1 Tus Tswv hais tseeb li no rau koj kuv tus tub qhe Thomas: Kuv tau hnov koj tej lus thov Vajtswv; thiab tej uas koj ua zoo tau nce tuaj ua rau kuv nco ntsoov, ua tam rau koj cov kwv tij, cov uas tau xaiv ua tim khawv txog kuv lub npe thiab kom xa mus lawm puag tim ub mus rau txhua haiv neeg, txhua xeem neeg, txhua yam lus, thiab txhua yam neeg, thiab cov uas muab tsa los ntawm txoj kev siv kuv cov tub qhe yam li siv cuab yeej.

2 Kuv hais tseeb rau koj tias, tau muaj ob peb yam nyob hauv koj lub siab thiab nrog koj uas ua rau kuv, tus uas yog tus Tswv, tsis txaus siab.

3 Txawm li ntawd los, rau qhov koj tau txo koj tus kheej kom qis ces tus Tswv yuav muab koj tsa kom siab; yog li ntawd, tus Tswv zam txim rau tag nrho koj tej kev txhaum lawm.

4 Koj cia li zoo siab rau kuv pom; thiab koj yuav tsum ua pov thawj rau kuv lub npe, tsis yog mus rau Lwm Haiv Neeg xwb, tiam sis mus rau cov Neeg Yudais thiab; thiab koj yuav tsum muab kuv txoj lus xa mus kom thoob plaws lub ntiaj teb.

5 Yog li ntawd, koj yuav tsum hais lus, ib tag kis rau ib tag kis; thiab cia koj lub suab ceeb toom tawm mus rau neeg ib hnub dhau ib hnub; thiab thaum tsaus ntuj tsis txhob cia cov neeg nyob hauv lub ntiaj teb pw, vim yog koj tej lus hais.

6 Cia li ua kom neeg paub koj qhov chaw nyob hauv Xi-oos, thiab tsis txhob tsiv koj lub tsev; vim kuv, tus uas yog tus Tswv, muaj ib txoj hauj lwm tseem ceeb rau koj ua, ntawm kev tshaj tawm kuv lub npe rau noob neej.

7 Yog li ntawd, cia li muab koj tej siv sia rau txoj hauj lwm. Cia li muab koj ko taw rau khau thiab, vim tus Tswv twb xaiv koj, thiab koj txoj lw nyob saum cov roob, thiab nyob xyaw ntau haiv neeg.

8 Thiab los ntawm koj txoj lus ntau tus neeg uas siab yuav raug txo kom qis, thiab los ntawm koj txoj lus yuav muab ntau tus neeg uas qis tsa nto.

9 Koj lub suab yuav hais lus cem cov neeg ua txhaum; thiab thaum koj cem cia tus neeg taug xaiv tus nplaig tsum nws txoj kev liam sij.

10 Koj cia li txo hwj chim; thiab tus Tswv koj tus Vajtswv yuav tuav tes coj koj, thiab hais lus teb koj tej lus thov.

11 Kuv paub koj lub siab, thiab tau hnov koj tej lus thov Vajtswv txog koj cov kwv tij. Tsis txhob muab kev hlub rau lawv tshaj li muab rau lwm cov, tiam sis muab koj txoj kev hlub rau lawv ib yam li muab rau koj tus kheej; thiab muab koj txoj kev hlub ntau ntau rau txhua tus neeg, thiab rau txhua tus uas hlub kuv lub npe.

12 Thiab thov Vajtswv rau koj cov kwv tij uas yog cov Kaum Ob tug Thwj Tim. Qhuab ntuas lawv tawv qhawv rau kuv lub npe, thiab cia lawv raug qhuab ntuas rau tag nrho lawv tej kev txhaum, thiab koj yuav tsum rau siab ntseeg kuv lub npe rau kuv pom.

13 Thiab tom qab lawv tej kev ntxias, thiab kev txom nyem ntau, saib seb, kuv, tus uas yog tus Tswv, kuv yuav nrhiav lawv, thiab yog hais tias lawv tsis ua lawv lub siab tawv qhawv, thiab tsis ua lawv caj dab tawv qhawv rau kuv, lawv yuav hloov siab los ntseeg, thiab kuv yuav kho lawv kom zoo.

14 Nim no, kuv hais rau koj, thiab qhov kuv hais rau koj, kuv hais rau tag nrho Kaum Ob tug Thwj Tim tias: Cia li sawv tsees thiab muab nej tej siv sia, kwv nej tus ntoo khaub lig, coj raws li kuv, thiab pub kuv cov yaj.

15 Tsis txhob tsa nej tus kheej kom siab; tsis txhob ntxeev siab tawm tsam kuv tus tub qhe Joseph; vim kuv hais tseeb rau nej tias, kuv nrog nws, thiab kuv txhais tes yuav roos nws; thiab cov yawm sij uas kuv tau muab rau nws, thiab rau nej thiab, yuav tsis muab tshem tawm ntawm nws mus kom txog thaum kuv los.

16 Kuv hais tseeb rau koj, kuv tus tub qhe Thomas, koj yog tus neeg uas kuv tau xaiv los tuav cov yawm sij ntawm kuv lub nceeg vaj, hais txog ntawm Kaum Ob tug Thwj Tim, nyob hauv txhua haiv neeg—

17 Kom koj yuav ua kuv tus tub qhe qhib lub qhov rooj ntawm lub nceeg vaj hauv txhua qhov chaw uas kuv tus tub qhe Joseph, thiab kuv tus tub qhe Sidney, thiab kuv tus tub qhe Hyrum tuaj tsis tau;

18 Vim kuv twb tau tso lub nra ntawm tag nrho tej pawg ntseeg rau lawv tau ib nyuag ntus.

19 Yog li ntawd, txhua qhov chaw uas lawv xa koj mus, koj cia li mus, thiab kuv yuav nrog koj; thiab txhua qhov chaw uas koj yuav tshaj tawm kuv lub npe, yuav muaj ib lub qhov rooj tij lim qhib rau koj, kom lawv yuav txais kuv txoj lus.

20 Tus uas txais yuav kuv txoj lus txais yuav kuv, thiab tus uas txais yuav kuv, txais yuav cov ntawd, Thawj Pawg Thawj Tswj Hwm, uas kuv tau xa mus, cov uas kuv tau tsa ua cov pab cuam rau nej los ntawm kuv lub npe.

21 Thiab ntxiv, kuv hais rau nej tias, tus uas nej yuav xa mus los ntawm kuv lub npe, los ntawm nej cov kwv tij uas yog Kaum Ob tug Thwj Tim lub suab, uas koj tso cai thiab pom zoo, ces tus ntawd yuav muaj hwj chim qhib lub qhov rooj ntawm kuv lub nceeg vaj rau ib haiv neeg tsis hais nej yuav xa lawv mus qhov twg los yog—

22 Npaum li uas lawv yuav txo lawv hwj chim rau kuv, thiab coj raws nraim li kuv txoj lus, thiab mloog kuv tus Ntsuj Plig lub suab.

23 Kuv hais tseeb tseeb rau nej tias, kev tsaus ntuj npog lub ntiaj teb, thiab kev tsaus ntuj heev npog cov neeg lub siab, thiab txhua tus tib neeg tau hloov los ua neeg liam sij rau kuv pom.

24 Saib seb, kev pauj los sai sai rau cov neeg nyob hauv lub ntiaj teb, ib hnub ntawm kev npau taws, ib hnub ntawm kev kub hnyiab, ib hnub ntawm kev puas ntsoog, ntawm kev quaj, ntawm kev nyiav, thiab ntawm kev quaj ntsuag; thiab zoo li khaub zig cua kev pauj yuav los rau thoob plaws lub ntiaj teb tag nrho, tus Tswv hais li.

25 Thiab yuav pib ntawm kuv tsev neeg, thiab yuav tawm ntawm kuv tsev neeg mus, tus Tswv hais li;

26 Ua ntej yog nyob hauv cov uas nyob hauv nej, tus Tswv hais li, cov hais tias lawv paub kuv lub npe tiam sis twb tsis tau paub kuv, thiab tau hais lus saib tsis taus kuv nyob hauv kuv tsev neeg, tus Tswv hais li.

27 Yog li ntawd, xyuas kom nej tsis txhob ua rau nej tus kheej nyuaj siab ntsig txog tej xwm ntawm kuv lub koom txoos nyob hauv qhov chaw no, tus Tswv hais li.

28 Tiam sis cia li ua kom nej lub siab dawb huv rau kuv pom; ces tom qab ntawd nej cia li mus kom thoob plaws lub ntiaj teb, thiab tshaj tawm kuv txoj moo zoo rau txhua tus neeg uas tsis tau txais txoj moo zoo;

29 Thiab tus uas ntseeg thiab ua kev cai raus dej yuav txais kev cawm dim, tiam sis tus uas tsis ntseeg, thiab tsis ua kev cai raus dej, yuav raug txim.

30 Vim rau nej, Kaum Ob tug Thwj Tim, thiab cov ntawm Thawj Pawg Thawj Tswj Hwm, cov uas tau tsa nrog nej los ua nej cov pab cuam thiab nej cov thawj coj, kuv yuav muab lub hwj chim ntawm lub pov thawj hwj no, rau hnub nyoog kawg thiab rau zaum kawg, uas yog lub caij nyoog tso txoj cai uas muaj txhij txhua,

31 Lub hwj chim uas nej tuav, txuas rau tag nrho cov uas tau txais ib lub caij nyoog tso txoj cai nyob rau ib lub sij hawm twg txij thaum chiv keeb ntawm txoj kev tsim txhua yam los;

32 Vim kuv hais tseeb rau nej tias, cov yawm sij ntawm lub caij nyoog tso txoj cai, uas nej tau txais, tau los ntawm cov yawg koob los, thiab thaum kawg nkaus, tau muab xa saum ntuj ceeb tsheej los rau nej.

33 Kuv hais tseeb rau nej tias, saib seb Vajtswv txoj kev hu nej tseem ceeb heev. Ntxuav nej lub siab thiab nej tej tsoos tsho kom huv, tsam tus Tswv kom nej ris tiam neeg no cov ntshav.

34 Rau siab ntseeg kom txog thaum kuv los, vim kuv los sai sai no; thiab kuv nqi zog nrog kuv los them rau txhua tus neeg raws li tej hauj lwm uas nws ua. Kuv yog Alafas thiab Aumenkas. Amees.