1 Ha ojehu upe rire che, Nefi, añeʼẽmba rire che joykeʼykuérape, péina ápe haʼekuéra heʼi chéve: Nde ere oréve mbaʼe hatãva, hatãvéva umi ikatúva rogueropuʼakágui.

2 Ha ojehu che haʼe chupekuéra aikuaaha añeʼẽhague ñeʼẽ hatãva umi iñañáva rehe, pe añeteháicha; ha umi hekojojávape ahustifika, ha ameʼẽ testimónio haʼekuéra oñemopuʼãtaha pe ára pahápe; upévare, umi iñangaipávape g̃uarã pe añetegua hatã, oikutúgui chupekuéra mbytete peve.

3 Ha koʼág̃a che joykeʼykuéra, peẽ penderekojoja ha pehendusérire pe añetéva, ha pejesarekórire, peguatajoja hag̃ua Tupã renondépe, ndapekaguairivaʼerãmoʼã pe añetéva rehe, ha peje: Nde niko reñeʼẽ mbaʼe hatãva orerehe.

4 Ha ojehu che, Nefi, añemoñeʼẽ che joykeʼykuérape, opa jesarekópe, iñeʼẽrendu hag̃ua hikuái Ñandejára rembiapoukapykuérare.

5 Ha ojehu oñemomirĩ hikuái Ñandejára renondépe; ha añandu vyʼa ha tuicha ñehaʼarõ, oikotaha hikuái umi tape hekojojávare.

6 Koʼág̃a, opaite koʼã mbaʼe ojeʼe ha ojejapo che ru oiko aja peteĩ ogaaópe yvytypaʼũ haʼe omboheravaʼekue Lemuel-pe.

7 Ha ojehu che, Nefi, ajagarra che rembirekorã peteĩva Ismael rajy; ha avei, che joykeʼykuéra ojagarra Ismael rajykuéra hembirekorã; ha avei Zoram ojagarra hembirekorã Ismael rajy ypykue.

8 Ha péicha che ru okumpli opa Ñandejára rembiapoukapykuéra oñemeʼẽvaʼekue chupe. Ha avei, che, Nefi, tuicha ajehovasákuri Ñandejára rehe.

9 Ha ojehu pe Ñandejára ñeʼẽ oñeʼẽ che rúpe pyharekue, ha heʼi chupe koʼẽmba rire oho jey hag̃ua hapére pe taveʼỹre.

10 Ha ojehu che ru opuʼãvo pyharevekue, ha ohóvo pe ogaao rokẽme, ñeimoʼãʼỹ guasúpe ohecha pe yvýpe peteĩ esfera iporãitereíva; ha bronce-gui ijejapopyre. Ha pe esfera-pe oĩ mokõi ju; ha peteĩva ohechauka pe tape rohovaʼerãre pe taveʼỹre.

11 Ha ojehu rombyaty mbaʼekuéra roguerahavaʼerã pe taveʼỹme, ha opa ore mbaʼe Ñandejára omeʼẽvaʼekue oréve; ha rombyaty opáichagua yva raʼỹi rogueraha hag̃ua pe taveʼỹme.

12 Ha ojehu rojagarra ore ogaao ha roho pe taveʼỹre, ha rohasa ysyry Lamán mboypýri.

13 Ha ojehu irundy ára pukukue, roho peteĩ tape ohóva sudeste gotyo, ha romoĩ jey ore ogaaokuéra; ha rombohéra upe tendápe Shazer.

14 Ha ojehu rojagarra ore yvyrapã ha ore huʼy, ha rosẽ taveʼỹre rojuhu hag̃ua tembiʼu ore rogaguakuérape g̃uarã; ha rojuhu rire tembiʼu ore rogaguakuérape g̃uarã rojevy ore rogaguakuéra rendápe taveʼỹme, pe tenda hérava Shazer-pe. Ha roho jey pe taveʼỹre, ha rogueraha jey ore rape tuja, ha roho umi yvy iporãveháre pe taveʼỹme, oĩva Mar Rojo rembeʼýre.

15 Ha ojehu roguata rohóvo heta ára pukukue aja, ha tapére rojuka rohóvo mymba ore rembiʼurã, ore yvyrapã ha ore huʼy ha ore ita ha ore ondakuéra reheve.

16 Ha roho pe esfera ohechaukaháicha oréve, ha péva oregueraha umi tenda yvy iporãvehápe upe taveʼỹre.

17 Ha roguata rire rohóvo heta ára pukukue aja, romoĩ ore ogaaokuéra sapyʼarã, ikatu hag̃uáicha ropytuʼu jey ha rohupyty tembiʼu ore rogaguakuérape g̃uarã.

18 Ha ojehu che, Nefi; asẽrõguare agueru hag̃ua tembiʼu, péina ápe, amopẽ che yvyrapã, ojejapóva acero porãgui; ha amopẽ rire che yvyrapã, péina ápe, che joykeʼykuéra ipochy chendive amopẽ haguére che yvyrapã, ndaikatúigui upévare rohupyty tembiʼu.

19 Ha ojehu rojevy jey tembiʼuʼỹre ore rogaguakuéra rendápe, ha ikaneʼõitereígui hikuái, oguata heta haguére, heta ohasaʼasy hikuái tembiʼuʼỹre.

20 Ha ojehu Lamán ha Lemuel ha Ismael raʼykuéra oñepyrũ tuicha okaguai, ijehasaʼasy ha ijeikoʼasýre taveʼỹme; ha avei che ru oñepyrũ okaguai Ñandejára Itupã rehe; heẽ, ha maymáva haʼekuéra ojepyʼapyeterei, ha upéichagui okaguaíma hikuái Ñandejára rehe.

21 Ha koʼág̃a ojehu che, Nefi, ajeipyʼajopy che joykeʼykuéra ndive oñehundi haguére che yvyrapã, ha umi ijyvyrapã naimbaretevéimagui, oñepyrũma hasyeterei oréve, heẽ, upeichaitégui ndaikatuvéima rohupyty tembiʼu.

22 Ha ojehu che, Nefi, heta añeʼẽ che joykeʼykuérape, omohatã jeýgui hikuái ikorasõkuéra, okaguai peve Ñandejára Itupã rehe.

23 Ha ojehu che, Nefi, ajapo peteĩ yvyrapã yvyrágui, ha peteĩ huʼy, yvyra ikareʼỹvagui; upévare, amoĩ chejehe peteĩ yvyrapã ha peteĩ huʼy, ha peteĩ ónda ha itakuéra. Ha haʼe che rúpe: Moõpa ahavaʼerã ajuhu hag̃ua tembiʼu?

24 Ha ojehu haʼe oporandu Ñandejárape, oñemomirĩguikuri hikuái che ñeʼẽ rupi; haʼégui chupekuéra heta mbaʼe opa che ánga puʼaka reheve.

25 Ha ojehu Ñandejára ñeʼẽ ou che rúpe, ha añetehápe ojejaʼo chupe okaguai haguére Ñandejára rehe, ha upéicha rupi oñandu tuicha jepyʼapy.

26 Ha ojehu Ñandejára ñeʼẽ heʼi chupe: Emaʼẽ pe esfera-re, ha ehecha umi mbaʼe ojehaíva.

27 Ha ojehu che ru ohecha rire umi mbaʼe ojehaíva pe esfera ári, okyhyje ha tuicha oryrýi, ha avei che joykeʼykuéra ha Ismael raʼykuéra ha ore rembirekokuéra.

28 Ha ojehu che, Nefi, ahecha umi ju oĩva pe esfera-pe, ha ombaʼapo pe jerovia ha jesareko ore romoĩháicha hese.

29 Ha avei ojehai hiʼári peteĩ jehai pyahu, ndahasýiva ñamoñeʼẽ hag̃ua, ha omeʼẽ oréve kuaapy umi Ñandejára rapégui; ha ojehai ha oñemoambue sapyʼa pyʼa, pe jerovia ha jesareko ore romeʼẽva rupi chupe. Ha upéicha jahecha mbaʼe michĩ rupive Ñandejára ikatuha ojapo tuicha mbaʼe.

30 Ha ojehu che, Nefi, ajupi pe yvyty ruʼã meve, ojehechaukaháicha pe esfera ári.

31 Ha ojehu ajuka mymba kaʼaguy, ha upéicha ahupyty tembiʼu ore rogaguakuérape g̃uarã.

32 Ha ojehu ajevy jey ore ogaaokuérape, ha agueraha umi mymba ajukavaʼekue; ha ohechávo hikuái che ahupytyhague tembiʼu, tuichaiterei pe ivyʼakuéra! Ha ojehu oñemomirĩ hikuái Ñandejára renondépe, ha omeʼẽ chupe aguyje.

33 Ha ojehu roñepyrũ jey ore guata, ha roguata rohóvo pe tape rohomahague gotyo iñepyrũmby guive; ha roguata rire rohóvo heta ára pukukue romoĩ jey ore ogaaokuéra, ropyta hag̃ua upépe sapyʼarã.

34 Ha ojehu Ismael omano, ha oñeñotỹ upe tenda hérava Nahom-pe.

35 Ha ojehu Ismael rajykuéra tuicha ojaheʼo, omano haguére ituvakuéra, ha ijeikoʼasykuérare taveʼỹme; ha okaguai hikuái che ru rehe, oguenohẽ haguére chupekuéra Jerusalén retãgui, heʼívo: Ore ru omanóma; heẽ, ha ore roiko rei taveʼỹre, ha rohasa heta jeikoʼasy, vareʼa, yʼuhéi, ha kaneʼõ; ha opa koʼã jehasaʼasy rire romanóne ñembyahýigui ko taveʼỹme.

36 Ha upéicha okaguai hikuái che ru rehe, ha avei cherehe; ha ohose jey hikuái Jerusalén-pe.

37 Ha Lamán heʼi Lemuel-pe ha avei Ismael raʼykuérape: Péina ápe, jajuka ñande rúpe, ha avei ñande ryvy Nefi-pe, oñemoĩva ñande ári mburuvicha ha mboʼeháraramo, ñande niko haʼe itykeʼýra.

38 Koʼág̃a, heʼi Ñandejára oñeʼẽhague hendive, ha avei angelkuéra oministrahague chupe. Ha péina ápe, ñande niko jaikuaaporã ñanembotavyha; ha haʼe heʼi ñandéve koʼã mbaʼe, ha ojapo heta mbaʼe ikatupyrýgui, ombotavy hag̃ua ñande resa, haʼetévaicha, chupe g̃uarã, ñandeguerahátava tenda jaikuaaʼỹvape pe taveʼỹre; ha ñandegueraha rire, haʼe oñemoĩse ñande ári rréi ha sãmbyhyháraramo, ojapo hag̃ua ñandehegui haʼe ojaposéva ha oipotáva. Ha upeichagua ñeʼẽme che joykeʼy Lamán omokyreʼỹ ikorasõkuéra pochyrã.

39 Ha ojehu Ñandejára oĩ orendive, heẽ, Ñandejára ñeʼẽ ou ha oñeʼẽ chupekuéra heta ñeʼẽ, ha tuicha ojaʼo chupekuéra; ha ojaʼo rire chupekuéra Ñandejára ñeʼẽ ndaipochyvéi hikuái, ha oñearrepenti hikuái iñangaipakuéragui, ha upéicha rupi Ñandejára orerovasa jey tembiʼú reheve, ha noromanói.