Tshooj 28
Kev tshwm sim uas tus Yaj Saub Joseph Smith tau txais kom qhia Oliver Cowdery, nyob hauv Fayette, New York, lub Cuaj Hlis Ntuj xyoo 1830. Hiram Page, uas yog ib tug mej zeej ntawm lub Koom Txoos, tau muaj ib lub pob zeb thiab tshaj hais tias los ntawm lub pob zeb no, nws txais tau tej kev tshwm sim ntsig txog txoj kev txhim tsa Xi-oos thiab tus txheej txheem ntawm lub Koom Txoos. Ob peb tug mej zeej tau raug dag ntxias los ntawm tej no, thiab tej no twb ua rau Oliver Cowdery ua yuam kev thiab. Ua ntej kiag ib lub rooj sab laj uas tau teem cia, tus Yaj Saub tau kub siab lug nug tus Tswv ntsig txog qhov ntawd, ces muaj txoj kev tshwm sim no los tom qab ntawd.
1–7, Joseph Smith tuav cov yawm sij ntawm tej txuj ci uas neeg paub tsis txog, thiab nws tib leeg xwb thiaj yog tus txais tau tej kev tshwm sim rau lub Koom Txoos; 8–10, Oliver Cowdery yuav tsum mus tshaj tawm txoj moo zoo rau cov Neeg Lamas; 11–16, Dab Ntxwg Nyoog tau dag ntxias Hiram Page thiab muab tej kev tshwm sim cuav rau nws.
1 Saib seb, Oliver, kuv hais rau koj tias, koj yuav muaj peev xwm hais kom cov ntseeg yuav hnov txhua tsav txhua yam uas koj yuav qhia lawv los ntawm tus Nplij Siab, ntsig txog tej kev tshwm sim thiab tej lus txib uas kuv tau muab lawm.
2 Tiam sis, saib seb, kuv hais tseeb tseeb rau koj tias, kuv yuav tsis tsa ib tug twg los txais tej lus txib thiab tej kev tshwm sim nyob hauv lub koom txoos no tsuas yog kuv tus tub qhe Joseph Smith, tus Hluas xwb, vim nws txais tej ntawd zoo ib yam li Mauxes.
3 Thiab koj yuav tsum ua raws li tej yam uas kuv yuav muab los rau nws, zoo ib yam li Aloos, rau siab mus tshaj tawm tej lus txib thiab tej kev tshwm sim, nrog hwj chim thiab txoj cai rau cov ntseeg.
4 Thiab yog hais tias thaum twg tus Nplij Siab coj kom koj hais lus los yog qhia, los sis txhua lub sij hawm thaum txib kom koj qhia cov ntseeg los koj yeej ua tau.
5 Tiam sis koj yuav tsis sau yam li yog lus txib, tiam sis yog raws li laj lim tswv yim;
6 Thiab koj yuav tsum tsis txhob txib tus uas yog koj tus thawj, thiab tus thawj ntawm lub koom txoos;
7 Vim kuv tau muab tej yawm sij ntawm tej txuj ci uas neeg paub tsis txog, thiab tej kev tshwm sim uas muab khi tseg cia lawm, rau nws, kom txog thaum kuv tsa dua ib tug los nyob nws qhov chaw rau lawv.
8 Thiab nim no, saib seb, kuv hais rau koj tias koj yuav tsum mus lawm tim cov Neeg Lamas thiab tshaj tawm kuv txoj moo zoo rau lawv; thiab yog hais tias lawv txais tej koj qhia ces koj yuav tsum tsa kuv lub koom txoos nyob hauv lawv; thiab koj yuav tau tej kev tshwm sim, tiam sis tsis txhob muab tej ntawd sau yam li yog tej lus txib.
9 Thiab nim no, saib seb, kuv hais rau koj tias twb tsis tau muab ua kom tshwm sim, thiab twb tsis muaj neeg paub hais tias lub nroog Xi-oos yuav tsa nyob rau qhov twg, tiam sis tom qab no mus mam qhia. Saib seb, kuv hais rau koj tias Xi-oos yuav nyob ntawm ciaj ciam ze cov Neeg Lamas.
10 Koj yuav tsum tos kom tag lub rooj sab laj tso koj mam ncaim qhov chaw no mus; thiab yuav tsa kuv tus tub qhe Joseph los tswj hwm lub rooj sab laj los ntawm lub rooj sab laj lub suab, thiab nws hais dab tsi rau koj, koj yuav tsum qhia li ntawd.
11 Thiab ntxiv, koj yuav tsum coj koj tus tij laug, Hiram Page, tsuas yog nws thiab koj xwb, thiab qhia rau nws hais tias tej yam uas nws tau muab sau los ntawm lub pob zeb ntawd tsis yog los ntawm kuv los thiab hais tias Dab Ntxwg Nyoog dag ntxias nws;
12 Vim, saib seb, twb tsis tau muab tej yam no rau nws, thiab kuj yuav tsis muab dab tsi rau ib tug twg ntawm lub koom txoos no uas tsis raws li lub koom txoos tej kev khi lus.
13 Vim yuav tsum ua txhua yam kom raws txheej txheem, thiab los ntawm sawv daws kev pom yeem nyob hauv lub koom txoos, los ntawm txoj kev thov Vajtswv nrog kev ntseeg.
14 Thiab koj yuav tsum pab daws tag nrho txhua yam no, raws li lub koom txoos tej kev khi lus, ua ntej koj yuav mus lawm tim cov Neeg Lamas.
15 Thiab mam li qhia rau koj txij lub sij hawm koj mus, txog lub sij hawm koj rov qab los, saib koj yuav tsum ua dab tsi.
16 Thiab koj yuav tsum qhib koj lub qhov ncauj txhua lub sij hawm, tshaj tawm kuv txoj moo zoo nrog lub suab xyiv fab hlo. Amees.