1 U issa ġara li wara li jien, Nefi, waqaft inkellem lil ħuti, araw huma qaluli: Inti għidtilna kliem iebes, wisq aktar milli aħna kapaċi nġarrbu.

2 U ġara li jien għidtilhom li jien kont naf li jiena kont għidtilhom kliem iebes kontra l‑ħżiena, skont dak li hu veru; u lit‑twajbin jiena ġġustifikajt, u stqarrejt li huma sejrin jiġu mgħollija ’l fuq fl‑aħħar jum; għalhekk, il‑ħatja jsibuha diffiċli jaċċettaw il‑verità, għaliex tolqothom fil‑laħam il‑ħaj.

3 U issa ħuti, jekk intom kontu fis‑sewwa u kontu lesti tisimgħu l‑verità, u tagħtu kasha, biex tkunu tistgħu timxu fis‑sewwa quddiem Alla, allura intom ma tilmentawx minħabba l‑verità, u tgħidu: Inti għidt kliem iebes kontrina.

4 U ġara li jiena, Nefi, ħeġġiġt lil ħuti, biex bir‑reqqa kollha jħarsu l‑kmandamenti tal‑Mulej.

5 U ġara li huma umiljaw ruħhom quddiem il‑Mulej; tant illi jiena mtlejt bil‑hena u b’tama kbira għalihom, li huma kienu sejrin jimxu fil‑mogħdijiet tas‑sewwa.

6 Issa, dan kollu ntqal u seħħ waqt li missieri kien qed jgħammar f’tinda fil‑wied li huwa semmieh Lemwel.

7 U ġara li jiena, Nefi, iżżewwiġt lil waħda minn ulied Ismagħel; u anke ħuti żżewġu lill‑ulied bniet ta’ Ismagħel; u anke Żoram iżżewweġ lit‑tifla l‑kbira ta’ Ismagħel.

8 U b’hekk missieri wettaq il‑kmandamenti kollha tal‑Mulej li ġew mogħtija lilu. U jien, Nefi, ġejt ukoll imbierek bil‑kbir mill‑Mulej.

9 U ġara li leħen il‑Mulej kellem lil missieri matul il‑lejl, u ordnalu biex hekk kif jisbaħ huwa għandu jitlaq lejn id‑deżert.

10 U ġara li hekk kif missieri qam filgħodu, u resaq lejn il‑bieb tat‑tinda, huwa baqa’ mistagħġeb hekk kif mal‑art huwa ra globu tond magħmul b’sengħa liema bħalha; u hu kien magħmul minn ram mill‑aktar fin. U fil‑globu kien hemm żewġ imgħażel; u wieħed minnhom beda jindika d‑direzzjoni ta’ fejn kellna mmorru fid‑deżert.

11 U ġara li aħna ġbarna kull ħaġa li kienet meħtieġa li nieħdu magħna fid‑deżert, u l‑bqija ta’ dak kollu li l‑Mulej kien tana; u aħna ħadna magħna kull tip ta’ żerriegħa li aħna stajna nġorru magħna fid‑deżert.

12 U ġara li aħna ħadna magħna t‑tined tagħna u tlaqna lejn id‑deżert, fin‑naħa l‑oħra tax‑xmara Laman.

13 U ġara li aħna għamilna erbat ijiem mexjin fid‑direzzjoni ta’ bejn in‑nofsinhar u x‑xlokk, u aħna erġajna tellajna t‑tined tagħna; u l‑post semmejnieh Sażer.

14 U ġara li aħna ħadna magħna l‑qwas tagħna u l‑vleġeġ tagħna, u tlaqna għall‑kaċċa fid‑deżert biex niksbu l‑ikel għall‑familji tagħna; u wara ħin nikkaċċjaw għall‑familji tagħna, aħna erġajna lura lejn il‑familji tagħna ġo Sażer fid‑deżert. U aħna erġajna tlaqna lejn id‑deżert, fejn qbadna l‑istess direzzjoni u żammejna mal‑aktar inħawi fertili tad‑deżert, li kienu mal‑fruntiera ħdejn il‑Baħar tal‑Qasab.

15 U tul it‑triq aħna għaddejna bosta jiem nivvjaġġaw, u nikkaċċjaw, permezz tal‑qwas tagħna u l‑vleġeġ tagħna u permezz tal‑ġebliet tagħna u l‑iżbandoli tagħna.

16 U aħna mxejna mad‑direzzjoni tal‑globu, li wassalna sa l‑aktar inħawi fertili tad‑deżert.

17 U wara li għamilna bosta jiem nivvjaġġaw, aħna għaddejna ftit ħin intellgħu t‑tined tagħna, ħalli nkunu nistgħu nerġgħu nistrieħu ftit u wara mmorru niksbu l‑ikel għall‑familji tagħna.

18 U ġara li hekk kif jiena, Nefi, mort għall‑kaċċa, araw, jien inqasamli l‑qaws, li kien magħmul minn azzar mill‑aktar fin; u wara li nqasamli l‑qaws, araw, ħuti ħaduha kontrija peress li kont spiċċajt bla qaws, u ma stajna niksbu l‑ebda ikel.

19 U ġara li aħna erġajna lura għand il‑familji tagħna mingħajr ikel, u għax kienu għajjiena ħafna, minħabba l‑vjaġġ tagħhom, huma spiċċaw batew ħafna minħabba n‑nuqqas ta’ ikel.

20 U ġara li Laman u Lemwel u l‑ulied subien ta’ Ismagħel bdew jilmentaw ħafna, minħabba t‑tbatija u l‑hemm tagħhom fid‑deżert; u anki missieri beda jilmenta kontra l‑Mulej Alla tiegħu; iva, u huma kienu lkoll imnikkta bil‑kbir, tant li bdew jilmentaw kontra l‑Mulej.

21 U ġara li jiena, Nefi, kont qed inbati wkoll flimkien ma’ ħuti minħabba li kont spiċċajt bla qaws, u l‑qwas tagħhom kienu tilfu l‑elastiċità tagħhom, u s‑sitwazzjoni bdiet issir tassew diffiċli, iva, tant li ma stajna niksbu l‑ebda ikel.

22 U ġara li jiena, Nefi, tkellimt ħafna ma’ ħuti, għaliex huma reġgħu webbsu qalbhom, fejn anki bdew jilmentaw kontra l‑Mulej Alla tagħhom.

23 U ġara li jiena, Nefi, għamilt qaws mill‑injam, u minn zokk irqiq għamilt vleġġa; għalhekk, jien armajt ruħi permezz ta’ qaws u vleġġa, u permezz ta’ żbandola u ftit ġebliet. U jien għidt lil missieri: Fejn għandi mmur biex nikseb l‑ikel?

24 U ġara li huwa staqsa lill‑Mulej, għaliex huma umiljaw ruħhom minħabba dak li jiena kont għidtilhom; għax jien għidtilhom bosta ħwejjeġ bl‑enerġija kollha ta’ ruħi.

25 U ġara li missieri sama’ leħen il‑Mulej; u huwa qala’ tbeżbiża sew minħabba li beda jilmenta kontra l‑Mulej, tant illi huwa spiċċa fil‑wied tan‑niket.

26 U ġara li leħen il‑Mulej kellmu u qallu: Ħares lejn il‑globu, u ara x’hemm miktub fuqu.

27 U ġara li meta missieri ra l‑ħwejjeġ li kienu miktubin fuq il‑globu, huwa beda jibża’ u jitriegħed bil‑kbir, u l‑istess ħuti u l‑ulied subien ta’ Ismagħel u n‑nisa tagħna.

28 U ġara li jiena, Nefi, rajt li l‑imgħażel li kien hemm fil‑globu kienu jiffunzjonaw skont il‑fidi u d‑diliġenza tagħna u skont kemm aħna nagħtuhom attenzjoni.

29 U fuqhom kien hemm miktub ukoll kitba ġdida, illi setgħet tinqara b’mod faċli, li tatna ċertu għarfien dwar it‑triqat tal‑Mulej; u din il‑kitba nkitbet u bdiet tinbidel minn ħin għall‑ieħor skont il‑fidi u d‑diliġenza li bdejna nagħtuha. U b’hekk naraw li permezz ta’ mezzi żgħar il‑Mulej iwettaq ħwejjeġ kbar.

30 U ġara li jiena, Nefi, mort u tlajt fuq il‑quċċata tal‑muntanja, skont l‑istruzzjonijiet li ngħataw fuq il‑globu.

31 U ġara li jiena mort u qtilt bhejjem selvaġġi, hekk li jien ksibt biżżejjed ikel għall‑familji tagħna.

32 U ġara li jien erġajt lura fit‑tined tagħna, inġorr il‑bhejjem li kont qtilt; u issa, meta huma raw li jiena kont ipprovdejtilhom l‑ikel, kemm kienet kbira l‑hena tagħhom! U ġara li huma umiljaw ruħhom quddiem il‑Mulej, u lilu huma raddew ħajr.

33 U ġara li aħna erġajna komplejna bil‑vjaġġ tagħna, u għaddejna kważi mill‑istess rotta ta’ qabel; u wara li għamilna bosta jiem nivvjaġġaw aħna tellajna t‑tined tagħna, sabiex ngħaddu ftit żmien hemmhekk.

34 U ġara li Ismagħel miet, u ġie midfun f’post li kien jismu Naħom.

35 U ġara li l‑ulied bniet ta’ Ismagħel ħassewhom imnikkta bil‑kbir, minħabba n‑nuqqas ta’ missierhom, u minħabba l‑hemm tagħhom fid‑deżert; u huma bdew jilmentaw kontra missieri, għaliex huwa kien ħariġhom mill‑art ta’ Ġerusalemm, u bdew jgħidu: Missierna mejjet; iva, u aħna ilna ħafna niġġerrew fid‑deżert, u batejna ħafna ġuħ u għatx, u esperjenzajna ħafna taħbit u għeja kbira; u wara din it‑tbatija kollha aħna se nispiċċaw immutu bil‑ġuħ fid‑deżert.

36 U b’dan il‑mod huma bdew jilmentaw kontra missieri, kif ukoll kontrija; u huma wrew ix‑xewqa li jerġgħu lura Ġerusalemm.

37 U Laman qal lil Lemwel kif ukoll lill‑ulied subien ta’ Ismagħel: Araw, ejjew noqtlu lil missierna, kif ukoll lil ħuna Nefi, li ħa fuqu r‑responsabbiltà li jkun il‑mexxej tagħna u l‑għalliem tagħna, minkejja li aħna ħutu l‑kbar.

38 Issa, huwa jgħid li l‑Mulej tkellem miegħu, u li anki l‑anġli niżlu jaqduh. Iżda araw, aħna nafu li huwa mhuwiex jgħidilna l‑verità; u qed jgħidilna dawn il‑ħwejjeġ, u qed iwettaq bosta ħwejjeġ permezz tal‑qerq makakk tiegħu, biex ikun jista’ jqarraq b’għajnejna, għax forsi jaħseb li jista’ jeħodna f’xi xagħri selvaġġ; u wara li jkun ħadna hemm, jaħseb li jista’ jagħmel lilu nnifsu xi sultan jew mexxej fuqna, ħalli jkun jista’ jagħmel bina dak li jrid u li jogħġbu. U kien b’dan il‑mod li ħija Laman beda jxewwixhom, sakemm huma mtlew bil‑korla.

39 U ġara li l‑Mulej kien magħna, iva, u saħansitra nstema’ leħen il‑Mulej u qalilhom ħafna ħwejjeġ, u tahom tbeżbiża sew; u wara t‑tbeżbiża li qalgħu permezz ta’ leħen il‑Mulej, huma ma baqgħux aktar mimlijin korla, iżda huma nidmu minn dnubiethom, tant li l‑Mulej reġa’ berikna bl‑ikel, sabiex ma ninqerdux.