1 Thaum tus Cawm Seej tshwm los peb yuav pom nws xws li nws yog. Peb yuav pom hais tias nws yog ib tug neeg zoo li peb.

2 Thiab tib txoj kev sib raug zoo uas muaj nyob nrog peb nim no kuj yuav muaj nyob nrog peb thaum ntawd, tsuas yog yuav muaj yeeb koob uas kav mus ib txhis, lub yeeb koob uas ziag no peb tsis tau muaj.

3 Yauhas 14:23—Qhov uas Leej Txiv thiab Leej Tub tshwm los, nyob hauv nqe ntawd, yog nkawd tus kheej los kiag; thiab lub tswv yim uas hais tias Leej Txiv thiab Leej Tub nyob hauv tib neeg lub siab yog qhov uas tib neeg ntseeg thaum ub, thiab tsis muaj tseeb.

4 Lus teb rau lo lus nug—Txoj kev suav caij suav nyoog ntawm Vajtswv lub sij hawm, tus tim tswv lub sij hawm, tus yaj saub lub sij hawm, thiab neeg lub sij hawm, puas yog raws li lub ntiaj teb uas lawv nyob haud?

5 Kuv teb tias, Yog. Tiam sis twb tsis muaj cov tim tswv uas txhawb pab rau hauv lub ntiaj teb no tsuas yog cov uas yog lub ntiaj teb no tug los yog ib txwm yog ntiaj teb no tug xwb.

6 Cov tim tswv tsis nyob rau hauv ib lub ntiaj teb zoo li lub ntiaj teb no;

7 Tiam sis lawv nyob ntawm Vajtswv xub ntiag, saum ib lub ntiaj teb zoo li hiav txwv uas ci li iav thiab hluav taws, ntawm qhov uas txhua yam qhia tau cov tim tswv lub yeeb koob tshwm los, yav tas los, yav ziag no, thiab yav tom ntej, thiab nyob ntawm tus Tswv xub ntiag tsis tu ncua.

8 Qhov chaw Vajtswv nyob yog ib lub Ulees thiab Thumees loj heev.

9 Thaum lub ntiaj teb no dawb huv thiab tsis txawj tuag, Vajtswv yuav ua kom zoo li iav thiab lub ntiaj teb no yuav yog ib lub Ulees thiab Thumees rau cov neeg uas nyob rau haud, kom los ntawm tej ntawd txhua yam ntsig txog lub nceeg vaj qis zog, los sis txhua lub nceeg vaj nyob theem qis zog, yuav muab qhia tshwm los rau cov neeg uas nyob rau haud; thiab lub ntiaj teb no yuav yog Khetos lub.

10 Thaum ntawd lub pob zeb xim dawb tau hais txog nyob hauv Tshwm Sim 2:17, yuav los ua ib lub Ulees thiab Thumees rau txhua tus uas tau txais ib lub, thiaj yuav muab tej yam ntsig txog theem nceeg vaj siab zog qhia tshwm los;

11 Thiab muab ib lub pob zeb xim dawb rau lawv txhua tus uas los rau hauv lub nceeg vaj xilethi-aus, es muab ib lub npe tshiab sau rau, lub npe uas tsis muaj neeg paub tsuas yog tus uas tau txais xwb. Lub npe tshiab yog lo lus ua yawm sij.

12 Kuv qhia tej uas yuav muaj los yav tom ntej, los ntawm tus Tswv uas yog Vajtswv lub npe, hais tias qhov chiv keeb ntawm tej kev cov nyom uas yuav ua kom muaj nqaij ntuag ntshav nrog ntau ua ntej Neeg Leej Tub yuav los yuav pib nyob rau hauv South Carolina.

13 Tej zaum yuav muaj tej no los ntawm qhov teeb meem txog kev ua cev qhev. Qhov no yog ib lub suab tshaj tawm rau kuv, thaum kuv tab tom sib zog thov Vajtswv txog lub ntsiab lus ntawd, Kaum Ob Hlis Ntuj hnub tim 25, xyoo 1832.

14 Muaj ib zaug kuv tau sib zog thov Vajtswv kom paub lub sij hawm Neeg Leej Tub yuav los, thaum kuv hnov ib lub suab rov qab hais dua cov lus nram no:

15 Joseph, kuv tus tub, yog hais tias koj nyob txog thaum koj muaj yim caum tsib xyoos, ces koj yuav pom Neeg Leej Tub lub ntsej muag; yog li ntawd cia qhov no txaus lawm, thiab tsis txhob txob kuv ntxiv txog qhov no.

16 Tus Tswv cia kuv nyob li no, tsis muaj qhov peev xwm txiav txim siab saib txoj kev los no yog hais txog qhov chiv keeb ntawm hnub nyoog Milenias los yog txog txoj kev los ua ntej ntawd, los puas yog kuv tuag tso ces thiaj pom nws lub ntsej muag.

17 Kuv ntseeg hais tias Neeg Leej Tub txoj kev los yuav tsis sai dua li lub sij hawm ntawd.

18 Peb nce mus txog theem twg ntawm kev txawj ntse nyob hauv lub neej no, kev txawj ntse ntawd yuav sawv los nrog peb nyob hauv lub caij sawv rov los.

19 Thiab yog hais tias ib tug neeg kawm kev paub txuj ci thiab kev txawj ntse ntau dua lwm tus nyob hauv lub neej no los ntawm nws txoj kev rau siab thiab kev mloog lus, nws yuav tau ntau heev tshaj lwm tus nyob hauv lub neej uas yuav los.

20 Ua ntej ntuj tsim teb raug tau tshaj tawm ib txoj kev cai uas hloov tsis tau nyob saum ntuj ceeb tsheej, uas yog lub hauv paus rau tag nrho cov koob hmoov—

21 Thiab thaum peb tau ib txoj koob hmoov twg los ntawm Vajtswv los, twb yog los ntawm qhov uas peb ua raws li txoj kev cai uas yog lub hauv paus ntawm txoj koob hmoov ntawd.

22 Leej Txiv muaj ib lub cev muaj nqaij thiab muaj txha uas kov tau ib yam li tib neeg; Leej Tub los muaj thiab; tiam sis tus Vaj Ntsuj Plig Dawb Huv tsis muaj ib lub cev muaj nqaij thiab muaj txha, tiam sis yog ib tug Ntsuj Plig xwb. Yog tsis zoo li ntawd, tus Vaj Ntsuj Plig Dawb Huv yuav nyob tsis tau hauv peb.

23 Ib tug neeg muaj cai txais tau tus Vaj Ntsuj Plig Dawb Huv, thiab tus Vaj Ntsuj Plig Dawb Huv nqis tau los rau saum tus neeg ntawd tiam sis tsis nrog nws nyob.