1 Tus Tswv hais tseeb li no rau koj, kuv tus tub qhe Lyman: Tus Tswv zam txim rau koj tej kev txhaum lawm, vim yog koj tau ua raws li kuv lub suab es tag kis no tuaj rau pem no tuaj txais tej lus ntuas los ntawm tus neeg uas kuv tau tsa.

2 Yog li ntawd, cia koj tus ntsuj plig nyob tus tsis txhob txhawj txog qhov uas koj sab ntsuj plig zoo li cas, thiab tsis txhob tawm tsam kuv lub suab ntxiv lawm.

3 Thiab cia li sawv tsees thiab txij no mus xyuam xim zog ntawm txoj kev ua raws li koj tej kev cog lus, uas koj tau cog thiab yuav cog, ces koj yuav tau tej koob hmoov tseem ceeb heev.

4 Ua siab ntev tos kom txog thaum kuv cov tub qhe hu lub rooj txoos ua kev cai tso, thaum ntawd yuav nco ntsoov koj nrog rau kuv cov thawj txwj laug, thiab txais txoj cai los ntawm kev tsa nrog rau kuv lwm cov txwj laug uas kuv tau xaiv.

5 Saib seb, qhov no yog txoj kev cog lus ntawm Leej Txiv rau koj yog hais tias koj rau siab ntseeg mus ntxiv.

6 Thiab yuav muaj raws li ntawd rau koj nyob rau hnub ntawd thaum uas koj yuav muaj txoj cai mus tshaj tawm kuv txoj moo zoo txawm yog kuv yuav xa koj mus qhov twg los, txij no mus txij lub sij hawm ntawd mus.

7 Yog li ntawd, txhawb nqa koj cov kwv tij nyob hauv tag nrho koj tej kev sib tham, nyob hauv tag nrho koj tej kev thov Vajtswv, nyob hauv tag nrho koj tej kev qhuab ntuas, thiab nyob hauv tag nrho tej koj ua.

8 Thiab saib seb, thiab xyuas seb, kuv twb nyob nrog koj foom koob hmoov rau koj thiab cawm koj dim mus ib txhis li. Amees.