1 Cia li mloog, thiab cuab pob ntseg rau tus Tswv lub suab, auj nej cov uas tau tuaj txoos nej tus kheej ua ke, cov uas yog pov thawj hlob ntawm kuv lub koom txoos, cov uas tus Tswv tau muab lub nceeg vaj thiab lub hwj chim rau lawv.

2 Vim tus Tswv hais tseeb li no tias, kuv xav tias tsim nyog kom muab ib tug npisov tsa rau nej, los yog nyob hauv nej, los rau lub koom txoos uas nyob rau sab no ntawm tus Tswv lub vaj txiv hmab.

3 Thiab tseeb tiag nej ua qhov no raws li kev txawj ntse, vim tus Tswv kom yuav tsum ua, los ntawm txhua tus saib xyuas txhais tes, kom ceev ib zaj txog nws txoj hauj lwm saib xyuas, rau lub neej no thiab lub neej nyob mus ib txhis.

4 Vim tus Tswv suav tias tus uas rau siab ntseeg thiab muaj tswv yim hauv lub neej no yuav tsim nyog txais Leej Txiv tej chaw nyob uas tau npaj rau nws los ua nws tug.

5 Kuv hais tseeb rau nej tias, cov txwj laug ntawm lub koom txoos uas nyob rau sab no ntawm kuv lub vaj txiv hmab yuav tsum qhia ib zaj txog lawv txoj hauj lwm saib xyuas mus rau tus npisov, tus uas kuv yuav tsa nyob rau sab no ntawm kuv lub vaj txiv hmab.

6 Tej yam no yuav tsum muaj nyob hauv tej ceev xwm txheej, kom coj mus muab rau tus npisov hauv Xi-oos.

7 Thiab yuav paub tus npisov dej num los ntawm tej lus txib uas twb tau muab lawm, thiab los ntawm lub rooj sab laj lub suab.

8 Thiab nim no, kuv hais tseeb rau nej tias, kuv tus tub qhe Newel K. Whitney yog tus uas yuav tsum hu thiab tsa rau lub hwj chim no. Qhov no yog tus Tswv nej tus Vajtswv, nej tus Txhiv Dim lub siab nyiam. Twb yog li ntawd. Amees.

9 Tus Tswv txoj lus, ntxiv rau txoj kev cai uas twb tau muab lawm, qhia kom paub txog tej dej num ntawm tus npisov uas tsa rau lub koom txoos nyob rau sab no ntawm lub vaj txiv hmab, uas tseeb tiag zoo li no—

10 Los tswj tus Tswv lub tsev rau khoom; los txais tej nyiaj ntawm pawg ntseeg uas nyob rau sab no ntawm lub vaj txiv;

11 Los txais ib zaj ceev xwm txheej ntawm cov txwj laug ib yam li tau txib ua ntej lawm; thiab los muab tej uas lawv xav tau, cov uas yuav tsum them rau tej uas lawv txais, npaum li uas lawv muaj los them;

12 Kom yuav muab qhov no fij tseg rau txoj kev zoo ntawm lub koom txoos, rau cov pluag thiab cov txom nyem.

13 Thiab tus uas tsis muaj dab tsi them, yuav tsum sau ib zaj ceev xwm thiab coj mus muab rau tus npisov ntawm Xi-oos, tus uas yuav them qhov nuj nqis ntawd los ntawm tej uas tus Tswv yuav muab rau hauv nws txhais tes.

14 Thiab tej kev khwv ntawm cov uas rau siab ntseeg uas khwv ntawm sab ntsuj plig, uas qhia txoj moo zoo thiab tej yam ntawm lub nceeg vaj rau cov ntseeg, thiab rau neeg ntiaj teb, yuav them cov nuj nqis rau ntawm tus npisov hauv Xi-oos.

15 Yog li ntawd kev them nqi no yog los ntawm lub koom txoos los, vim raws li txoj kev cai txhua tus neeg uas los rau hauv Xi-oos yuav tsum muab txhua yam tso rau ntawm tus npisov hauv Xi-oos.

16 Thiab nim no, kuv hais tseeb rau nej tias, vim txhua tus txwj laug nyob rau sab no ntawm lub vaj txiv hmab yuav tsum sau ib zaj txog nws txoj hauj lwm saib xyuas mus rau tus npisov uas nyob rau sab no ntawm lub vaj txiv hmab—

17 Ib daim ntawv pov thawj los ntawm tus txiav txim los yog tus npisov uas nyob rau sab no ntawm lub vaj txiv hmab, uas xa mus rau tus npisov hauv Xi-oos, yuav qhia tias txhua tus neeg tsim nyog, thiab tau ua txhua yam tiav, kom tau qub txeeg qub teg, thiab kom tus npisov hauv Xi-oos txais tus txwj laug los ua ib tug saib xyuas uas muaj tswv yim thiab ib tug rau siab ntso khwv;

18 Yog tsis li ces tus npisov ntawm Xi-oos yuav tsis txais nws.

19 Thiab nim no, kuv hais tseeb rau nej tias, cia pawg ntseeg los sis tej pawg ntseeg pom zoo rau txhua tus txwj laug uas yuav muab ib zaj rau tus npisov ntawm lub koom txoos uas nyob rau sab no ntawm lub vaj txiv hmab, uas nws nyob haud ua hauj lwm, nws thiaj yuav ua kom lawv pom zoo tag nrho rau nws tus kheej thiab nws tej zaj lus.

20 Thiab ntxiv, cia kuv cov tub qhe uas tau tsa los ua cov saib xyuas tej ntawv sau ntawm kuv lub koom txoos muaj tug txais kev pab rau txhua yam los ntawm tus npisov los yog tej npisov—

21 Kom yuav muab tej kev tshwm sim luam tawm, thiab tawm mus kom thoob plaws lub ntiaj teb; xwv kom lawv yuav tau nyiaj los pab lub koom txoos rau txhua yam;

22 Kom lawv kuj yuav ua kom lawv tus kheej tsim nyog pom zoo tag nrho, thiab tus Tswv suav tias lawv yog cov saib xyuas uas muaj tswv yim.

23 Thiab nim no, saib seb, qhov no yuav ua ib tug yam ntxwv rau tag nrho tej pawg ntseeg ntawm kuv lub koom txoos, nyob rau txhua thaj av uas tsa muaj lawv. Thiab nim no kuv xaus kuv cov lus hais. Amees.

24 Ob peb lo lus ntxiv rau lub nceeg vaj tej kev cai, ntsig txog cov mej zeej ntawm lub koom txoos—cov uas tus Ntsuj Plig Dawb Huv txib kom mus lawm pem Xi-oos, thiab cov uas muaj cib fim mus lawm pem Xi-oos—

25 Cia lawv nqa ib daim ntawv pov thawj ntawm peb tug txwj laug ntawm lub koom txoos mus rau tus npisov, los yog ib daim ntawv pov thawj los ntawm tus npisov;

26 Yog tsis li ces yuav tsis suav tias tus uas mus rau pem thaj av Xi-oos yog ib tug saib xyuas uas muaj tswv yim. Nov kuj yog ib tug yam ntxwv. Amees.