Tshooj 110
Tej kev ua yog toog pom kev tshwm sim los rau tus Yaj Saub Joseph Smith thiab Oliver Cowdery nyob hauv lub tuam tsev hauv Kirtland, Ohio, lub Plaub Hlis Ntuj hnub tim 3, xyoo 1836. Lub caij nyoog yog thaum muaj kev sib ntsib Hnub Caiv. Joseph Smith zaj keeb kwm hais tias: “Thaum tav su dua, kuv tau pab ob tug lwm Thawj Tswj Hwm muab tus Tswv Pluas Hmo rau cov Ntseeg noj, uas tau txais los ntawm cov Kaum Ob tug Thwj Tim, uas hnub no yog lawv lub cib fim los coj ua nyob pem lub rooj dawb ceev hnub no. Tom qab tau ua txoj hauj lwm no rau kuv cov kwv tij, kuv tau mus rau ntawm lub rooj hais lus, tau muab tej ntaub thaiv nqis los, thiab kuv txhos caug, nrog Oliver Cowdery, sib zog thov Vajtswv ntsiag to. Tom qab thov Vajtswv tag thiab sawv los, txoj kev ua yog toog no tau qhib rau wb ob leeg.”
1–10, Tus Tswv Yehauvas tshwm sim los nrog yeeb koob thiab txais yuav lub Tuam Tsev Kirtland ua Nws lub tsev; 11–12, Mauxes thiab Eli-as nkawd tshwm sim ib tug zuj zus los thiab muab nkawd cov yawm sij thiab tej caij nyoog tso txoj cai; 13–16, Eliyas rov qab los thiab muab cov yawm sij ntawm nws lub caij nyoog raws li Malakis tau cog lus.
1 Tus Tswv muab daim ntaub thaiv tshem tawm ntawm wb lub cim xeeb mus, thiab muab wb qhov muag ntawm wb txoj kev to taub qhib.
2 Wb tau pom tus Tswv sawv ntsug nyob saum daim ntiag txiag saum lub rooj hais lus, nyob ntawm wb xub ntiag; thiab hauv qab nws ob txhais ko taw pua tseem kub, muaj xim zoo li tooj dag.
3 Nws ob lub qhov muag zoo li ib tug nplaim hluav taws; cov plaub ntawm nws lub taub hau dawb zoo li cov tseem daus; nws lub ntsej muag ci tshaj qhov lub hnub ci; thiab nws lub suab zoo li lub suab dej tsaws tsag loj loj, twb yog lub suab ntawm Yehauvas, hais tias:
4 Kuv yog tus thawj thiab tus kawg; kuv yog tus uas muaj sia nyob, kuv yog tus uas raug tua tuag; kuv yog tus sawv cev uas daws nej zaj ntawm Leej Txiv.
5 Saib seb, tus Tswv zam txim rau nej tej kev txhaum lawm; kuv pom tias nej twb huv; yog li ntawd, cia li tsa nej taub hau thiab xyiv fab.
6 Cia neb tej kwv tij lub siab ntsws cia li xyiv fab, thiab cia tag nrho kuv cov neeg lub siab cia li xyiv fab, cov tau los txhim tsa lub tsev no nrog lawv lub zog rau kuv lub npe.
7 Vim saib seb, kuv tau txais yuav lub tsev no, thiab kuv lub npe yuav nyob ntawm no; thiab kuv yuav ua kuv tus kheej tshwm sim los rau kuv cov neeg los ntawm txoj kev hlub tshua rau hauv lub tsev no.
8 Muaj tseeb tiag, kuv yuav tshwm sim los rau kuv cov tub qhe, thiab hais lus rau lawv nrog kuv tus kheej lub suab, yog hais tias kuv cov neeg yuav ua raws li kuv tej lus txib, thiab tsis txhob ua kom lub tsev dawb huv no vuab tsuab.
9 Muaj tseeb tiag lub siab ntawm ntau txhiab thiab kaum kaum txhiab leej yuav xyiv fab hlo vim tej koob hmoov uas yuav muab foom los, thiab vaj txiaj ntsim uas kuv cov tub qhe tau txais nyob hauv lub tsev no.
10 Thiab lub suab npe ntawm lub tsev no yuav nthuav mus rau pej kum teb chaws; thiab qhov no yog qhov pib ntawm txoj koob hmoov uas yuav muab nplua mias foom rau saum kuv cov neeg taub hau. Twb yog li ntawd. Amees.
11 Tom qab txoj kev ua yog toog no xaus, rooj ntug rov qab qhib dua rau wb; thiab Mauxes tshwm sim los rau wb, thiab muab cov yawm sij ntawm txoj kev muab Ixayees sau los ua ke tim plaub ceg kaum ntiaj teb cob rau wb, thiab txoj kev coj kaum xeem tawm thaj av sab qaum teb los.
12 Tom qab qhov no, Eli-as tshwm sim los, thiab muab lub caij nyoog tso txoj cai ntawm Anplaham txoj moo zoo cob rau wb, hais tias los ntawm wb thiab wb cov tub ki txhua tiam neeg tom qab wb yuav tau koob hmoov.
13 Tom qab txoj kev ua yog toog no tau xaus, muaj dua kev ua yog toog tseem ceeb thiab muaj yeeb koob nthuav los rau wb; vim tus yaj saub Eliyas, tus uas tus Tswv coj mus saum ntuj ceeb tsheej lawm es tsis tau saj txoj kev tuag, sawv ntawm wb xub ntiag, thiab hais tias:
14 Saib seb, lub sij hawm tau los txhij tag lawm, uas Malakis lub qhov ncauj tau hais—ua tim khawv hais tias yuav xa [Eliyas] los, ua ntej hnub tseem ceeb thiab txaus ntshai heev ntawm tus Tswv yuav los—
15 Kom muab cov yawg koob lub siab tig mus rau cov me nyuam, thiab cov me nyuam mus rau cov yawg koob, nyob tsam tag nrho neeg ntiaj teb yuav raug kev foom tsis zoo—
16 Yog li ntawd, muab cov yawm sij ntawm lub caij nyoog tso txoj cai no cob rau hauv neb txhais tes; thiab los ntawm qhov no neb yuav paub hais tias twb yuav txog hnub tseem ceeb thiab txaus ntshai heev ntawm tus Tswv lawm, twb txog ntawm taw rooj.