1 Iwe non ewe fansoun ua kapas ngeni pwi kewe, ua apasa: Sipwene pwan niwinsefanita ngeni Jerusalem, iwe sipwene nikitu ne aneasochisi ekkewe annuk an ewe Samon; pwe nengeni i a pochokun seni unusen ewe fonufan, nge pwata esap pochokun seni Laban me noun kewe nime aramas, ewer, ika pwan mwo seni noun engon ngorowun aramas?

2 Iei minne sipwe feita; sipwe pochokun usun chok Moses; pun i a ennetin kapas ngeni ekkewe konikin ewe Setipar me ra kinikin fesen epek ngeni epek, iwe semach kewe ra tou seni ewe sat, tou seni fotek, won puun mi pwasapwas, me ekkewe sounfiun Pharaoh ra tapweno mwirir me ra manum non ekkewe konikin ewe Setipar.

3 Iwe nengeni ami mi sinei pwe ei porous mi ennet; me oua pwan sinei pwe emon chon nang a kapas ngenikemi; ina minne pwata oupwe tipemwaramwar? Sipwene feita; ewe Samon mi tongeni angasa kich, usun chok semach kewe, me epwe nieno Laban, usun chok ekkewe chon Egypt.

4 Iwe nupwen ua apasa ekkei kapas, ir mi chiwen chok song, me soposopono ne ngunungun; nge inamo nge ir mi tapweto mwiri ne feita tori am aua tori nukun ekkewe tittin Jerusalem.

5 Iwe non ewe fansoun nepwin; ua pesei ngenir pwe repwe opano pwisin inisir nukun ekkewe tit. Iwe mwirin ra pwisin opareno, ngang, Nifai, ua annifenong non ewe teninimw me ua feino ngeni ewe imwan Laban.

6 Iwe ua emmwen me ren ewe Ngun, use sinei met me mwen ekkewe mettoch minne ngang upwe fori.

7 Nge inamo ngang uwa feino mwei, iwe nupwen ua feino arap ngeni imwen Laban we ua kuna emon mwan, me i a fen turuno won ewe pwun me mwei, pun a sakaweno ren wain.

8 Iwe nupwen ua feino ngeni i ua kuna pwe i Laban.

9 Iwe ua nengeni noun we ketinas, me ua uttau seni tukutukun we; me pachan we a seni chok gold, me ewe napanapan a fokkun murino, iwe ua kuna pwe inisin we a for seni mecha mi fokkun auchea.

10 Iwe non ewe fansoun ua pesepes me ren ewe Ngun pwe upwene nieno Laban; nge ua apasa non netipei: Esap mwo fan ew ai upwe assuku chan emon aramas. Iwe ua maresefan pwe ita usap nieno i.

11 Iwe ewe Ngun a apasa sefani ngeniei: Nengeni ewe Samon a fen wanong i non poum. Ewer, me ua pwan sinei pwe i a achocho an epwe angeiano pwisin manauei; ewer, me i ese mochen aneasochisi ekkewe annukun ewe Samon; me i a pwan angeiano pisekim kewe.

12 Iwe non ewe fansoun ewe Ngun a pwan apasa sefani ngeniei: Nieno i, pokiten ewe Samon a wanong i non poum;

13 Nengeni ewe Samon a nieno ekkewe aramas mi ngaw pwe epwe forata an kewe kokkot mi wenechar. Mi murino emon aramas epwe mano nap seni an ew muu epwe kisino me mano non ar rese nuku.

14 Iwe iei, nupwen ngang, Nifai, ua rong ekkei kapas, ua chemeni ekkewe kapasen ewe Samon minne a apasa ngeniei me non ewe fonu pon, a apasa pwe: Non ukukun an mwirimwirum repwe aneasochisi ai kewe annuk, repwe feioch me non ewe fonuen pwon.

15 Ewer, me ngang ua pwan ekieki pwe resap tongeni aneasochisi ekkewe annukun ewe Samon anongonong won ewe annukun Moses, tiwenon chok ika ra annomu ewe annuk.

16 Iwe ngang mi pwan sinei pwe ewe annuk a makketiw won ekkewe seleichen brass.

17 Iwe pwan, ngang uwa sinei pwe ewe Samon a wanong Laban non pei ren ei popun—pwe upwe tongeni angei ekkewe uruo usun an kewe annuk.

18 Iei minne ua aneasochisi ewe mongungun ewe Ngun, iwe ua angei Laban ren onen mokuran, me ua pokueno mokuran ren pwisin noun we ketinas.

19 Iwe mwrin ai pokueno uwan ngeni pwisin noun we ketinas, ua angei ufan Laban kewe me pwinitanong won inisi; ewer, pwan mwo ew me ew kukkunun kinikinin; me ua rieta ufan we fouten eppet won nukanapei.

20 Iwe mwirin ai ua wes ne fori ei, ua feino ngeni ewe nenien isois pisek auchea an Laban. Iwe nupwen ai feino ngeni ewe nenien isois pisek auchea an Laban, nengeni, ua kuna ewe chon angang noun Laban ewe a isoni ekkewe kien ewe nenien isois pisek auchea. Iwe ua annuku ngeni non ngingin Laban, pwe epwe fitieino ngeni ewe nenien isois pisek auchea.

21 Iwe a ekieki pwe ngang noun we masta, Laban, pwe a kuna ekkewe uf me pwan ewe ketinas a riri ngeni won nukanapei.

22 Iwe a kapas ngeniei usun ekkewe chinnapen ekkewe chon Jew, pun i mi sinei pwe noun we masta, Laban, a fen tou nukun fansoun ewe pwinin a nonnom neir.

23 Iwe ua kapas ngeni usun ita nge ngang Laban.

24 Iwe ua pwan kapas ngeni i pwe ngang upwe wei ekkewe mak, minne ra nonnom won ekkewe seleichen brass, ngeni pwi kewe watte, ekkewe ra nonnom nukun ekkewe tit.

25 Iwe ua pwan ereni pwe epwe tapweto muri.

26 Iwe i, pokiten a ekieki pwe ua kapas usun mwanin ewe mwichefen, me a ekieki pwe ngang wesewesen Laban ewe ua fen nieno, ina minne i a tapweto muri.

27 Iwe a kapas ngeniei fan chommong usun ekkewe chinnapen ekkewe chon Jew, nupwen ua feino ngeni pwi kewe, ekkewe ra nonnom nukun ekkewe tit.

28 Iwe non ewe fansoun nupwen Leiman a kunaei a fokkun nuokus chapur, me pwan Lemuel me Sam. Iwe ra su me mwei; pun ra ekieki pwe ngang Laban, nge a nieino me a achocho ngeni an epwe pwan angeiano manauer.

29 Iwe non ewe fansoun ua kokkono mwirir, iwe ra rong nouei; ina minne ra kouno ne su me mwei.

30 Iwe non ewe fansoun nupwen ewe chon angang noun Laban a kuna pwi kewe a poputa ne chechech, iwe ita epwene su me mwei me niwiniti ewe teninimwen Jerusalem.

31 Iwe iei ngang, Nifai, pokiten ua emon mwan mi watte non pekin inis, me pwan pokiten ua angei watte pochokun seni ewe Samon, iei minne ua supuri ewe chon angang noun Laban, me ua amwochu, pwe esap tongeni suno.

32 Iwe non ewe fansoun ua kapas ngeni i, pwe are epwe aneasochis ngeni ai kewe kapas, usun ewe Samon mi manau, me usun ngang mi manau, ika mwo pwe epwe aneasochis ngeni am kewe kapas, iwe am ausap angeiano manauan.

33 Iwe ua kapas ngeni i, pwan fiti ew pwon ua akkaponu, pwe i esap nuokus; pwe i epwe emon aramas mi ngaseno usun chok am ika pwe epwe fiti kem ne feitiw non ewe fonu pon.

34 Iwe ua pwan kapas ngeni i, ua apasa: Ennet ewe Samon a annuku kem pwe am aupwe fori ei mettoch; iwe met am ausap tumunuoch ne apwonueta ekkewe annukun ewe Samon? Iei minne, ika pwe kopwe feitiw non ewe fonu pon ngeni semei we epwe wor neniom rem.

35 Iwe non ewe fansoun Soram a apinukunuk ren ekkewe kapas minne ua apasa. Iwe Soram ina iten ewe chon angang; iwe a pwon pwe epwe feitiw non ewe fonu pon ren semem we. Ewer, me a fori ew pwon a akkaponu ngenikem pwe i epwene nonnom rem seni ena fansoun tori feino.

36 Iei am aua wesen mochen pwe i epwene nomono rem ren ei popun, pwe ekkewe chon Jew resap sinei usun am we suno ngeni ewe fonu pon, pokiten am aua noninen ika ra tapweto mwirim me nikemino.

37 Iwe non ewe fansoun nupwen Soram a fori ew pwon a akkaponu ngenikem, am kewe noninen usun i a wesino.

38 Iwe non ewe fansoun am aua angei ekkewe seleichen brass me ewe chon angang noun Laban, me feino ngeni ewe fonu pon, me sai ngeni ewe imw mangaku an semem we.