1 Ut kik’ulman naq eb’ a’an ke’xloq’oni li Qaawa’, ut xkoheb’ wik’in, ut kiqapech’ li che’ chi chanchan li k’anjel ink’a’ nawb’il ru. Ut li Qaawa’ kixk’ut chiwu chi jo’q’ehaq chan ru tinpech’ wi’ li che’ re li jukub’.

2 Anajwan ut, laa’in, aj Nefi, ink’a’ kinpech’ li che’ jo’ chanru li tzolb’il xb’aaneb’ li winq, chi moko kinyiib’ li jukub’ jo’ chanru li neke’xb’aanu li winq; kinyiib’ b’an jo’ chanru li k’utb’il chiwu xb’aan li Qaawa’; jo’kan naq a’an moko jo’ chanru ta li neke’xb’aanu li winq.

3 Ut laa’in, aj Nefi, xkohin chi kok’ aj xsa’ sa’ li tzuul, ut kok’ aj xsa’ kintijok chiru li Qaawa’, jo’kan naq li Qaawa’ kixk’ut xninqal ru na’leb’ chiwu.

4 Ut kik’ulman naq chirix naq kinchoy li jukub’, jo’ chanru li raatin li Qaawa’, eb’ li was ke’xk’e reetal naq chaab’il, ut naq lix k’anjelankil q’axal chaab’il; jo’kan naq ke’xtuulanob’resi wi’chik rib’ chiru li Qaawa’.

5 Ut kik’ulman naq kichal lix yaab’ xkux li Qaawa’ rik’in lin yuwa’, naq toowakliiq ut toxoo’okaq sa’ li jukub’.

6 Ut kik’ulman naq wulajaq chik, chirix naq kiqakawresi chixjunil li k’a’aq re ru, naab’aleb’ li ru che’ ut li tib’ chalenaq chaq sa’ li yamyookil ch’och’, ut xya’al kab’ chi naab’al, ut li k’a’ru nak’anjelak qe jo’ chanru li kooxtaqla wi’ chaq li Qaawa’, koxoo’okaq sa’ li jukub’, rik’in chixjunil li qiiq ut li qiyaj, ut jo’ k’ihal kiqak’am chaq qik’in, ak re re xchihab’ li junjunq; jo’kan ut, kookub’e chiqajunil sa’ li jukub’, qochb’eeneb’ li qixaqil ut li qakok’al.

7 Ut anajwan, ke’yo’la chaq wiib’ li ralal lin yuwa’ sa’ li yamyookil ch’och’; li asb’ej aj Jakob kiyehe’ re, ut li iitz’inb’ej aj Jose.

8 Ut kik’ulman chirix naq kookub’e chiqajunil sa’ li jukub’, ut kiqak’am qik’in li k’a’ru nak’anjelak qe ut li k’a’aq re ru taqlanb’ilo wi’, xookoho chiru li palaw, ut kootiikisiik xb’aan li iq’ sa’ xjayal li yeechi’inb’il ch’och’.

9 Ut chirix naq kootiikisiik xb’aan li iq’ chiru xnumik k’iila kutan, k’ehomaq reetal, eb’ li was ut eb’ li ralal laj Ismael ut jo’kaneb’ ajwi’ li rixaqileb’ ke’ok chixsaylankileb’ xch’ool, jo’kan naq ke’ok chi xajok, ut chi b’ichank, ut chi aatinak chi k’a’jo’ xyib’al ru li raatineb’; relik chi yaal, jo’kan naq kisach sa’ xch’ooleb’ k’a’ru li wankilal ke’k’ame’ wi’ chaq toj aran; relik chi yaal, ke’xtaqsi rib’ chi q’axal b’atz’unb’il li raatineb’.

10 Ut laa’in, aj Nefi, kin’ok chi xuwak chi numtajenaq, maare anchal taajosq’o’q li Qaawa’ qik’in ut tooxsak’ xb’aan li qamaa’usilal, ut chi jo’kan toosub’e’q sa’ xchamal li palaw; jo’kan naq laa’in, aj Nefi, kin’ok chiraatinankileb’ chi anchal tiik ink’a’uxl; a’b’anan k’ehomaq reetal, eb’ a’an ke’chal xjosq’il wik’in, ut ke’xye: Ink’a’ taqakanab’ naq taawanq li qiitz’in choq’ aj taqlanel sa’ qab’een.

11 Ut kik’ulman naq laj Laman ut laj Lemuel kine’xchap ut kine’xb’ak’ rik’in k’aam, ut k’a’jo’ li rahilal ke’xb’aanu we; a’ut li Qaawa’ kixkanab’ chi uxmank re taaruuq chixk’utb’esinkil lix wankilal, choq’ re xtz’aqob’resinkil ru li raatin li ki’aatinak wi’ chirixeb’ laj maak.

12 Ut kik’ulman naq chirix naq kine’xb’ak’ toj reetal naq ink’a’ kinru chireek’asinkil wib’, li k’utleb’aal b’e, li kikawresiik chaq xb’aan li Qaawa’, kixkanab’ k’anjelak.

13 Jo’kan ut, ink’a’ ke’xnaw b’ar te’xb’eresi wi’ li jukub’, jo’kan naq kiwakli jun li nimla hab’; relik chi yaal, jun li nimla xuwajel kaq-sut-iq’, ut kootiikisiik chi q’ajel-ix chiru li ha’ chiru xnumik oxib’ kutan; ut ke’ok chi xuwak chi numtajenaq maare anchal te’ok chi ha’ sa’ li palaw; a’b’anan ink’a’ kine’rach’ab’.

14 Ut sa’ xkaa li kutan li kootiikisiik wi’ chi q’ajel-ix, ki’ok chi nimank xrahil li kaq-sut-iq’ chi numtajenaq.

15 Ut kik’ulman naq ok qe chi sub’e’k sa’ xchamal li palaw. Ut chirix naq kootiikisiik chaq chi q’ajel-ix chiru ha’ chiru xnumik kaahib’ kutan, eb’ li was ke’ok chirilb’al naq lix raqb’a-aatin li Dios wan sa’ xb’eeneb’, ut naq tento te’oso’q wi ink’a’ te’xjal xk’a’uxl chirixeb’ lix maa’usilal; jo’kan naq ke’chal wik’in, ut ke’xhit li k’aam sa’ xkux li wuq’, ut k’ehomaq reetal naq siipo’jenaq chi numtajenaq; ut jo’kan ajwi’ lix kux li woq k’a’jo’ xsiipo’jik, ut maak’a’jo’ xrahil.

16 A’b’anan laa’in kin’ilok wan wi’ lin Dios, ut kinnima ru chiru chixjunil li kutan, ut ink’a’ kinwech’i rix li Qaawa’ xb’aan li ch’a’ajkilal kink’ul.

17 Anajwan lin yuwa’, aj Lehi, kixye chaq k’iila k’a’aq re ru reheb’, ut reheb’ ajwi’ li ralal laj Ismael; a’b’anan k’ehomaq reetal, k’a’jo’ li rahilal ke’xyeechi’i chaq re li ani taa’aatinaq re intenq’ankil; ut eb’ lin na’ inyuwa’, rik’in naq ak numtajenaqeb’ chaq xchihab’, ut ak naab’al li rahil ch’oolejil ke’xnumsi chaq sa’ xk’ab’a’eb’ li ralal xk’ajol, ke’kub’siik, relik chi yaal, sa’ xch’aat li yajel.

18 Sa’ xk’ab’a’ lix k’a’uxleb’ ut xnimal lix rahileb’ xch’ool, ut lix maa’usilaleb’ li was, ka’ch’in chik ma xe’k’ame’ chaq chiru li yu’am a’in re xk’ulb’al lix Dios; relik chi yaal, lix saqi ismaleb’ ka’aj chik ma xk’ame’ chi yoklaak chi kub’enaq sa’ poqs; relik chi yaal, ka’ch’in chik ma xe’k’ehe’ rik’in rahil ch’oolejil sa’ jun li ha’il muqleb’aal.

19 Ut jo’kan ajwi’ laj Jakob ut laj Jose, rik’in naq toj saajeb’, ut maak’a’jo’ li ch’olaniik neke’raj, ke’raho’ xch’ool xb’aan lix ch’a’ajkilal lix na’eb’; ut jo’kan ajwi’ li wixaqil rik’in lix ya’al li ru ut lix tij, ut eb’ lin kok’al, ink’a’ ke’xq’unob’resi xch’ooleb’ li was re tine’rach’ab’.

20 Ut maak’a’ chik wan, ka’ajwi’ lix wankil li Dios, li ok raj re chixk’eeb’al li sachok sa’ xb’eeneb’, li kiq’unob’resink re lix ch’ooleb’; jo’kan ut, naq ke’ril naq okeb’ re chi sub’e’k sa’ xchamal li palaw ke’xjal xk’a’uxl rik’in li k’a’ru ke’xb’aanu chaq, jo’kan naq kine’rach’ab’.

21 Ut kik’ulman chirix naq kine’rach’ab’, k’ehomaq reetal, kinchap li k’utleb’aal b’e, ut kik’anjelak b’ar wi’ kiwaj. Ut kik’ulman naq kintijok chiru li Qaawa’, ut chirix naq kintijok kiraqe’ li iq’, ut kiraqe’ li kaq-sut-iq’, ut kiwan jun li nimla ch’anaak.

22 Ut kik’ulman naq laa’in, aj Nefi, kinb’eresi li jukub’, jo’kan naq koob’eek wi’chik chiru ha’ sa’ xjayal li yeechi’inb’il ch’och’.

23 Ut kik’ulman naq chirix naq koob’eek chiru ha’ chiru xnumik k’iila kutan koowulak sa’ li yeechi’inb’il ch’och’; ut xookoho chiru li ch’och’, ut kiqayiib’ li qamuheb’aal t’ikr, ut yeechi’inb’il ch’och’ kiqaye re.

24 Ut kik’ulman naq koo’ok chixk’anjelankil li ch’och’, ut koo’ok chixrawb’al li iyaj; relik chi yaal, kiqak’e sa’ ch’och’ chixjunil li qiyaj, li kiqak’am chaq sa’ li ch’och’ Jerusalen. Ut kik’ulman naq ke’ninqan chi numtajenaq, jo’kan naq koo’osob’tesiik chi naab’al.

25 Ut kik’ulman naq kiqataw sa’ xb’een li ch’och’ li yeechi’inb’il, naq yooko chi b’eek chiru li yamyookil ch’och’, naq wankeb’ li jar paay wan chi xul, sa’eb’ li k’iche’, li wakax jo’ ajwi’ li b’ooyx, ut li b’uur ut li kawaay, ut li chib’aat ut li yuk, ut li k’iila paay chi xxulel li k’iche’, li neke’k’anjelak chiruheb’ li winq. Ut kiqataw li k’iila paay chi pek ch’iich’ xsa’, li oor, jo’ ajwi’ li plaat, jo’ ajwi’ li kaqi ch’iich’.