Tshooj 81
Kev tshwm sim uas tus Yaj Saub Joseph Smith tau txais, nyob hauv Hiram, Ohio, lub Peb Hlis Ntuj hnub tim 15, xyoo 1832. Tus Tswv hu Frederick G. Williams los ua ib tug pov thawj hlob thiab ib tug pab cuam nyob hauv pawg Thawj Tswj Hwm ntawm lub Pov Thawj Hwj Hlob. Cov ceev xwm txheej keeb kwm qhia tias thaum txais txoj kev tshwm sim no thaum lub Peb Hlis Ntuj xyoo 1832, tus Tswv tau hu Jesse Gause los ua tus pab cuam rau Joseph Smith nyob hauv Pawg Thawj Tswj Hwm. Txawm yog li ntawd los, thaum Jesse Gause ua tsis tau raws li txoj hauj lwm no, tom qab ntawd, tus Tswv muab txoj kev hu ntawd hloov mus rau Frederick G. Williams. Tsim nyog muab txoj kev tshwm sim (thaum lub Peb Hlis Ntuj xyoo 1832) suav tias yog ib kauj ruam ze zog rau txoj kev tsim Thawj Pawg Thawj Tswj Hwm, qhov meej pem yog hu tus pab cuam los ua hauj lwm nyob hauv pawg ntawd thiab piav txog qhov tseem ceeb ntawm txoj hauj lwm ntawd. Tij Laug Gause tau ua hauj lwm ib ntus tiam sis raug muab rho tawm ntawm lub Koom Txoos thaum lub Kaum Ob Hlis Ntuj xyoo 1832. Tau muab Tij Laug Williams tsa los rau lub luag hauj lwm ntawd rau lub Peb Hlis Ntuj hnub tim 18, xyoo 1833.
1–2, Cov yawm sij ntawm lub nceeg vaj yeej ib txwm yog Thawj Pawg Thawj Tswj Hwm tuav; 3–7, Yog hais tias Frederick G. Williams rau siab ua nws txoj hauj lwm qhuab qhia, nws yuav tau txoj sia nyob mus ib txhis.
1 Kuv hais tseeb tseeb rau koj kuv tus tub qhe Frederick G. Williams: Cia li mloog tus uas hais lus lub suab, mloog tus Tswv koj tus Vajtswv txoj lus, thiab ua raws li qhov uas tus Tswv hu koj ua, uas twb yog ua ib tug pov thawj hlob nyob hauv kuv lub koom txoos, thiab ua ib tug pab cuam rau kuv tus tub qhe Joseph Smith, tus Hluas;
2 Tus uas kuv tau muab cov yawm sij ntawm lub nceeg vaj rau, uas yeej ib txwm muab rau Pawg Thawj Tswj Hwm ntawm lub Pov Thawj Hwj Hlob:
3 Yog li ntawd, tseeb tiag kuv pom zoo rau nws thiab yuav foom koob hmoov rau nws, thiab rau koj thiab, npaum li uas koj rau siab ua raws li tej lus ntuas, thaum ua lub luag hauj lwm kuv tau muab rau koj, thov Vajtswv tas mus li, hais lus thov thiab thov nyob hauv koj lub siab, thaum nyob nrog tib neeg thiab thaum nyob koj tus kheej, thiab thaum ua koj txoj hauj lwm qhuab qhia tshaj tawm txoj moo zoo rau lub teb chaws ntawm cov neeg muaj sia, thiab rau koj cov kwv tij.
4 Thiab thaum ua tej yam no koj yuav ua tau qhov muaj nqis tshaj plaws rau koj cov tib neeg, thiab yuav txhawb nqa lub yeeb koob ntawm tus uas yog koj tus Tswv.
5 Yog li ntawd, rau siab ntseeg; sawv ruaj nrees ntawm lub luag hauj lwm uas kuv tau tsa rau koj; txhawb pab cov qaug zog, tsa tej tes uas qaug dai ncuv, thiab txheem tej hauv caug uas qaug zog.
6 Thiab yog hais tias koj rau siab ntseeg kom txog thaum kawg koj yuav tau lub meej mom ntawm kev tsis txawj tuag, thiab txoj sia nyob mus ib txhis saum tej chaw nyob uas kuv tau npaj tseg tos nyob hauv kuv Txiv lub tsev.
7 Saib seb, thiab xyuas seb, cov no yog Alafas thiab Aumenkas cov lus, uas twb yog Yexus Khetos. Amees.