Tshooj 118
Kev tshwm sim uas tus Yaj Saub Joseph Smith tau txais, nyob hauv Far West, Missouri, lub Xya Hli Ntuj hnub tim 8, xyoo 1838, los teb rau tej lus thov tias, “Auj tus Tswv, qhia koj lub siab nyiam rau peb ntsig txog Kaum Ob tug Thwj Tim.”
1–3, Tus Tswv mam nrhiav noj nrhiav haus rau Kaum Ob tug Thwj Tim tej tsev neeg; 4–6, Tus Tswv muab neeg pauv tej chaw seem nyob hauv Kaum Ob tug Thwj Tim.
1 Tus Tswv hais tseeb li no tias: Cia li tsa ib lub rooj sab laj sai sai no; muab Kaum Ob tug Thwj Tim tsa ua ib pawg; thiab yuav tsum muab cov txiv neej tsa los pauv tej chaw ntawm cov uas tau poob lawm.
2 Cia kuv tus tub qhe Thomas nyob ib ntus hauv thaj av Xi-oos, es luam kuv txoj lus tawm.
3 Cia cov seem tshuav tshaj tawm txoj moo zoo mus ntxiv txij lub sij hawm ntawd mus, thiab yog hais tias lawv yuav ua qhov no nrog tag nrho kev txo siab txo ntsws, ua siab mos siab muag thiab txo hwj chim, thiab ua siab ntev, kuv, tus uas yog tus Tswv, muab kev cog lus rau lawv hais tias kuv mam nrhiav noj nrhiav haus rau lawv tsev neeg; thiab ib lub qhov rooj tij lim yuav qhib rau lawv, txij no mus.
4 Thiab lub caij nplooj ntoo hlav tom ntej no cia lawv mus hla cov dej hiav txwv, thiab mus tshaj tawm kuv txoj moo zoo, qhov uas muaj txhij txhua, nyob tid, thiab ua pov thawj rau kuv lub npe.
5 Cia lawv ncaim ntawm kuv haiv neeg ntseeg hauv lub nroog Far West mus, nyob rau hnub tim nees nkaum rau ntawm lub Plaub Hlis Ntuj tom ntej no, nyob ntawm qhov chaw yuav txhim tsa kuv lub tsev, tus Tswv hais li.
6 Cia kuv tus tub qhe John Taylor, thiab kuv tus tub qhe John E. Page, thiab kuv tus tub qhe Wilford Woodruff, thiab kuv tus tub qhe Willard Richards, los txum rau cov uas tau poob mus lawm tej chaw, thiab qhia kom lawv paub txog lawv txoj hauj lwm.