13. Mwanangan te Abotoro ae Bauro ni Mitinare

Katia Biribo e tataekina Kristo ao e bwabetitoa te iunaki ae te I-Itiobia i aon kawaina nako Katia (Mwak. 8:26–39).

Ierutarem Tara mabe 12 ibukin bwaai aika riki i Ierutarem.

Iobe Betero e karekea te kaotioti are te Atua e anga ta bwaintituaraoi ae te rairannano nakoia Tientaire (Mwak. 10; 11:5–18). Betero e kauta Tabita man te mate (Mwak. 9:36–42).

Tamaria Biribo e mwakuri ni ibuobuoki i Tamaria (Mwak. 8:5–13), ao rimwi riki Betero ao Ioane a anga reirei ikai (Mwak. 8:14–25). I mwin are anga te bwaintituaraoi ae te Tamnei ae Raoiroi, Timon te tia tabunea e ukoukora kabooan te bwaintituaraoi aei mai irouia (Mwak. 8:9–24).

Kaitareia Ikai are, i mwin ae e karaoa te ibuobuoki te anera nakon mataniwiin are tebubua ae arana Korenerio, Betero e kariaia bwa e na bwabetitoaki (Mwak. 10). Ikai are e karaoa kamanoana Bauro i matan Akeribwa (Mwak. 25–26; tara naba IT—R 1:24–25).

Tamateko Iesu e kaoti nakon Tauro (Mwak. 9:1–7). I mwin are e kaokaki ana taratara Tauro iroun Anania, Tauro e bwabetitoaki ao e moana ana mwakuri ni ibuobuoki (Mwak. 9:10–27).

Antioka (i Turia) Ikai are a moan aranaki reirei bwa Kiritian (Mwak. 11:26). Akaba e taetae ni burabeti ibukin te rongo (Mwak. 11:27–28). E korakora te aki rau ae riki i Antioka ni kaineti ma te korotobibi (Mwak. 14:26–28; 15:1–9). Bauro e moana ana kauoua ni mwakuri ni ibuobuoki i Antioka ma Tira, Barenaba, ao Iuta Baretaba (Mwak. 15:22, 30, 35).

Tareto Ana kaawa Bauro; Bauro e kanakoaki nako ikai irouia Taari bwa a kamanoa maiuna (Mwak. 9:29–30).

Kubero I mwin bwainikirinakiia, tabeman Aomata aika Itiaki a birinako nakon te atimwakoro aei (Mwak. 11:19). E mwananga Bauro rinanon Kubero n ana moan mwananga ni mitinare (Mwak. 13:4–5), n ai aron are a karaoia Barenaba ao Mareko rimwi riki (Mwak. 15:39).

Babo Bauro e kamaraia te tia tabunea ikai (Mwak. 13:6–11).

Rerebe Bauro ao Barenaba a tataekina te euangkerio n te kaawa aei (Mwak. 14:6–7, 20–21).

Rutetera Ngke e kamarurunga te mwauku, ngaia ma Barenaba a aranaki bwa atua. Bauro e karebanaki n atibu ao a taku bwa e a mate ma e manga marurung ao e reitinako ni kabwarabwara (Mwak. 14:6–21). Mwengan Timoteo (Mwak. 16:1–3).

Ikonio N aia moan mwakuri ni mitinare, Bauro ao Barenaba a kabwarabwara ikai ao a kakamakaki bwa a na karebanaki (Mwak. 13:51–14:7).

Raorikeia ao Korote Raorikeia bon teuana mwangan te Ekaretia are e kawaria Bauro ao e karekei reeta mai iai (Koro. 4:16). Bon aio naba teuana mai buakon kaawa ake itiua ake a karinanaki n te boki ae te Kaotioti (ake tabeua bon Ebeto, Temurena, Berekamo, Tuateira, Tareteiti, ao Biraterebia; tara Kaoti. 1:11). Korote e mena 18 te kiromita i mainikun Raorikeia. E koroboki Bauro nakoia Aomata aika Itiaki ake a maeka ikekei.

Antioka (i Bitiria) N aia moan mwakuri ni mitinare, Bauro ao Barenaba a reireinia Iutaia bwa Kristo e roko man te kanoa are Tawita. Bauro e anga te euangkerio nakon Iteraera, ao i mwina nakoia Tientaire. Bauro ao Barenaba a bwainikirinaki ao a kakioia mai abaia (Mwak. 13:14–50).

Mireto Ngke e mena ikai n ana katenua ni mwakuri ni mitinare, Bauro e kauringiia unimwaane n te Ekaretia bwa a na rin i buakon te nanai “kameanti aika tiritiri” (Mwak. 20:29–31).

Batemoti E kabureaki Ioane n te abamwakoro aei ngke e karekei kaotioti aika kanoan ngkai te boki ae te Kaotioti (Kaoti. 1:9).

Ebeto Aboro e kabwarabwara ikai ma te mwaaka (Mwak. 18:24–28). Bauro, n ana katenua ni mwananga ni mitinare, e anga reirei i Ebeto i nanon uoua te ririki, n rairiia aomata aika bati (Mwak. 19:10, 18). Ikai are e anga te bwaintituaraoi ae te Tamnei ae Raoiroi n te katoka bai (Mwak. 19:1–7) ao e karaoi kakai aika bati, ni ikotaki ma kanakoaia tamnei aika buakaka (Mwak. 19:8–21). Ikai are taan taromauria Riana a karika te aki rau ni kaitara Bauro (Mwak. 19:22–41). Mwakoron te boki ae te Kaotioti e bon kaineti nakon te Ekaretia i Ebeto (Kaoti. 1:11).

Teroa Ngke e mena ikai Bauro n ana kauoua ni mwananga ni mitinare, e noora te mi ni burabeti ibukin te mwaane i Maketonia ae e bubuti buokana (Mwak. 16:9–12). Ngke e mena ikai n ana katenua ni mwananga ni mitinare, Bauro e kauta Eutuko man te mate (Mwak. 20:6–12).

Biribi Bauro, Tira, ao Timoteo a raira te aine ae arana Ruria, a kanakoia tamnei aika buakaka, ao a kataereaki (Mwak. 16:11–23). A karekea te buoka mai iroun te Atua ni birinako man te nne ni kaikain (Mwak. 16:23–26).

Atenai Bauro, n ana kauoua ni mwananga ni mitinare nako Atenai, e kabwarabwara n te Tabuki ae Mars (Areiobako) i aon te “atua are aki ataaki” (Mwak. 17:22–34).

Korinto E nako Bauro nako Korinto n ana kauoua ni mwananga ni mitinare, ike e tiku iroun Akura ao Beritikira. E kabwarabwara ikai ao e bwabetitoia aomata aika bati (Mwak. 18:1–18). Mai Korinto, Bauro e korea ana reta nakoia I-Rom.

Tetaronike Bauro e kabwarabwara ikai n ana kauoua ni mwananga ni mitinare. Ana koraki ni mitinare a kitanna n nako Beroia i mwin are a kakamakaki ibukin maiua irouia Iutaia (Mwak. 17:1–10).

Beroia Bauro, Tira, ao Timoteo a kuneia aomata aika kakannato bwa a na reireiniia i nanon ana kauoua ni mwananga ni mitinare Bauro. Iutaia mai Tetaronike a rimwia ao a bwainikirinia (Mwak. 17:10–13).

Maketonia Bauro e anga reirei ikai n ana kauoua ao katenua ni mwananga (Mwak. 16:9–40; 19:21). Bauro e kamoamoa aia akoi Aomata aika Itiaki i Maketonia, ake anga nakoina ao nakoia Aomata aika Itiaki ake a kainnano i Ierutarem (Rom 15:26; 2Korin. 8:1–5; 11:9).

Merita E koro n te kaibuke Bauro n te abamwakoro aei ni mwanangan Bauro nako Rom (Mwak. 26:32; 27:1, 41–44). E aki rotaki ngke e tenaki iroun te naeta ao e kamarurungia aika mwaiti ake a aoraki i Merita (Mwak. 28:1–9).

Rom Bauro e kabwarabwara ikai i nanon uoua te ririki ngke e kabureaki n te auti (Mwak. 28:16–31). E koroi naba reeta, ke taian reta, nakoia I-Ebeto, I-Biribi, ao I-Korote ao nakon Timoteo ao Biremon ngke e kabureaki i Rom. E aki maan i mwin bwainikirinakiia Kiritian iroun Nero n 64 N.K. ao Betero e korea ana moan reta mai “Bwaburon” are bon te katautau bwa Rom. E bon kakoauaaki bwa Betero ao Bauro a tiringaki ibukin aia koaua ikai.