1 Yog kuv lub siab nyiam uas lub Koom Txoos cov thawj coj yuav hu thiab tsa kuv tus tub qhe Warren A. Cowdery ua ib tug thawj pov thawj hlob saib kuv lub koom txoos, nyob hauv thaj av Freedom thiab tej thaj tsam ib puag ncig;

2 Thiab yuav tsum tshaj tawm kuv txoj moo zoo uas kav ib txhis, thiab tsa nws lub suab thiab ceeb toom cov neeg, tsis yog nyob hauv qhov chaw nws nyob xwb, tiam sis tom tej ciaj ciam av nyob ti nkaus thiab;

3 Thiab muab tag nrho nws lub sij hawm fij rau qhov uas Vajtswv hu nws ua uas tseem ceeb thiab dawb huv no, uas ziag no kuv muab rau nws, rau siab ntso nrhiav lub nceeg vaj ceeb tsheej thiab lub ntuj ntawd tej kev ncaj ncees, ces yuav muab txhua yam uas yuav tsum muaj los ntxiv; vim tus neeg khwv yeej tsim nyog tau nws nqi zog.

4 Thiab ntxiv, kuv hais tseeb rau nej tias, twb yuav txog lub sij hawm uas tus Tswv los lawm, thiab yuav ua rau neeg ntiaj teb ceeb li tus tub sab tuaj hmo ntuj—

5 Yog li ntawd, cia li muab nej tej siv sia, kom nej yuav ua cov me nyuam ntawm txoj kev kaj, thiab kom hnub ntawd yuav tsis ua rau nej ceeb li ib tug tub sab ua.

6 Thiab ntxiv, kuv hais tseeb rau nej tias, tau muaj kev xyiv fab nyob saum ntuj ceeb tsheej thaum kuv tus tub qhe Warren tau txhos caug nyo rau kuv tus cwj, thiab tau coj nws tus kheej khiav ntawm neeg tej kev dag ntxias mus;

7 Yog li ntawd, kuv tus tub qhe Warren tau koob hmoov, vim kuv yuav muaj kev hlub tshua rau nws; thiab, txawm yog muaj tej kev tsis muaj nuj nqis ntawm nws lub siab los, kuv yuav txhawb nqa nws npaum li uas nws yuav txo nws lub hwj chim rau kuv.

8 Thiab kuv yuav pub hwj chim thiab kev tso siab rau nws kom nws yuav nyob khov kho; thiab yog hais tias nws yuav ua ib tug tim khawv uas rau siab ntseeg thiab ib lub teeb rau lub koom txoos mus ntxiv ces kuv tau npaj ib lub meej mom rau nws ntoo nyob hauv kuv Txiv tej chaw nyob. Twb yog li ntawd. Amees.