis muaj peev xwm ua tau ib yam dab tsi li.

20 Tsis txhob tawm tsam ib lub koom txoos twg li, tsuas yog rau tus dab phem lub koom txoos xwb.

21 Cia li ris Khetos lub npe, thiab ua zoo hais qhov tseeb.

22 Thiab tag nrho cov uas hloov siab lees txim thiab ua kev cai raus dej los ntawm kuv lub npe, uas yog Yexus Khetos, thiab nyiaj mus kom txog thaum kawg, cov ntawd yuav txais kev cawm dim.

23 Saib seb, Yexus Khetos yog lub npe uas Leej Txiv tau muab, thiab tsis muaj lwm lub npe uas yuav cawm tau tib neeg.

24 Yog li ntawd, tag nrho tib neeg yuav tsum ris lub npe uas Leej Txiv tau muab rau lawv, vim Leej Txiv yuav hu lawv los ntawm lub npe ntawd thaum txog hnub kawg;

25 Yog li ntawd, yog hais tias lawv tsis paub lub npe uas Leej Txiv hu lawv, ces lawv yuav muaj tsis tau ib qho chaw nyob hauv kuv Txiv lub nceeg vaj.

26 Thiab nim no, saib seb, muaj lwm cov uas tus Tswv twb hu mus tshaj tawm kuv txoj moo zoo, mus rau Lwm Haiv Neeg thiab rau cov Neeg Yudais tib si;

27 Muaj tseeb tiag, twb yog kaum ob leeg; thiab Kaum Ob tug Thwj Tim no yuav ua kuv cov thwj tim, thiab lawv yuav ris kuv lub npe; thiab Kaum Ob tug Thwj Tim no yog cov uas xav ris kuv lub npe kawg siab kawg ntsws.

28 Thiab yog hais tias lawv xav ris kuv lub npe kawg siab kawg ntsws, ces tus Tswv twb hu lawv kom mus rau tag nrho hauv lub ntiaj teb no mus tshaj tawm kuv txoj moo zoo rau txhua tus tib neeg.

29 Thiab lawv yog cov uas kuv tau tsa los mus muab neeg ua kev cai raus dej los ntawm kuv lub npe, raws li tej uas tau muab sau cia;

30 Thiab neb muaj tej uas tau muab sau cia nyob ntawm ko; yog li ntawd, neb yuav tsum ua kom raws li cov lus uas tau muab sau cia.

31 Thiab nim no kuv hais lus rau nej, Kaum Ob tug Thwj Tim—Saib seb, kuv lub hwj chim yeej txaus rau nej lawm; nej yuav tsum taug kev ncaj rau kuv pom thiab tsis txhob ua txhaum.

32 Thiab, saib seb, nej yog cov uas kuv tau tsa los mus tsa tej pov thawj thiab tej xib hwb; los mus tshaj tawm kuv txoj moo zoo, raws li tus Vaj Ntsuj Plig Dawb Huv lub hwj chim uas nyob hauv nej, thiab raws li Vajtswv txoj kev hu thiab tej txiaj ntsim uas muab rau neeg;

33 Thiab kuv, Yexus Khetos, nej tus Tswv thiab nej tus Vajtswv, tau hais li.

34 Tej lus no tsis yog los ntawm tib neeg los yog ib tug neeg twg, tiam sis yog los ntawm kuv; yog li ntawd, nej yuav tsum ua tim khawv tias tej no yog los ntawm kuv thiab tsis los ntawm tib neeg;

35 Vim twb yog kuv lub suab uas hais tej no rau nej; vim tau muab tej no rau nej los ntawm kuv tus Ntsuj Plig, thiab los ntawm kuv lub hwj chim nej ib tug thiaj muaj peev xwm nyeem tau rau ib tug; thiab nej yuav tsis tau tej no yog hais tias tsis yog los ntawm kuv lub hwj chim los;

36 Yog li ntawd, nej muaj peev xwm ua tim khawv tias nej tau hnov kuv lub suab, thiab paub kuv tej lus.

37 Thiab nim no, saib seb, kuv txib neb, Oliver Cowdery, thiab David Whitmer thiab, hais tias neb yuav tsum mus nrhiav Kaum Ob tug Thwj Tim, cov uas yuav muaj tej kev xav tau li tej uas kuv tau hais;

38 Thiab los ntawm lawv tej kev xav tau thiab tej yam lawv ua ces neb yuav paub tau lawv.

39 Thiab thaum neb nrhiav tau lawv neb yuav tsum muab tej yam no qhia rau lawv.

40 Thiab neb yuav txhos caug ntua thiab teev tiam Leej Txiv los ntawm kuv lub npe.

41 Thiab neb yuav tsum tshaj tawm mus rau neeg ntiaj teb, hais tias: Nej cia li hloov siab lees txim thiab los ua kev cai raus dej, los ntawm Yexus Khetos lub npe;

42 Vim tag nrho txhua tus neeg yuav tsum hloov siab lees txim thiab ua kev cai raus dej, thiab tsis yog cov txiv neej xwb, tiam sis cov poj niam, thiab cov me nyuam uas muaj hnub nyoog paub tab.

43 Thiab nim no, tom qab neb tau txais qhov no, neb yuav tsum ua raws li kuv tej lus txib thaum ua txhua yam tsav;

44 Thiab los ntawm neb ob txhais tes, kuv yuav ua ib txoj hauj lwm zoo kawg nkaus nyob hauv noob neej, los qhia rau lawv coob leej hais tias lawv muaj kev txhaum, xwv kom lawv yuav los hloov siab lees txim, thiab xwv kom lawv yuav los rau ntawm kuv Txiv lub nceeg vaj.

45 Yog li ntawd, tej koob hmoov uas kuv muab rau neb yeej zoo tshaj txhua yam.

46 Thiab tom qab uas neb tau txais qhov no, yog tias neb tsis ua raws li kuv tej lus txib ces yuav cawm tsis tau neb dim nyob hauv kuv Txiv lub nceeg vaj.

47 Saib seb, kuv, Yexus Khetos, neb tus Tswv thiab neb tus Vajtswv, thiab neb tus Txhiv Dim, tau hais li ntawd los ntawm kuv tus Ntsuj Plig lub hwj chim los. Amees.