Tshooj 45
Kev tshwm sim uas tus Yaj Saub Joseph Smith tau txais kom qhia cov Ntseeg, hauv Kirtland, Ohio, lub Peb Hlis Ntuj hnub tim 7, xyoo 1831. Zaj lus qhia ua ntej qhov ceev xwm txheej rau txoj kev tshwm sim no, Joseph Smith zaj keeb kwm hais tias “thaum lub sij hawm no hauv lub Koom Txoos … ntau cov xov xwm cuav … thiab tej dab neeg ruam, raug muab luam … thiab muab faib tawm, … los txwv kom tib neeg txhob kawm txog txoj moo zoo, los yog kom txhob txais txoj kev ntseeg … Tiam sis xyiv fab rau Haiv Neeg Ntseeg, … kuv txais zaj no.”
1–5, Khetos yog tus sawv cev uas daws peb zaj thov Leej Txiv; 6–10, Txoj moo zoo yog ib tus tub xa xov uas npaj txoj kev rau tus Tswv; 11–15, Tus Tswv txais Enauj thiab nws cov neeg mus rau Nws tus Kheej; 16–23, Khetos ua tshwm sim pom tej cim ntawm Nws txoj kev los ib yam li tau ua nyob saum lub Roob Txiv Ntoo Roj; 24–38, Tus Tswv yuav muab txoj moo zoo txum tim rov los, tej caij nyoog ntawm Lwm Haiv Neeg yuav muaj raws li tau hais, thiab kev mob puas ntsoog yuav raug tag nrho rau hauv thaj av; 39–47, Tej cim, tej txuj ci uas xav tsis thoob, thiab txoj Kev Sawv Rov Los yuav muaj nrog txoj Kev Los Zaum Ob; 48–53, Khetos yuav sawv saum lub Roob Txiv Ntoo Roj, thiab cov Neeg Yudais yuav pom tej qhov txhab ntawm Nws ob txhais tes thiab ob txhais ko taw; 54–59, Tus Tswv yuav kav hauv hnub nyoog Milenias; 60–62, Tus Tswv qhia tus Yaj Saub kom pib txhais Phau Tshiab, qhov uas yuav ua tau tej txheej qhia tseem ceeb rau neeg paub; 63–75, Tus Tswv txib Haiv Neeg Ntseeg kom txhim tsa lub nroog Yeluxalees Tshiab thiab muab cov neeg sau los ua ke, uas txhua haiv neeg yuav los rau haud.
1 Cia li mloog, auj nej uas yog neeg ntawm kuv lub koom txoos, cov uas tau muab lub nceeg vaj rau lawm; nej cia li mloog thiab cuab pob ntseg rau tus uas tau tsim lub ntiaj teb, tus uas tau tsim lub ntuj thiab tag nrho tej uas nyob rau haud, thiab tus uas tau tsim txhua yam muaj sia, thiab txawj txav, thiab muaj nyob.
2 Thiab kuv hais ntxiv, cia li mloog kuv lub suab, tsam kev tuag yuav kov yeej nej; nyob rau teev nej tsis xav ces lub caij ntuj sov twb dhau lawm, thiab lub caij sau qoob loo tas lawm, thiab nej tus ntsuj plig tsis dim.
3 Mloog tus uas yog tus sawv cev uas daws nej zaj thov Leej Txiv, tus tab tom thov nws txog nej zaj—
4 Hais tias: Txiv, thov saib tej kev txom nyem thiab kev tuag ntawm tus tsis tau ua txhaum, tus uas ua rau koj zoo siab heev; thov saib cov ntshav ntawm koj Leej Tub uas tau nrog, cov ntshav ntawm tus uas koj tau muab txi kom koj tus kheej yuav tau yeeb koob.
5 Yog li ntawd, Leej Txiv, thov tseg kuv cov kwv tij no uas ntseeg kuv lub npe, xwv kom lawv yuav los cuag kuv thiab tau txoj sia uas kav ib txhis.
6 Cia li mloog, auj nej uas yog neeg ntawm kuv lub koom txoos, thiab nej uas yog txwj laug cia li mloog ua ke, thiab cia li hnov kuv lub suab thaum tseem hu tias yog hnub no, thiab tsis txhob ua nej lub siab tawv qhawv;
7 Vim kuv hais tseeb rau nej tias kuv yog Alafas thiab Aumenkas, qhov chiv keeb thiab qhov kawg, txoj kev kaj thiab txoj sia ntawm neeg ntiaj teb—txoj kev kaj uas ci nyob hauv qhov tsaus ntuj thiab qhov tsaus ntuj tsis to taub txoj kev kaj ntawd.
8 Kuv tau los rau kuv cov neeg, thiab kuv cov neeg tau tsis txais yuav kuv; tiam sis tag nrho cov uas tau txais yuav kuv, kuv tau muab hwj chim rau lawv kom ua tau tej txuj ci tseem ceeb ntau, thiab hloov los ua Vajtswv cov tub; thiab kuv muab hwj chim rau cov uas ntseeg kuv lub npe kom tau txoj sia nyob mus ib txhis.
9 Thiab twb yog li ntawd kuv thiaj tau xa kuv txoj kev khi lus uas kav ib txhis los rau hauv ntiaj teb, los ua ib lub teeb rau neeg ntiaj teb, thiab los ua ib tug yam ntxwv rau kuv cov neeg, thiab rau Lwm Haiv Neeg los nrhiav, thiab los ua ib tug tub xa xov ua kuv ntej los npaj txoj kev rau kuv.
10 Yog li ntawd, nej cia li los cuag kuv txoj kev khi lus, thiab rau tus uas los ces kuv yuav tawm tswv yim nrog tus ntawd zoo li nrog cov neeg thaum ub, thiab kuv yuav muab qhov kuv pom meej meej tias yog vim li cas qhia rau nej.
11 Yog li ntawd, nej cia li mloog ua ke thiab cia kuv qhia kuv lub tswv yim rau nej—lub tswv yim ntawm tus uas nej hais tias yog tus Vajtswv ntawm Enauj thiab nws cov kwv tij,
12 Cov uas raug muab tshem hauv lub ntiaj teb no mus lawm, thiab tau txais los rau kuv tus kheej—ib lub nroog tshwj tseg kom txog ib hnub uas ncaj ncees yuav los—ib hnub uas tag nrho cov neeg dawb huv tau nrhiav, thiab lawv nrhiav tsis pom vim tej kev phem thiab tej kev qias;
13 Thiab lees tias lawv yog neeg qhua thiab cov pej kum hauv ntiaj teb no;
14 Tiam sis tau ib txoj kev cog lus hais tias lawv yuav nrhiav tau nws thiab pom nws thaum lawv muaj cev nqaij daim tawv.
15 Yog li ntawd, cia li mloog thiab kuv yuav tawm tswv yim nrog nej, thiab kuv yuav hais lus rau nej thiab qhia tej yuav muaj los yav tom ntej, zoo li ua rau cov neeg thaum ub.
16 Thiab kuv yuav qhia meej meej txog tej lus no li kuv tau qhia tej no rau kuv cov thwj tim thaum kuv tseem nyob nrog lawv ntawm sab nqaij daim tawv, thiab tau hais lus rau lawv, hais tias: Vim nej tau nug kuv ntsig txog tej cim ntawm kuv txoj kev los, nyob rau hnub kuv yuav los saum tej huab saum ntuj los nrog kuv lub yeeb koob, kom muaj raws li tej kev cog lus uas kuv tau cog rau nej cov yawg koob,
17 Vim nej tau suav hais tias lub caij ntev uas nej lub cev tsis muaj nej tus ntsuj plig yog kev ua qhev, kuv yuav muab qhia rau nej saib hnub txhiv dim yuav los zoo li cas, thiab txoj kev txum tim rov qab los ntawm Ixayees uas tau tawg khiav ri niab thiab.
18 Thiab nim no nej pom lub tuam tsev no uas nyob hauv Yeluxalees, uas nej hu ua Vajtswv lub tsev, thiab nej cov yeeb ncuab hais tias lub tsev no yuav tsis puas tsuaj ib zaug li.
19 Tiam sis, kuv hais tseeb rau nej tias, kev puas ntsoog yuav los rau tiam neeg no ib yam li tub sab tuaj hmo ntuj, thiab cov neeg no yuav raug puas tsuaj thiab tawg khiav ri niab mus xyaw txhua haiv neeg.
20 Thiab lub tuam tsev uas ziag no nej pom yuav raug muab tsoo vau tag tsis tshuav ib lub zeb tsuam ib lub.
21 Thiab yuav muaj tias, tiam neeg Yudais no yuav tsis dhau mus kom txog thaum txhua txoj kev puas ntsoog uas kuv tau qhia rau nej ntsig txog lawv yuav muaj los tso.
22 Nej hais tias nej paub tias twb yuav txog hnub kawg ntawm lub ntiaj teb; nej kuj hais tias nej paub tias lub ntuj thiab lub ntiaj teb yuav dhau mus;
23 Thiab txog qhov no nej hais tseeb, vim yuav muaj li ntawd; tiam sis tej yam no uas kuv tau qhia rau nej yuav tsis dhau mus kom txog thaum txhua yam yuav muaj raws li hais tso.
24 Thiab kuv tau qhia qhov no rau nej ntsig txog Yeluxalees; thiab thaum hnub ntawd los, ib co seem tshuav yuav raug tawg khiav ri niab mus nyob xyaw txhua haiv neeg;
25 Tiam sis tus Tswv yuav muab lawv sau los ua ke dua; tiam sis lawv yuav nyob li ntawd kom txog thaum lub caij nyoog ntawm Lwm Haiv Neeg muaj raws li hais tso.
26 Thiab nyob rau hnub ntawd yuav hnov txog tej kev ua rog thiab lus paj lus cua txog kev ua rog, thiab tag nrho ntiaj teb yuav ntxhov hnyo, thiab tib neeg lub siab yuav poob tag, thiab lawv yuav hais tias Khetos ncua nws txoj kev los kom txog qhov kawg ntawm lub ntiaj teb tso.
27 Thiab txoj kev hlub ntawm tib neeg yuav tu zuj zus, thiab kev ua phem yuav muaj ntau ntau.
28 Thiab thaum lub caij nyoog ntawm Lwm Haiv Neeg los txog lawm, qhov kaj yuav tawm plaws hauv lawv cov uas zaum hauv qhov tsaus los, thiab qhov ntawd yuav yog qhov txhij txhua ntawm kuv txoj moo zoo;
29 Tiam sis lawv tsis txais qhov txhij txhua ntawd; vim lawv tsis to taub qhov kaj, thiab lawv tig lawv lub siab ntawm kuv mus vim yog tib neeg tej lus qhuab qhia.
30 Thiab nyob rau tiam neeg ntawd lub caij nyoog ntawm Lwm Haiv Neeg yuav muaj raws li tau hais.
31 Thiab yuav muaj neeg nyob tiam ntawd, uas yuav tsis dhau mus kom txog thaum lawv pom ib txoj kev mag nplawm ntau heev tso; vim kev mob puas ntsoog yuav raug tag nrho rau hauv thaj av.
32 Tiam sis kuv cov thwj tim yuav sawv hauv tej chaw dawb huv, thiab yuav tsis txav; tiam sis nyob hauv cov neeg phem, neeg yuav tsa lawv lub suab thiab foom phem rau Vajtswv thiab tuag mus.
33 Thiab kuj yuav muaj av qeeg nyob ntau qhov chaw, thiab ntau txoj kev puas ntsoog; txawm li ntawd los neeg yuav ua lawv lub siab tawv qhawv rau kuv, thiab lawv yuav nkaus hlo rab ntaj, ib leeg tawm tsam ib leeg, thiab lawv ib leeg yuav tua ib leeg.
34 Thiab nim no, thaum kuv uas yog tus Tswv tau hais tej lus no rau kuv cov thwj tim, ua rau lawv nyuaj siab.
35 Thiab kuv hais rau lawv tias: Tsis txhob nyuaj siab, vim, thaum tag nrho tej yam no yuav muaj los, nej yuav paub tias tej kev cog lus uas tau cog rau nej lawm yuav muaj raws li hais.
36 Thiab thaum qhov kaj yuav pib tawm tuaj, yuav nyob nrog lawv zoo li ib zaj lus piv txwv uas kuv yuav qhia rau nej—
37 Nej ntsia thiab pom tej ntoo cev, thiab nej pom ntawm nej lub qhov muag, thiab nej hais thaum lawv pib hlav kaus tuaj, thiab lawv tej nplooj tseem mos tias, twb yuav txog lub caij ntuj so lawm;
38 Twb yuav zoo ib yam li ntawd hnub uas lawv yuav pom tag nrho tej yam no, thaum ntawd lawv yuav paub hais tias twb yuav txog lub sij hawm lawm.
39 Thiab yuav muaj tias tus uas hwm kuv yuav tos ntsoov rau hnub tseem ceeb ntawm tus Tswv txoj kev los, yuav nrhiav tej cim ntawm Neeg Leej Tub txoj kev los.
40 Thiab lawv yuav pom tej cim thiab tej txuj ci uas xav tsis thoob, vim yuav muab tej ntawd ua kom pom nyob saum ntuj, thiab nyob hauv ntiaj teb.
41 Thiab lawv yuav pom ntshav, thiab hluav taws, thiab pa taws.
42 Thiab ua ntej hnub ntawm tus Tswv yuav los, lub hnub yuav tsaus nti, thiab lub hli yuav hloov mus ua ntshav, thiab tej hnub qub yuav poob saum ntuj los.
43 Thiab yuav muab cov seem tshuav sau los rau qhov chaw no;
44 Thiab thaum ntawd lawv yuav nrhiav kuv, thiab, saib seb, kuv yuav los; thiab lawv yuav pom kuv nrog tej huab saum ntuj, muaj hwj chim thiab yeeb koob loj; nrog tag nrho cov tim tswv dawb huv; thiab tus tsis zov tos kuv ces yuav raug muab txiav tawm.
45 Tiam sis ua ntej tus Tswv txhais npab viag los, ib tug tim tswv yuav tshuab nws lub raj hlau, thiab haiv neeg ntseeg uas tsaug zog yuav sawv los mus ntsib kuv saum cov huab.
46 Yog li ntawd, yog hais tias nej tau kaj siab tsaug zog ces nej tau koob hmoov; vim ib yam li ziag no nej pom kuv thiab paub tias muaj kuv, ces nej yuav los cuag kuv thiab nej tej ntsuj plig yuav muaj sia nyob, thiab nej txoj kev txhiv dim yuav zoo tag nrho; thiab cov ntseeg yuav los puag tim plaub ceg kaum ntuj los.
47 Tom qab ntawd tus Tswv txhais npab yuav viag los rau tej haiv neeg.
48 Thiab tom qab ntawd tus Tswv yuav los sawv saum lub roob no, thiab lub roob yuav tawg rhe ua ob sab, thiab lub ntiaj teb yuav tshee hnyo, thiab yuav dov mus dov los, thiab lub ntuj kuj yuav co nto thiab.
49 Thiab tus Tswv yuav tawm nws lub suab, thiab tag nrho cov neeg thoob ntiaj teb yuav hnov lub suab; thiab tej haiv neeg hauv ntiaj teb yuav quaj ntsuag, thiab cov uas tau luag hnyos yuav pom lawv tej kev ruam.
50 Thiab kev puas tsuaj yuav los npog cov neeg uas thuam, thiab cov neeg uas cem yuav raug kub hnyiab; thiab cov uas nrhiav kev ua phem yuav raug muab ntov thiab muab pov rau hauv hluav taws.
51 Thiab tom qab ntawd cov Neeg Yudais yuav ntsia kuv thiab hais tias: Qhov txhab ntawm koj ob txhais tes thiab koj ob txhais taw no yog dab tsi?
52 Thaum ntawd lawv yuav paub hais tias kuv yog tus Tswv; vim kuv yuav hais rau lawv tias: Tej qhov txhab no yog tej qhov txhab uas kuv tau raug mob nyob hauv kuv cov phooj ywg lub tsev. Kuv yog tus raug muab dai. Kuv yog Yexus tus uas raug muab ntsia rau saum ntoo khaub lig. Kuv yog Vajtswv Leej Tub.
53 Thiab thaum ntawd lawv yuav quaj vim yog lawv tej kev ua phem; thaum ntawd lawv yuav quaj nyiav vim lawv tau tsim txom lawv tus vaj ntxwv.
54 Thiab thaum ntawd tej haiv neeg uas tsis hwm Vajtswv yuav txais kev txhiv dim, thiab lawv cov tsis paub txoj kev cai yuav muaj feem ntawm thawj txoj kev sawv rov los; thiab lawv yuav nyiaj taus.
55 Thiab Dab Ntxwg Nyoog yuav raug muab khi, kom nws yuav tsis muaj chaw nyob hauv noob neej lub siab.
56 Thiab nyob rau hnub ntawd, thaum kuv yuav los nrog kuv lub yeeb koob, ces yuav muaj raws li zaj lus piv txwv uas kuv tau hais txog kaum tus hluas nkauj.
57 Vim lawv cov uas muaj tswv yim thiab tau txais qhov tseeb, thiab tau cia tus Vaj Ntsuj Plig Dawb Huv ua lawv tus coj kev, thiab tsis tau raug dag ntxias—kuv hais tseeb rau nej tias, lawv yuav tsis raug muab ntov kom vau thiab muab pov rau hauv hluav taws, tiam sis yuav tiv taus hnub ntawd.
58 Thiab yuav muab lub ntiaj teb rau lawv ua qub txeeg qub teg; thiab lawv yuav huaj vam thiab muaj zog zuj zus tuaj, thiab lawv cov me nyuam yuav loj hlob tsis muaj kev txhaum los mus rau kev cawm seej.
59 Vim tus Tswv yuav nyob nrog nraim lawv; thiab nws lub yeeb koob yuav nyob rau saum lawv, thiab nws yuav ua lawv tus vaj ntxwv thiab tus uas muab kev cai rau lawv.
60 Thiab nim no, saib seb, kuv hais rau nej tias, yuav tsis cia rau nej paub ntxiv ntsig txog tshooj no, kom txog thaum muab Phau Tshiab txhais lawm tso, thiab yuav muab tag nrho tej yam no qhia nyob rau haud;
61 Yog li ntawd kuv cia rau koj ziag no kom koj muab Phau Tshiab txhais, kom koj yuav npaj txhij rau tej yam uas yuav los.
62 Vim kuv hais tseeb rau nej tias, tej yam tseem ceeb tos ntsoov nej;
63 Nej twb hnov txog kev ua rog nyob tim tej pej kum teb; tiam sis, saib seb, kuv hais rau nej tias, kev ua rog twb ze lawm, twb txog ntawm nej tej qhov rooj lawm, thiab txij hnub no mus tsis ntau xyoo ces nej yuav hnov txog kev ua rog hauv nej thaj av.
64 Yog li ntawd, kuv, tus uas yog tus Tswv, tau hais lawm tias, nej cia li sib sau tawm tim tej teb chaws sab hnub tuaj, nej cov txwj laug ntawm kuv lub koom txoos, nej cia li sib txoos nej tus kheej los ua ke; nej cia li mus lawm tim tej teb chaws sab hnub poob, hu kom tej neeg hloov siab lees txim, thiab npaum li uas lawv hloov siab lees txim ces, txhim tsa tej pawg ntseeg rau kuv.
65 Thiab nrog ib lub siab thiab ib lub ntsws, cia li sau nej tej nyiaj txiag los kom nej yuav muas tau ib qho qub txeeg qub teg uas tom qab no mus yuav muab rau nej.
66 Thiab yuav muab qhov qub txeeg qub teg no hu ua Yeluxalees Tshiab, thaj av thaj yeeb, lub nroog nkaum chaw, qhov chaw nyab xeeb rau haiv neeg ntseeg ntawm tus Vajtswv Siab Tshaj Plaws;
67 Thiab tus Tswv lub yeeb koob yuav nyob ntawd, thiab txoj kev ntshai tus Tswv kuj yuav nyob ntawd, ua rau cov neeg phem yuav tsis tuaj rau ntawd, thiab yuav hu qhov chaw ntawd ua Xi-oos.
68 Thiab yuav muaj tias nyob hauv cov neeg phem tias, txhua tus neeg uas yuav tsis siv nws rab ntaj tawm tsam nws tus neeg zej zog yeej yuav tsum khiav mus rau hauv Xi-oos kom muaj kev nyab xeeb.
69 Thiab txhua haiv neeg hauv qab ntuj yuav sau zog mus rau qhov ntawd; thiab yuav yog tib co neeg uas ib leeg thiaj tsis ua rog rau ib leeg xwb.
70 Thiab yuav hais nyob hauv cov neeg phem tias: Cia peb tsis txhob mus tawm tsam tua Xi-oos, vim cov neeg Xi-oos txaus ntshai heev; yog li ntawd peb yuav kov tsis yeej.
71 Thiab yuav muaj tias cov neeg ncaj ncees yuav sib sau tawm hauv txhua haiv neeg los, thiab yuav los rau hauv Xi-oos, hu nkauj nrog tej nkauj xyiv fab kav ib txhis.
72 Thiab nim no kuv hais rau nej tias, ceev tej yam no tsis txhob cia tawm mus rau neeg ntiaj teb kom txog thaum kuv xav tias tsim nyog tso, kom nej yuav ua txoj hauj lwm no tiav rau cov neeg pom, thiab rau nej cov yeeb ncuab pom, kom lawv thiaj tsis paub nej tej hauj lwm kom txog thaum nej twb ua tiav yam uas kuv tau txib kom nej ua;
73 Kom thaum lawv paub, lawv thiaj yuav ua zoo xav txog tej yam no.
74 Vim thaum tus Tswv tshwm los nws yuav txaus ntshai heev rau lawv, vim kev ntshai yuav tsuam lawv, thiab lawv yuav sawv deb deb thiab tshee hnyo.
75 Thiab txhua haiv neeg yuav ntshai vim tus Tswv txoj kev txaus ntshai, thiab lub hwj chim ntawm nws lub zog. Twb yog li ntawd. Amees.