1 Iwe non ewe fansoun ewe chon nang a kapas ngeniei, a apasa: Nengeni! Iwe ua nengeni me ua kuna chommong ekkewe fonu me muu.

2 Iwe ewe chon nang a apasa ngeniei: Met ka kuna? Iwe ua apasa: Ua kuna chommong ekkewe fonu me muu.

3 Iwe a apasa ngeniei: Ikkei ekkewe fonuen me ekkewe muun ekkewe chon Gentile.

4 Iwe non ewe fansoun ua kuna me nein ekkewe fonuen chon Gentile ewe forutan ew mwichefen mi pochokun

5 Iwe ewe chon nang a apasa ngeniei: Nengeni ewe forutan ew mwichefen minne a fokkun anieput seni meinisin ekkoch mwichefen, minne a nieno ekkewe sounengin Kot, ewer, me ariaffour me fotiretiw, me iseta wor ew osun iron, me uweirenong non fotek.

6 Iwe non ewe fansoun ua kuna ei pochokunen me anieputen mwichefen; iwe ua kuna ewe tefin pwe i ewe chon forata ewe mwichefen.

7 Iwe ua pwan kuna gold, me silver, me ekkewe silk, me ekkewe mangaku mi parapar, me auchean mangaku, me meinisin sokopaten mangaku mi momong; iwe ua kuna chommong fin nisou.

8 Iwe ewe chon nang a kapas ngeniei, a apasa: Nengeni ewe gold, me ewe silver, me ekkewe silk, me ekkewe mangaku mi parapar, me ewe auchean mangaku, me ewe mangaku mi momong, me ekkewe fin nisou, ir ekkewe mettoch ei pochokunen me anieputen mwichefen a mochen.

9 Iwe pwan ren ewe amwararen ewe fonufan ra nieno ekkewe sounengin Kot, me uweirenong non fotek.

10 Iwe non ewe fansoun ua nengeni me kuna chommong matau; iwe ra aimu feseni ekkewe chon Gentile seni mwirimwirin pwi kewe.

11 Iwe non ewe fansoun ewe chon nang a apasa ngeniei: Nengeni ewe songen Kot mi nonnom won mwirimwirin pwium kewe.

12 Iwe ua nengeni me kuna emon mwan nein ekkewe chon Gentile, i a kaimu seni mwirimwirin pwi kewe ren ekkewe chommongun matau; iwe ua kuna ewe Ngunun Kot, pwe a feitiw me angang won ewe mwan; iwe a feino won ekkewe chommongun matau, pwan mwo nge ngeni mwirimwirin pwi kewe, ekkewe ra nonnom non ewe fonuen pwon.

13 Iwe non ewe fansoun ua kuna ewe Ngunun Kot, pwe a angang won pwan ekkoch ekkewe chon Gentile; iwe ra tou seni fotek, won ekkewe chommongun konik.

14 Iwe non ewe fansoun ua kuna chommong mwicheichen ekkewe chon Gentile won ewe fonuen pwon; me ua kuna ewe songen Kot, pwe a nonnom won mwirimwirin pwi kewe; iwe ra paras fetan me mwen ekkewe chon Gentile me ra ninni.

15 Iwe ua kuna ewe Ngunun ewe Samon, pwe a nonnom won ekkewe chon Gentile, iwe ra feioch me angei ewe fonu pwe epwe fonuen mwirimwirir kewe; iwe ua kuna pwe ir mi pwechepwech, me fokkun murino me nioch, usun nei kewe aramas me mwen ar we ninnino.

16 Iwe non ewe fansoun ngang, Nifai, ua kuna pwe ekkewe chon Gentile ekkewe ra tou seni fotek ra atipetekisoner me mwen ewe Samon; iwe ewe manamanen ewe Samon a nonnom rer.

17 Iwe ua kuna pwe ekkewe inen ekkewe chon Gentile ra ioi fengen won ekkewe konik, me pwan won ewe fonu, pwe repwe maun ngeni ir.

18 Iwe ua kuna pwe ewe manamanen Kot a nonnom rer, me pwan ewe songen Kot a nonnom won meinisin ekkewe ra ioi fengen pwe repwe maun ngeni ir.

19 Iwe ngang, Nifai, ua kuna pwe ekkewe chon Gentile mi tou seni fotek ra ngaseno ren ewe manamanen Kot seni ne poun meinisin ekkoch ekkewe muu.

20 Iwe non ewe fansoun ngang, Nifai, ua kuna pwe ra feioch non ewe fonu; iwe ua kuna ew puk, iwe a kekino neir.

21 Iwe ewe chon nang a apasa ngeniei: Ka sinei wewen ewe puk?

22 Iwe ua apasa ngeni i: Ngang use sinei.

23 Iwe a apasa: Nengeni a tou seni awen emon chon Jew. Iwe ngang, Nifai, ua kuna; iwe a apasa ngeniei: Ewe puk ka kuna a ew uruon ekkewe chon Jew, minne a masoweni ekkewe pwon mi pin an ewe Samon, minne i a fori ngeni ewe imwen Israel; me a pwan masoweni chommong osini seni ekkewe soufos mi fel; iwe a ew uruo usun ekkewe mak minne ra nom won ekkewe seleichen brass, tiwenon chok rese kon chommong; nge inamo, ra masoweni ekkewe pwon mi pin an ewe Samon, minne i a fori ngeni ewe imwen Israel; ina minne, a napanap auchear ngeni ekkewe chon Gentile.

24 Iwe ewe chon nangin ewe Samon a apasa ngeniei: Ka fen kuna pwe ewe puk a tou seni awen emon chon Jew; iwe nupwen a tou seni awen emon chon Jew a masoweni ewe unusochun ewe kapas allimen ewe Samon, usun ion ekkewe engon me ruemon aposel ra pwarata usun; iwe ra pwarata anongonong won ewe ennet minne mi nom non ewe Namen Kot.

25 Ina minne, ekkei mettoch ra feino seni ekkewe chon Jew non nimenimoch ngeni ekkewe chon Gentile, anongonong won ewe ennet minne a nom non Kot.

26 Iwe mwirin ra feino seni ne poun ekkewe engon me ruemon aposel noun ewe Nam, seni ekkewe chon Jew ngeni ekkewe chon Gentile, kopwe kuna ewe forutan ewe pochokunen me anieputen mwichefen, minne a wesen anieput seni meinisin ekkoch mwichefen; pun nengeni, ra angeiano seni ewe kapas allimen ewe Nam chommongun kinikinin minne ra fatafatoch me fokkun auchea; me pwan chommong pwon mi pin an ewe Samon ra angeireno.

27 Iwe ekkei mettoch meinisin ra fori pwe repwe tongeni angawano ekkewe kokkot mi pung an ewe Samon, pwe repwe achunna mesen me apochokunano netipen ekkewe noun aramas.

28 Ina minne, ka kuna pwe mwirin ewe puk a feino non poun ewe pochokunen me anieputen mwichefen, pwe a chommong ekkewe mettoch mi fatafatoch me fokkun auchea ra angeireno seni ewe puk, minne ewe puken ewe Namen Kot.

29 Iwe mwirin ar ra angeiano ekkei mettoch mi fatafatoch me fokkun auchea a feino ngeni meinisin ekkewe muun ekkewe chon Gentile; iwe mwirin a feino ngeni meinisin ekkewe muun ekkewe chon Gentile, ewer, pwan mwo tori unusen ekkewe chommongun matau minne ka kuna fiti ekkewe chon Gentile minne ra fen tou seni fotek, ka kuna—pokiten ekkewe chommongun mettoch mi fatafatoch me fokkun auchea ra fen angeireu seni ewe puk, minne ra fatafatoch ngeni an ekkewe noun aramas weweiti, a anongonong ngeni ewe fatafatoch minne a nom non ewe Namen Kot—pokiten ekkei mettoch minne ra angeireu seni ewe kapas allimen ewe Nam, a fokkun chommong ra turuno, ewer, ina minne a watte an Setan pochokun wor.

30 Nge inamo, ka kuna pwe ekkewe chon Gentile ekkewe ra tou seni fotek, iwe ra fen kekita seni ewe manamanen Kot asen seni meinisin ekkewe ekkoch muu, won unusen ewe fonu minne a kefinita seni meinisin ekkewe ekkoch fonu, ina ewe fonu ewe Samon Kot a fori ew pwon mi pin ngeni semom we pwe mwirimwirin kewe repwe fonueni pwe epwe fonuen mwirimwirir kewe; ina minne, ka kuna pwe ewe Samon Kot esap mut ngeni ekkewe chon Gentile pwe repwe wesen nieno meinisin mwirimwirum kewe mi nofit fengen, minne ra nom nein pwium kewe.

31 Esap pwan mut ngeni ekkewe chon Gentile pwe repwe nieno mwirimwirin pwium kewe.

32 Ewe Samon esap pwan mut ngeni ekkewe chon Gentile pwe repwe nometiw non ewe anoninenin napanapen chun, minne ka kuna pwe ra nom non, pokiten ekkewe kinikin mi fatafatoch me fokkun auchea an ewe kapas allimen ewe Nam minne ra fen mochutiw me ren ewe anieputen mwichefen, ewe forutan ka fen kuna.

33 Ina minne anon ewe Namen Kot: Ngang upwe kirekiroch ngeni ekkewe chon Gentile, tori ewe wareton nussun ewe imwen Israel non kapung napanap.

34 Iwe non ewe fansoun ewe chon nangin ewe Samon a kapas ngeniei, a apasa: Nengeni, anon ewe Namen Kot, mwirin ai ua churi nussun ewe imwen Israel—iwe ei nussun minne ua kapas usun ina mwirimwirin semom we—ina minne, mwirin ua fen churir non kapung, me ametekir seni poun ekkewe chon Gentile, iwe mwirin an ekkewe chon Gentile ra fokkun turuno, pokiten ekkewe kinikin mi fatafatoch me fokkun auchea an ewe kapas allimen ewe Nam minne ra mochuno me ren ewe anieputen mwichefen, ina ewe inen ekkewe fin nisou, anon ewe Nam—upwe kirekiroch ngeni ekkewe chon Gentile non ena ran, ina minne upwe wano ngeni ir, non ai pwisin manaman, unusen ai we kapas allim, minne epwe fatafatoch me fokkun auchea, anon ewe Nam.

35 Pun, nengeni, anon ewe Nam: Upwe pwari inisi ngeni mwirimwirum kewe, pwe repwe makkei chommong mettoch minne upwe afanafana ngenir, minne repwe fatafatoch me fokkun auchea; iwe mwirin mwirimwirum kewe repwe mano, me kukkununo non ar nuku, iwe pwan mwirimwirin pwium kewe, nengeni, ekkei mettoch repwe opano, pwe repwe wouto ngeni ekkewe chon Gentile, me ren ewe niffang me manamanen ewe Nam.

36 Iwe non ir epwe mak ai we kapas allim, anon ewe Nam, me ai we foun fau me ai amanau.

37 Iwe feioch ngeni ekkewe repwe kutta ar repwe forata ai we Zion non na ran, pun repwe angei ewe niffang me ewe manamanen ewe Ngun mi Fel; iwe ika repwe nikitu ngeni nesoponon repwe seikita non ewe ran soponon, iwe repwe manau non ewe muu esemuch an ewe Nam; iwe ion epwe afanafana kinamwe, ewer, ekkewe porousen pwapwa chapur, ifa me ningen won ekkewe chuk repwe nonnom won.

38 Iwe non ewe fansoun ua kuna nussun mwirimwirin pwi kewe, me pwan ewe puken ewe Namen Kot, minne a feino seni awen ewe chon Jew, pwe a feito seni ekkewe chon Gentile ngeni nussun mwirimwirin pwi kewe.

39 Iwe mwirin an a feito ngeni ir ua kuna pwan ekkoch puk, minne ra feito seni ewe manamanen ewe Nam, seni ekkewe chon Gentile ngeni ir, tori pesepesen ekkewe chon Gentile me nussun mwirimwirin pwi kewe, iwe pwan ekkewe chon Jew ekkewe ra paras fetan won unusen ewe fonufan, pwe ekkewe uruon ekkewe soufos me uruon ekkewe engon me ruemon aposel noun ewe Nam ra ennet.

40 Iwe ewe chon nang a kapas ngeniei, a apasa: Ekkei amuchunon uruo, minne ka fen kuner me nein ekkewe chon Gentile, repwe apungano ewe ennetin ekkewe aewin uruo, minne ir seni ekkewe engon me ruemon aposel noun ewe Nam, iwe repwe pwarano ekkewe mettoch mi fatafatoch me fokkun auchea minne ra fen angeiano senir; iwe repwe pwarano ngeni meinisin einang, sokopaten kapas, me aramas, pwe ewe Namen Kot i Noun ewe Sam Esemuch, me ewe Chon Amanauen ewe fonufan; iwe pwe mi auchea aramas meinisin repwe feito ngeni i, are esap ina resap tongeni manau.

41 Iwe repwe feito anongonong won ekkewe kapas minne repwe foruta seni awen ewe Nam; iwe ekkewe kapasen ewe Nam repwe pwano non ekkewe uruon mwirimwirum kewe, pwan usun non ekkewe uruon ekkewe engon me ruemon aposel noun ewe Nam; ina minne ir me ru repwe foruno non ew; pun mi wor emon Kot me emon Chon Masen Siip won unusen ewe fonufan.

42 Iwe ewe fansoun epwe feito pwe i epwe pwarano inisin ngeni meinisin muu, ngeni ekkewe chon Jew me pwan ngeni ekkewe chon Gentile; iwe mwirin an a pwarano inisin ngeni ekkewe chon Jew me pwan ngeni ekkewe chon Gentile, iwe i epwe pwarano inisin ngeni ekkewe chon Gentile me pwan ngeni ekkewe chon Jew, iwe ewe mi kukumwir epwe akkom, iwe ewe a akkom epwe ne kukumwir.