« Rāve’a nō te fa’a’ite i te ’evanelia », Rāve’a nō te fa’a’ite i te ’evanelia (2024)
Fa’a’ite i te ’evanelia
Rāve’a nō te fa’a’ite i te ’evanelia
Fa’a’ite i te ’evanelia nā roto i te here, te fa’a’ite ’e te tītau manihini
’Ua parau te Fa’aora i tāna mau ’āpōsetolo : « E haere ’outou ē ’ati noa a’e te mau fenua ato’a, e fa’a’ite haere i te ’evanelia i te ta’ata ato’a » (Mareko 16:15). Tei ni’a ia tātou terā hōpoi’a i teienei.
’Ua fa’aha’amana’o mai ’o Elder Gary E. Stevenson ē « e nehenehe e fa’aoti i te fa’auera’a rahi a te Fa’aora nā roto i te mau parau tumu ’ōhie ’e te māramarama ’ia ’apo mai, tei ha’api’ihia ia tātou tāta’itahi mai te ’aru’arura’a mai ā : here, fa’a’ite, ’e ani manihini » (« Here, fa’a’ite, ani manihini », Liahona, Mē 2022, 84). E mau rāve’a fa’atāhō’ē ’e te mana rahi teie mau parau tumu nō ’outou nō te fa’a’ite i te ’evanelia i te ta’ata ma te tano ’e mai te huru ē e peu iho ā nā ’outou.
E vāhi maita’i nō te ha’amata te purera’a nō te mau rāve’a e fa’a’ite i te ’evanelia. E arata’i te Metua i te ao ra ia ’outou ’ia ’ite ’o vai te ta’ata ’ati a’e ia ’outou tei ineine nō te tahi tītaura’a manihini ’e e aha te tītaura’a manihini e hōro’a atu. ’A ora ai ’outou i tō ’outou fa’aro’o ’e ’a pe’e ai i te mau muhumuhu pae vārua ’ia fa’a’ite i te ’evanelia, e ti’a ia ’outou ’ia ’ite i te ’oa’oa e tae mai nā roto i te tauturura’a i te ta’ata ’ia haere mai i te Mesia, i te mau mahana ato’a.
Fa’afārerei i te mau hoa i te mau misiōnare
E rāve’a mana rahi te tītau-manihini-ra’a i te hoa ’ia fārerei i te mau misiōnare, nō te fa’a’ite i te ’evanelia a Iesu Mesia. ’Ua ’ite te Metua i te ao ra ’e ’ua here maita’i roa ’oia i tō ’outou mau hoa. E tauturu ’oia ia ’outou ’ia ’ite i te taime ’e nāhea i te hōro’a i te tītaura’a manihini ia rātou ’ia fārerei i te mau misiōnare.
’Ia fa’atae ’outou i te i’oa o tō ’outou mau hoa i te mau misiōnare, ’a paraparau i te mau misiōnare nō te tauturu ia rātou ’ia māramarama i te mau hina’aro o tō ’outou mau hoa, te mea tā rātou e ’ana’anatae ’e tā rātou mau uira’a. ’Āmui i te mau ’āparaura’a ’evanelia ’e te mau ha’api’ira’a misiōnare ’e tō ’outou mau hoa, ma te ti’a tino atu ’aore rā nā ni’a i te natirara.
Tauturu i te hoa ’ia ha’amori nā muri ia tātou
Nō te rahira’a o te ta’ata, e mea huru taiā ’ia haere i te hō’ē purera’a ’āpī. I te vāhi tā rātou e ora ra, e nehenehe e tauturu i tō ’outou mau hoa ’ia tupu maita’i tō rātou ha’amorira’a nā muri i te feiā mo’a maoti te ravera’a ia rātou nā muri ia ’outou i te mau rurura’a a te ’Ēkālesia, ’aore rā maoti te tauturura’a ia rātou ’ia ’ite tei hea te ’āmuira’a fātata ia rātou ma te fa’a’ohipa i te Meetinghouse Locator [’Imi fare purera’a].
Fa’a’ite i te ta’ata i te Buka a Moromona
Fa’aaura’a rorouira Fa’a’ite i te ta’ata i te Buka a Moromona
Tē pūpū nei te Buka a Moromona i te tīa’ira’a, tē ha’apūai nei i te fa’aro’o ia Iesu Mesia ’e maoti te reira e ti’a ai i te Vārua ’ia hōro’a i te hau ’e te arata’ira’a i te ta’ata, i roto i te mau mea ato’a o tō rātou orara’a. E rave rahi rāve’a nō te fa’a’ite ’outou i te Buka a Moromona ia vetahi ’ē. E nehenehe ’outou e parau i te ta’ata i te hō’ē ha’api’ira’a tā ’outou i ’apo mai i roto. E nehenehe ’outou e fa’a’ite i te hoa i te hō’ē ’īrava e tū’ati i tōna orara’a. E nehenehe ’outou fa’ata’a ’ua nāhea te buka i te tauturura’a ia ’outou ’ia ’ite i te tīa’ira’a ’e te tāmarū tā Iesu e pūpū. E nehenehe ’outou e fa’a’ite i tō ’outou mana’o nā ni’a i te natirara ma te tāpa’o @tebukaamoromona.
Mātēria nō te fa’a’ite i te ’evanelia nā te feiā fa’atere
’O nā peresidenira’a nō te pupu peresibutero ’e te Sōtaiete Tauturu te ’ōmua nō te tauturu i te fa’aurura’a i te mau melo ’ia here i te mau tamari’i a te Atua, ’ia fa’a’ite i te ’evanelia ’e ’ia tītau manihini ia vetahi ’ē ’ia fa’ari’i i te mau ha’amaita’ira’a a te Fa’aora (Buka arata’i rahi, 23.5.2). ’Outou te feiā fa’atere, ’ia ’ite ’outou ē, e tāta’i-rahi-hia tā ’outou mau tauto’ora’a i te taime e fa’aau te mau melo ’e te mau misiōnare i tā rātou mau tauto’ora’a nō te ’āfa’i i te ta’ata i te Mesia.
Fa’a’ite i te mau ’ātivite a te pāroita
’Ia ’ana’anatae ’e ’ia fa’ari’i pōpou tā ’outou mau ’ātivite pāroita i te mau ta’ata ato’a. ’Ei reira, ’a tītau manihini i tō ’outou mau veutupu ’e te mau hoa ’ia haere mai. E rave rahi te hoa e hina’aro e ’āmui mai i tā tātou mau ’ātivite, ’eiaha ïa e taiā ’ia tītau manihini ia rātou. ’Eiaha e ha’ape’ape’a mai te peu ’aita te hō’ē ta’ata e fa’ari’i i tā ’outou tītaura’a manihini.
’Ia haere ’outou i te mau ’ātivite pāroita, ’a hi’o i te ta’ata tā ’outou i ’ore i mātau. ’A fārerei atu. ’A fa’ari’i pōpou ia rātou. ’A rave i te tahi taime nō te ha’amātau ia rātou. ’A hi’o ē, ’ua ta’a ia rātou e aha tē tupu ra ’e nāhea i te ’āmui i terā ’ātivite.
Video nō ni’a i te fa’a’itera’a i te ’evanelia (tā’āto’ara’a o te mau video reo peretāne)
’A māta’ita’i i teie mau video nō te hi’o i te mau rāve’a nō ’outou nō te here, fa’a’ite ’e tītau manihini ma te ’ōhie ’e te au māite i te mau mahana ato’a.
Video nō te fa’a’itera’a i te ’evanelia i roto i te vaira’a rāve’a ha’apararera’a
Fa’a’ite i te mau mātēria a te ’Ēkālesia
I tō Iesu pārahira’a i ni’a i te fenua nei, ’ua tauturu ’oia i te ta’ata i te pae tino ’e i te pae vārua. ’Ua fa’atāmā’a ’oia i tei po’ia ’e ’ua fa’aora i te feiā ma’i. ’Ua fa’aitoito ’oia ia rātou ’e ’ua tauturu i te ta’ata ’ati a’e iāna. E ti’a ato’a ia tātou ’ia nā reira maoti te fa’a’itera’a i te mau mātēria a te ’Ēkālesia ’o tē tauturu i te mau hina’aro pae tino ’e pae vārua o te ta’ata.
Te mau mātēria a te ’Ēkālesia e vai ra
Tē pa’epa’e nei Te ’Ēkālesia a Iesu Mesia i te Feiā Mo’a i te mau Mahana Hope’a nei i te mau mātēria pae fa’aro’o i muri nei. Tē fa’ari’i nei mātou i te mau ta’ata ato’a, nō te mau fa’aro’o ato’a, ’ia ’āmui mai.
EnglishConnect
Ha’amaita’i i tō ’oe ’aravihi i te pae nō te reo peretāne ’e tāmatamata i roto i te mau pupu ’āparaura’a.
’Āteura’a pae manava
Ha’api’i i te mau ’ohipa ’ōhie e rave nō te fa’aruru i te mau fifi o te orara’a ma te aupuru i tō ’oe ea pae manava.
BYU–Pathway Worldwide
Tītau i te mau parau tū’ite tōro’a tuatahi ’e te mau parau tū’ite tōro’a hau a’e ’e te mau parau tū’ite tuatoru nā ni’ ai te natirara ma te moni tano noa.
FamilySearch
Hi’o e rave rahi miriā parau tāmoni ’ore nō te patu i tō ’oe tumu rā’au ’utuāfare ’e nō te ’ite mai i tō ’oe mau tupuna.
Ha’api’ira’a ’evanelia (Institut) nā te feiā ’āpī pa’ari
’Āmui mai i te mau piha ha’api’ira’a, te mau pupu ’ohipa ’e te mau ’ātivite tei fa’atumuhia i ni’a ia Iesu Mesia, nō te tauturu i te arata’ira’a i tō ’oe tupura’a pae vārua ’e te ta’ata hō’ē.
Ha’api’ira’a ’evanelia (Séminaire) nā te feiā ’āpī
Ha’apūai i tō ’oe niu nō te ha’api’ira’a pae vārua ’e te tupura’a ta’ata hō’ē nō te orara’a tā’āto’a maoti te hi’ora’a i te mau ha’api’ira’a a Iesu Mesia.
Ora mai i te ma’i fa’atītī
Haere i te hō’ē rurura’a pupu pāturu e ’āmui i te mau tuha’a ’itehia nō te rapa’aura’a ma’i ’e te fa’aro’o i te Atua.
Te faufa’a moni a te ta’ata hō’ē (Finances personnelles)
Ha’api’i nāhea i te ha’amau ’e i te pe’e i te hō’ē tāpura faufa’a, fa’a’ore i te mau tārahu ’e tu’u i te moni ma te pa’ari.
Ha’amata e fa’arahi i tā’u taiete (Lancer mon entreprise et la développer)
Ha’api’i nāhea i te pāhono i te mau hina’aro o te hōani, ha’amau i te mau rāve’a tapiho’ora’a ’e fa’anaho i tā ’oe mau parau.
’Imi i te hō’ē ’ohipa maita’i a’e (Trouver un meilleur emploi)
Ha’api’i nāhea i te ti’a maita’i i mua i te mau fatu ’ohipa, ha’amaita’i i te pae nō te ’imira’a ’ohipa, te mau natira’a ’e fa’aineine nō te mau uiuira’a.
Te ha’api’ira’a nō te hō’ē ’ohipa maita’i a’e (Des études pour un meilleur emploi)
Ha’api’i nāhea i te mā’imi, ha’amau ’e vauvau i te mau ’ōpuara’a ha’api’ira’a ’e tōro’a.
Tauturu i te orara’a
Hi’o mai i te mau mātēria nō te tauturu i roto i te mau fifi o te orara’a mai te hāmani-’ino-ra’a, te fa’a’amura’a, te pohe, te humara’a, te metuara’a, te hōho’a faufau, te ’ōnohi ’e tē vai atu ra.