1 Saib seb, tus Tswv nej tus Vajtswv hais li no rau nej, auj nej uas yog cov txwj laug ntawm kuv lub koom txoos, nej cia li mloog thiab hnov, thiab txais yuav kuv lub siab nyiam ntsig txog nej.

2 Vim kuv hais tseeb rau nej tias, kuv xav kom nej kov yeej lub ntiaj teb; yog li ntawd kuv yuav muaj kev khuv leej rau nej.

3 Muaj cov nyob nrog nej uas tau ua txhaum; tiam sis kuv hais tseeb, tib zaug no, rau kuv tus kheej lub yeeb koob, thiab rau txoj kev cawm cov neeg dim, kuv tau zam txim rau nej tej kev txhaum.

4 Kuv yuav muaj siab hlub tshua nej, vim kuv twb tau muab lub nceeg vaj rau nej.

5 Thiab tej yawm sij ntawm tej txuj ci uas neeg tsis paub txog lub nceeg vaj yuav tsis muab tshem tawm ntawm kuv tus tub qhe Joseph Smith, tus Hluas, mus, los ntawm tus txheej txheem kuv tau tsa, thaum nws tseem nyob, npaum li nws ua raws li kuv tej kab ke.

6 Muaj cov uas tau nrhiav kev iab liam nws yam tsis muaj paus muaj ntsis;

7 Txawm li ntawd los, nws tau ua txhaum; tiam sis kuv hais tseeb rau nej tias, kuv, tus uas yog tus Tswv, zam txim rau tej kev txhaum ntawm cov uas lees lawv tej kev txhaum rau kuv thiab thov kev zam txim, cov uas tsis tau ua txhaum txaus kom raug kev tuag.

8 Kuv cov thwj tim, nyob yav thaum ub, ib leeg nrhiav kev iab liam rau ib leeg thiab ib leeg tsis zam txim rau ib leeg nyob hauv lawv lub siab; thiab vim yog txoj kev phem no lawv thiaj raug kev txom nyem thiab kev qhuab ntuas mob heev.

9 Yog li ntawd, kuv hais rau nej tias, nej ib leeg yuav tsum zam txim rau ib leeg; vim tus uas tsis zam txim rau nws tus kwv tij tej kev txhaum yuav raug txim nyob ntawm tus Tswv xub ntiag; vim tus ntawd yog tus uas muaj kev txhaum loj dua.

10 Kuv, tus uas yog tus Tswv, yuav zam txim rau tus uas kuv pom zoo zam txim rau, tiam sis nej yuav tsum zam txim rau txhua tus neeg.

11 Tsim nyog nej hais hauv nej lub siab tias—cia Vajtswv txiav txim rau ntawm kuv thiab koj, thiab muab nqi zog rau koj raws li tej uas koj ua.

12 Thiab tus uas tsis hloov siab lees txim rau nws tej kev txhaum, thiab tsis lees tej ntawd, nej yuav tsum coj tuaj rau cov ntseeg, thiab ua rau nws raws li vaj lug kub hais rau nej, txawm yog los ntawm kev txib los sis ntawm kev tshwm sim.

13 Thiab nej yuav tsum ua li no kom Vajtswv thiaj tau yeeb koob—tsis yog tias nej tsis zam txim, tsis muaj kev khuv leej, tiam sis kom nej yuav tsis muaj txim raws li txoj kev cai qhia, kom nej thiaj tsis ua txhaum tus uas muab kev cai rau nej—

14 Kuv hais tseeb tias, vim yog lub hom phiaj no nej yuav tsum ua tej yam no.

15 Saib seb, kuv, tus uas yog tus Tswv, tau chim siab rau tus uas yog kuv tus tub qhe Ezra Booth, thiab kuv tus tub qhe Isaac Morley thiab, vim nkawd tsis ua raws li txoj kev cai, thiab tsis ua raws li lo lus txib;

16 Nkawd nrhiav kev ua phem nyob hauv nkawd ob lub siab, thiab kuv, tus uas yog tus Tswv, cheem kuv tus Ntsuj Plig. Nkawd muab lub txim phem txiav rau qhov uas twb tsis phem; txawm li ntawd los kuv tau zam txim rau kuv tus tub qhe Isaac Morley.

17 Thiab kuv tus tub qhe Edward Partridge thiab, saib seb, nws tau ua txhaum, thiab Dab Ntxwg Nyoog nrhiav kev ua kom nws tus ntsuj plig puas tsuaj; tiam sis thaum lub Koom Txoos cov thawj coj qhia tej yam no rau lawv, thiab lawv hloov siab lees txim rau txoj kev phem, ces tus Tswv yuav zam txim rau lawv.

18 Thiab nim no, kuv hais tseeb tias kuv xav tias tsim nyog kom kuv tus tub qhe Sidney Gilbert, tom qab ob peb lim tiam, rov qab mus ua nws txoj hauj lwm, thiab mus ua tus sawv cev nyob hauv thaj av Xi-oos;

19 Thiab muab tej nws tau pom thiab tau hnov ua rau kuv cov thwj tim paub, kom lawv thiaj tsis piam sij. Thiab vim lub hom phiaj no kuv thiaj tau hais tej yam no.

20 Thiab ntxiv, kuv hais rau nej tias, xwv kom kuv tus tub qhe Isaac Morley yuav tsis raug ntxias tshaj qhov uas nws muaj peev xwm ris, thiab kom txhob ntuas yuam kev mob nej, kuv tau muab lus txib kom muab nws thaj teb muag.

21 Kuv tsis xav kom kuv tus tub qhe Frederick G. Williams muab nws thaj teb muag, vim, kuv, tus uas yog tus Tswv, xav tseg ib qho chaw ruaj khov nyob hauv thaj av Kirtland, kom muaj tsib xyoos, nyob rau lub sij hawm uas kuv yuav tsis ntxeev cov neeg phem, kom kuv thiaj li yuav cawm tau ib txhia.

22 Thiab tom qab lub sij hawm ntawd, kuv, tus uas yog tus Tswv, yuav tsis suav ib tug twg muaj txim yog lawv yuav qhib siab mus lawm pem thaj av Xi-oos; vim kuv, tus uas yog tus Tswv, yeej yuav tsum muaj noob neej lub siab.

23 Saib seb, lub sij hawm no hu ua hnub no mus txog thaum Neeg Leej Tub los, thiab tseeb tiag yog ib hnub ntawm kev txi, thiab ib hnub ntawm kuv cov neeg txoj kev them ib feem kaum; vim tus uas them ib feem kaum yuav tsis raug kub hnyiab thaum nws los.

24 Vim tom qab hnub no ces kev kub hnyiab yuav los—qhov no yog hais lus raws li tus Tswv hais—vim kuv hais tseeb tias, tag kis tag nrho cov muab hlob thiab lawv cov uas ua phem yuav zoo li tej quav nyab npleg; thiab kuv yuav muab lawv hlawv, vim kuv yog Ib Tsoom Tub Rog tus Tswv; thiab kuv yuav tsis tseg ib tug li uas tseem nyob hauv Npanpiloos.

25 Yog li ntawd, yog nej ntseeg kuv, nej yuav khwv thaum tseem hu tias yog hnub no.

26 Thiab tsis tsim nyog uas kuv ob tug tub qhe, Newel K. Whitney thiab Sidney Gilbert, yuav muag nkawd lub tsev muag khoom thiab nkawd tej khoom ntawm no; vim qhov no tsis yog tswv yim kom txog thaum cov seem tshuav ntawm cov ntseeg, uas tseem nyob hauv qhov chaw no, mus lawm nram thaj av Xi-oos tso.

27 Saib seb, twb hais nyob hauv kuv tej kev cai, los yog txwv tsis pub, kom mus tiv nqi rau nej cov yeeb ncuab;

28 Tiam sis saib seb, twb tsis tau hais ib zaug twg hais tias tus Tswv yuav tsis muab thaum twg nws xav muab, thiab them raws li nws pom zoo.

29 Yog li ntawd, vim nej yog cov neeg sawv cev, nej tab tom ua tus Tswv tej dej num; thiab qhov uas nej ua raws li tus Tswv lub siab nyiam ces qhov ntawd yog tus Tswv tej hauj lwm.

30 Thiab nws tau tsa nej los nrhiav noj nrhiav haus rau nws haiv neeg ntseeg nyob hauv hnub nyoog kawg no, kom lawv yuav tau txais qub txeeg qub teg nyob hauv thaj av Xi-oos.

31 Thiab saib seb, kuv, tus uas yog tus Tswv, tshaj tawm rau nej, thiab kuv tej lus yeej tseeb thiab yuav tsis ploj mus, hais tias lawv yeej yuav tau qub txeeg qub teg ntawd.

32 Tiam sis txhua yam yuav tsum tshwm sim los thaum txog lub sij hawm.

33 Yog li ntawd, tsis txhob nkees ua tej yam zoo, vim nej tab tom teeb lub hauv paus ntawm ib txoj hauj lwm tseem ceeb. Thiab los ntawm tej yam me yuav muaj tej yam uas loj tawm los.

34 Saib seb, tus Tswv yeej yuav tsum muaj neeg lub siab thiab kev txaus siab ua; thiab cov uas txaus siab ua thiab mloog lus yuav noj tej uas zoo ntawm thaj av Xi-oos thaum hnub nyoog kawg no.

35 Thiab tus Tswv yuav muab cov ntxeev siab txiav tawm ntawm thaj av Xi-oos mus, thiab yuav xa lawv tawm mus, thiab lawv yuav tsis tau txais thaj av ua lawv tug.

36 Vim, kuv hais tseeb tias cov ntxeev siab tsis yog Efala-is roj ntshav, yog li ntawd lawv yuav raug muab rho tshem tawm.

37 Saib seb, kuv, tus uas yog tus Tswv, tau tsa kuv lub koom txoos nyob hauv hnub nyoog kawg no zoo li ib tug txiav txim zaum saum lub pov roob, los sis rau ib qho chaw siab, kom txiav txim rau tej haiv neeg.

38 Vim yuav muaj tias cov neeg ntawm Xi-oos yuav txiav txim rau txhua yam hais txog Xi-oos.

39 Thiab lawv yuav ua pov thawj txog cov neeg dag thiab neeg siab dag, thiab neeg yuav paub cov uas tsis yog thwj tim thiab yaj saub.

40 Thiab txawm yog tus npisov, tus uas yog ib tug txiav txim, thiab nws ob tug pab cuam los, yog lawv tsis rau siab rau lawv tej hauj lwm saib xyuas lawv yuav raug txim, thiab yuav muab lwm cov los nyob lawv chaw.

41 Vim, saib seb, kuv hais rau nej tias Xi-oos yuav vam meej, thiab tus Tswv lub yeeb koob yuav nyob hauv Xi-oos;

42 Thiab Xi-oos yuav yog ib tug chij mus rau tej neeg, thiab lawv yuav tawm hauv txhua haiv neeg hauv qab ntuj tuaj cuag nws.

43 Thiab hnub ntawd yuav los thaum tej haiv neeg hauv ntiaj teb yuav tshee hnyo vim Xi-oos, thiab yuav ntshai vim Xi-oos tej neeg txaus ntshai. Tus Tswv tau hais li. Amees.