Tshooj 49
Kev tshwm sim uas tus Yaj Saub Joseph Smith tau txais kom qhia Sidney Rigdon, Parley P. Pratt, thiab Leman Copley, hauv Kirtland, Ohio, lub Tsib Hlis Ntuj hnub tim 7, xyoo 1831. Leman Copley tau txais hlo txoj moo zoo tiam sis tseem ntseeg ib feem ntawm cov Shaker [cov neeg uas tshee tas thaum teev tiam Vajtswv] (United Society of Believers in Christ’s Second Appearing [Koom Haum Koom Siab ntawm Cov Ntseeg txog Khetos txoj Kev Los Zaum Ob]) tej lus qhia, uas yav tas los nws tau zwm rau. Tej yam uas cov Shaker ntseeg qhia hais tias Khetos txoj Kev Los Zaum Ob twb tshwm sim lawm thiab hais tias Nws tau tshwm los ua ib tug poj niam, Ann Lee. Lawv tsis xav tias kev cai raus dej yog ib qho tseem ceeb. Lawv tsis pub sib yuav thiab ua lub neej tsis muaj txij nkawm. Cov Shaker ib txhia kuj txwv tsis noj nqaij. Nyob hauv zaj lus qhia ua ntej txoj kev tshwm sim no, Joseph Smith zaj keeb kwm hais tias, “Kom yuav muaj kev to taub zoo dua txog qhov hais no, kuv tau nug tus Tswv, thiab txais txoj kev tshwm sim no.” Txoj kev tshwm sim no qhia tias ib co ntsiab lus uas pawg Shaker ntseeg yeej tsis yog lawm. Cov kwv tij uas tau hais txog ua ntej no tau nqa daim ntawv sau txoj kev tshwm sim no mus rau tom cov Shaker (uas nyob ze Cleveland, Ohio) thiab muab nyeem tag nrho rau lawv, tiam sis lawv tsis kam txais.
1–7, Yuav tsis paub hnub twg thiab teev twg uas Khetos yuav los kom txog thaum Nws los xwb; 8–14, Neeg yuav tsum hloov siab lees txim, ntseeg txoj moo zoo, thiab ua raws li tej kab ke thiaj tau kev cawm seej; 15–16, Kev sib yuav yog Vajtswv tsa; 17–21, Pub noj nqaij; 22–28, Xi-oos yuav vam meej thiab cov Neeg Lamas yuav tawg paj li lub paj ntshua nplaim ua ntej txoj Kev Los Zaum Ob.
1 Cia li mloog kuv txoj lus, kuv cov tub qhe Sidney, thiab Parley, thiab Leman; vim saib seb, kuv hais tseeb rau nej tias, kuv muab ib lo lus txib rau nej kom nej yuav tsum mus thiab tshaj tawm kuv txoj moo zoo uas nej tau txais, rau cov neeg Shaker, zoo tib yam li nej tau txais lawm.
2 Saib seb, kuv hais rau nej tias, lawv xav paub qhov tseeb ib txhia, tiam sis tsis yog tag nrho, vim kuv pom tias lawv tsis ncaj ncees thiab lawv yeej yuav tsum hloov siab lees txim.
3 Yog li ntawd, kuv ob tug tub qhe Sidney thiab Parley, kuv xa neb mus tshaj tawm txoj moo zoo rau lawv.
4 Thiab yuav tsum tsa kuv tus tub qhe Leman rau txoj hauj lwm no, kom nws yuav nrog lawv sib tham, tsis yog raws li tej uas nws tau txais ntawm lawv los, tiam sis raws li tej uas neb uas yog kuv ob tug tub qhe yuav qhia rau nws; thiab yog ua li ntawd ces kuv yuav foom koob hmoov rau nws, tsis li ces nws yuav tsis vam meej.
5 Tus Tswv hais li no; vim kuv yog Vajtswv, thiab tau txib kuv Tib Leeg Tub los rau hauv lub ntiaj teb los txhiv neeg ntiaj teb, thiab tau tshaj tawm hais tias tus uas txais nws ces yuav txais kev cawm dim, thiab tus uas tsis txais nws ces yuav raug txim—
6 Thiab lawv tau ua rau Neeg Leej Tub raws li lawv siab xav; thiab nws tau txais nws lub hwj chim nyob sab xis ntawm nws lub yeeb koob, thiab nim no kav nyob saum ntuj, thiab yuav kav kom txog thaum nws nqis los rau hauv lub ntiaj teb no los muab tag nrho cov yeeb ncuab tsuj nthi rau hauv nws qab xib taws, twb yuav txog lub sij hawm lawm—
7 Kuv, tus Tswv uas yog Vajtswv, tau hais li; tiam sis teev twg thiab hnub twg los tsis muaj neeg paub, thiab cov tim tswv ceeb tsheej los kuj tsis paub, thiab lawv yuav tsis paub mus txog thaum nws los.
8 Yog li ntawd, kuv xav kom tag nrho neeg sawv daws yuav hloov siab lees txim, vim tag nrho sawv daws ua txhaum, tsuas yog cov uas kuv tau tshwj tseg cia rau kuv tus kheej lawm xwb, cov neeg dawb huv uas nej tsis paub txog.
9 Yog li ntawd, kuv hais rau nej tias kuv tau xa kuv txoj kev khi lus uas kav ib txhis los rau nej, qhov uas muaj txij thaum chiv keeb los.
10 Thiab qhov uas kuv tau cog lus kuv twb tau ua raws li ntawd, thiab tej haiv neeg hauv ntiaj teb no yuav hwm qhov ntawd; thiab yog tsis ua li ntawd lawv tus kheej, lawv yuav poob, vim tus uas nim no tau tsa nws tus kheej sawv ces yuav raug muab hwj chim txo kom qis.
11 Yog li ntawd, kuv muab ib lo lus txib rau nej tias nej cia li mus lawm tim cov neeg no, zoo li kuv tus thwj tim thaum ub, uas npe hu ua Petus, thiab hais rau lawv tias:
12 Cia li ntseeg tus Tswv Yexus lub npe, tus uas tau nyob hauv ntiaj teb no, thiab tseem yuav los, tus uas yog qhov chiv keeb thiab qhov kawg;
13 Hloov siab lees txim thiab ua kev cai raus dej los ntawm Yexus Khetos lub npe, raws li lo lus txib dawb huv, rau txoj kev zam txim rau tej kev txhaum;
14 Thiab tus uas ua li no yuav tau txais lub txiaj ntsim Vaj Ntsuj Plig Dawb Huv, los ntawm kev tso tes rau saum taub hau los ntawm cov txwj laug ntawm lub koom txoos.
15 Thiab ntxiv, kuv hais tseeb rau nej tias, tus uas txwv tsis pub neeg sib yuav ces tsis yog Vajtswv tsa, vim kev sib yuav yog Vajtswv tsa los rau neeg.
16 Yog li ntawd, yeej raws li txoj cai yog nws muaj ib tug poj niam, thiab nkawd ob leeg yuav koom ua ib lub cev, thiab muaj tag nrho tej no xwv kom yuav muaj raws li lub hom phiaj ntawm txoj kev tsim lub ntiaj teb;
17 Thiab xwv kom lub ntiaj teb yuav muaj tib neeg nyob puv nkaus, raws li txoj kev tsim tib neeg ua ntej ntuj tsim teb raug.
18 Thiab tus uas txwv tsis pub noj nqaij, hais tias neeg yuav tsum tsis txhob noj nqaij thiab, tus ntawd tsis yog Vajtswv tsa;
19 Vim, saib seb, tej tsiaj nruab nrag thiab tej noog ya saum nruab ntug, thiab tej uas muaj los ntawm cov av, yog muab rau neeg siv ua khoom noj thiab ua khaub ncaws, thiab kom nws yuav muaj nplua mias.
20 Tiam sis tsis tau pub kom ib tug neeg yuav muaj tshaj ib tug, ua li ces neeg ntiaj teb yuav muaj kev txhaum.
21 Thiab kev txom nyem raug cov neeg uas ua tua tsiaj los yog nkim tej nqaij thaum tsis txom nyem.
22 Thiab ntxiv, kuv hais tseeb rau nej tias, Neeg Leej Tub yuav tsis muaj yam ntxwv ua ib tug poj niam los, thiab kuj yuav tsis ua ib tug txiv neej mus ncig nyob hauv lub ntiaj teb.
23 Yog li ntawd, tsis txhob raug dag ntxias, tiam sis nyob khov kho mus ntxiv, tos ntsoov rau hnub uas saum ntuj yuav co nto, thiab lub ntiaj teb yuav tshee hnyo thiab yuav dov mus dov los zoo li tus neeg qaug cawv, thiab rau thaum tej vos hav yuav sawv tuaj, thiab rau thaum tej roob yuav saus los qis, thiab rau thaum tej chaw siab thiab qis ho hloov kom tiaj tus—thiab tag nrho tej no thaum tus tim tswv yuav tshuab nws lub raj hlau.
24 Tiam sis ua ntej hnub tseem ceeb ntawm tus Tswv yuav los, Yakhauj yuav vam meej nyob tom roob moj sab qhua, thiab cov Neeg Lamas yuav tawg paj li lub paj ntshua nplaim.
25 Xi-oos yuav vam meej nyob saum tej pov roob thiab xyiv fab nyob saum tej roob, thiab yuav sib txoos ua ke mus rau qhov chaw uas kuv tau teem lawm.
26 Saib seb, kuv hais rau nej tias, cia li mus li kuv tau txib nej; hloov siab lees txim rau tag nrho nej tej kev txhaum; thov ces nej yuav tau txais; khob ces yuav qhib rau nej.
27 Saib seb, kuv yuav mus ua nej ntej thiab ua tus thaiv tom nej qab; thiab kuv yuav nrog nraim nej, thiab nej yuav tsis yuam kev.
28 Saib seb, kuv yog Yexus Khetos, thiab kuv los sai sai no. Twb yog li ntawd. Amees.