1 Xwv kom ntaus cim rau zaj lus tim khawv txog phau ntawv no thiab Phau Ntawv Maumoos, peb tshaj tawm txog qhov uas tus Yaj Saub Joseph Smith, thiab tus Yawg Suab Hyrum Smith raug tua tuag rau nkawd txoj kev ntseeg. Nkawd raug tua nyob hauv lub tsev kaw Carthage, nyob rau hnub tim 27 lub Rau Hli Ntuj, xyoo 1844, kwv yees li tsib teev yav tav su, los ntawm pab tub sab muaj riam phom—pleev tej plhu dub vog—muaj li 150 mus txog 200 tus neeg. Xub tua raug Hyrum thiab nws vau twj ywm, qw hais tias: Kuv yog ib tug neeg tuag lawm! Joseph tau dhia saum qhov rais los, thiab raug phom tua thaum tab tom dhia los, qw hais tias: Auj tus Tswv kuv tus Vajtswv! Nkawd ob leeg raug phom tua ntxiv tom qab nkawd twb tuag lawm, los ntawm kev lim hiam heev, thiab nkawd ib leeg raug plaub lub muas txwv.

2 John Taylor thiab Willard Richards, ob tug ntawm Kaum Ob tug Thwj Tim, thiaj yog ob tug nkaus xwb uas nyob hauv chav tsev thaum lub sij hawm ntawd; John Taylor raug phom nrog plaub lub muas txwv los ntawm txoj kev phem heev, tiam sis txij ntawd los kuj tau zoo lawm; Willard Richards, los ntawm Vajtswv txoj kev saib xyuas, tau khiav dim, twb tsis to ib lub qhov rau ntawm nws lub tsho loj li.

3 Joseph Smith, tus Tswv tus Yaj Saub thiab tus Pom Tau, twb ua ntau tshaj lwm tus, rau tib neeg txoj kev cawm seej nyob hauv ntiaj teb no, tsuas yog Yexus tib leeg nkaus xwb thiaj tau ua tshaj nws. Nyob rau hauv lub sij hawm luv uas yog nees nkaum xyoo, nws tau coj Phau Ntawv Maumoos los, phau uas nws tau txhais los ntawm Vajtswv lub txiaj ntsim thiab lub hwj chim, thiab yog tus uas ua kom luam tau phau ntawv no tawm nyob hauv ob sab ntuj; tau xa qhov txhij txhua ntawm txoj moo zoo uas kav ib txhis, uas muaj nyob hauv Phau Ntawv Maumoos, mus rau plaub ceg kaum ntuj; tau coj tej kev tshwm sim thiab tej lus txib uas muab los ua ke los ua phau ntawv Lus Qhuab Qhia thiab Kev Khi Lus no, thiab ntau yam ntaub ntawv thiab tej lus qhia txawj ntse ntxiv kom pab noob neej; tau sib sau txhiab txhiab tug ntawm Tsoom Haiv Neeg Ntseeg hauv Hnub Nyoog Kawg los ua ke, tau tsim ib lub nroog loj, thiab tau tseg cia kev muaj koob muaj npe uas yuav tsis txawj tuag. Vajtswv thiab Vajtswv cov neeg pom tias nws zoo kawg nkaus thaum ua neej, thiab nws zoo kawg nkaus thaum tuag; thiab zoo li neeg feem coob ntawm cov uas tus Tswv tau pleev roj rau nyob txheej thaum ub, nws tau ntaus cim rau nws ntiag tug hauj lwm thiab tej yam nws ua nrog nws tus kheej cov ntshav; thiab nws tus tij laug Hyrum los ua tib yam. Thaum ciaj nkawd tsis sib cais, thiab thaum tuag nkawd tsis sib nrug!

4 Thaum Joseph mus rau hauv Carthage tso nws tus kheej rau cov neeg uas ua txuj tias yog raws li kev txiav txim ntawm txoj kev cai, ob los yog peb hnub ua ntej lawv tua nws, nws hais tias: “Kuv tab tom mus zoo li tus me nyuam yaj mus rau luag tua; tiam sis kuv lub siab tus yees zoo li ib tag kis sawv ntxov lub caij ntuj sov; kuv lub siab yeej paub hais tias kuv tsis muaj kev txhaum rau Vajtswv, thiab rau txhua tus neeg. Kuv yuav tuag tsis muaj kev txhaum, thiab lawv yuav hais txog kuv tias—nws raug neeg txhob txwm muab tua.” Tib tag kis ntawd, tom qab Hyrum tau npaj txhij yuav mus—puas yuav hais tias yog mus rau luag tua? yog, vim twb yog li ntawd—nws tau nyeem nqe lus, uas ze qhov kawg ntawm tshooj kaum ob ntawm Ethaws phau ntawv, nyob hauv Phau Ntawv Maumoos, thiab txawm muab nplooj ntawv lov los kem:

5 Thiab tau muaj tias kuv thov tus Tswv kom nws muab kev tshav ntuj rau Lwm Haiv Neeg, xwv kom lawv yuav muaj kev siab hlub. Thiab tau muaj tias tus Tswv hais rau kuv tias: Yog lawv tsis muaj kev siab hlub los twb tsis ua li cas rau koj, koj twb rau siab ntseeg lawm; yog li ntawd, tus Tswv yuav ua kom koj tej tsoos tsho huv. Thiab vim koj twb pom koj txoj kev qaug zog, tus Tswv yuav ua kom koj muaj zog, kom tau zaum saum qhov chaw uas kuv tau npaj nyob hauv kuv Txiv tej chaw nyob. Thiab nim no kuv, … thov hais ncaim mus zoo rau Lwm Haiv Neeg, muaj tseeb tiag, thiab kuj hais rau kuv cov kwv tij uas kuv hlub, mus txog thaum peb yuav sib ntsib rau ntawm Khetos lub rooj txiav txim, uas txhua tus tib neeg yuav paub tias nej cov ntshav twb tsis tsuas kuv tej tsoos tsho. Ob tug neeg tim khawv nim no tuag lawm, thiab nkawd tej lus tim khawv twb nyob ruaj nrees.

6 Hyrum Smith muaj plaub caug plaub xyoos rau lub Ob Hlis Ntuj, xyoo 1844, thiab Joseph Smith muaj peb caug yim xyoo rau lub Kaum Ob Hlis Ntuj, xyoo 1843; thiab txij no mus nkawd ob lub npe yuav muaj nrog cov neeg tuag rau lawv tej kev teev ntuj; thiab yuav ua kom tus neeg nyeem ntawv nyob hauv txhua haiv neeg nco qab hais tias Phau Ntawv Maumoos, thiab phau ntawv Lus Qhuab Qhia thiab Kev Khi Lus ntawm lub koom txoos no, yog muab ob tug neeg zoo tshaj plaws ntawm lub caij ib txhiab yim pua tawm xyoo cov ntshav los them nqi thiaj coj tau cov ntawv no mus rau cov neeg ntiaj teb uas liam sij txoj kev cawm seej; thiab hais tias yog hluav taws muaj peev xwm kub tau tsob ntoo ntsuab rau Vajtswv lub yeeb koob, ces yuav yooj yim hlawv tej ntoo qhuav los ua kom lub vaj txiv ntoo roj liam sij ntawd huv tuaj. Nkawd tau ua neej kom muaj yeeb koob; nkawd tau tuag kom muaj yeeb koob; thiab yeeb koob yog nkawd nqi zog nyob mus ib txhis. Ib tiam mus rau ib tiam nkawd ob lub npe yuav mus rau cov xeeb leej xeeb ntxwv ib yam li cov pob zeb muaj nqis rau cov neeg dawb huv.

7 Nkawd twb tsis muaj ib yam kev txhaum dab tsi li, ib yam li tau ua pov thawj yav tas los ntau zaus, thiab tsuas yog raug kaw nyob rau hauv lub tsev kaw los ntawm cov neeg ntxeev siab thiab cov neeg phem txoj kev tuav hauv xwb; thiab nkawd cov ntshav uas tsis muaj kev txhaum nyob hauv pem teb hauv lub tsev kaw Carthage yog ib lub cim qhib lug nias rau “Cov Neeg Maumoos txoj Kev Ntseeg” uas ib lub tsev txiav txim twg nyob hauv ntiaj teb no yuav xyeej tsis tau, thiab nkawd cov ntshav uas tsis muaj kev txhaum yuav tsuas rau lub Xeev Illinois lub koob lub npe, vim lub Xeev ntawd tau rhuav txoj kev ntseeg siab uas tus tswv xeev tau cog lus, yog kev ua tim khawv rau qhov tseeb ntawm txoj moo zoo uas kav ib txhis kom tag nrho neeg ntiaj teb yuav iab liam tsis tau; thiab nkawd cov ntshav uas tsis muaj kev txhaum nyob saum tus chij ywj pheej, thiab nyob hauv tus txhooj lij choj hauv lub Teb Chaws Amelikas, yog kev sawv cev rau txoj kev teev ntuj ntawm Yexus Khetos, uas yuav chob cov neeg ncaj ntawm txhua haiv neeg lub siab; thiab nkawd cov ntshav uas tsis muaj kev txhaum, nrog rau tag nrho cov neeg uas tau tuag rau lawv txoj kev teev ntuj cov ntshav nyob hauv qab lub thaj uas Yauhas tau pom, yuav thov mus rau Ib Tsoom Tub Rog tus Tswv kom txog thaum nws ua pauj cov ntshav ntawd nyob hauv ntiaj teb tso. Amees.