1 Chex’ab’inq ut cherab’i a’in, ex xjunkab’al laj Jakob, li neke’xk’ab’a’in rik’in lix k’ab’a’ laj Israel, ut elenaqex chaq sa’ xha’il laj Juda, malaj sa’ xha’il li kub’iha’, li nekexxaqab’ank aatin rik’in lix k’ab’a’ li Qaawa’, ut nekeye xk’ab’a’ lix Dios laj Israel, a’b’an ink’a’ neke’xxaqab’ aatin sa’ li yaal, chi moko sa’ tiikilal.

2 A’ut neke’xye rib’ naq a’aneb’ aj santil tenamit, a’b’an moko neke’xk’ojob’ ta rib’ sa’ xb’een lix Dios laj Israel, a’an li Qaawa’ reheb’ li Teepal, relik chi yaal, li Qaawa’ reheb’ li Teepal xk’ab’a’.

3 K’ehomaq reetal, kinch’olob’eb’ li junxilaj na’leb’ chalen chaq sa’ xtiklajik; ut ke’el chaq sa’ xtz’uumal we, ut keb’ink’ut. Sa’ junpaat naq kink’ut.

4 Ut kinb’aanu xb’aan naq kinnaw naq laa’at kaw aajolom, ut laa ja’aj chanchan li ich’mul ch’iich’, ut laa pekem li ch’iich’ bronce;

5 Ut chalen chaq sa’ xtiklajik kinch’olob’ank chawu; naq toj maji’ nak’ulman kink’ut chawu; ut keb’ink’ut maare anchal taaye—lin pak’b’il dios xb’aanunk re, ut lin yiib’anb’il jalam-uuch, ut lin pak’b’il jalam-uuch xtaqlank re.

6 Aawilom ut aawab’ihom chixjunil a’in; ut ma ink’a’ taach’olob’ xyaalaleb’? Ut naq kink’ut chawu eb’ li ak’ na’leb’ chalen sa’ li hoonal a’in, a’eb’ li muqmuukil na’leb’, ut laa’at ink’a’ xanaweb’ chaq.

7 Yiib’anb’ileb’ chik anajwan, ut moko chalen ta chaq sa’ xtiklajik, naq toj maji’ ajwi’ nawulak xkutankil naq xawab’i resil, ak ch’olob’anb’ileb’ chawu, maare anchal taaye—K’e reetal, ak xinnaweb’.

8 Relik chi yaal, ut laa’at ink’a’ kawab’i; relik chi yaal, ink’a’ kanaw; relik chi yaal, chalen chaq sa’ li kutan a’an ink’a’ xtehe’ laa xik, xb’aan naq laa’in kinnaw naq laa’at q’axalat aj b’alaq’ naq tatwanq, ut aj q’etol aatin xyehe’ aawe chalen chaq sa’ laa siyajik.

9 A’b’anan, choq’ re xchaab’ilal ink’ab’a’ laa’in tinch’anab’ lin josq’il, ut re xnimankil lin wankilal tatinkanab’, re naq ink’a’ tatwisi chaq.

10 Xb’aan naq k’e reetal, laa’in kinsaqob’resi aawu, kinsik’ aawu sa’ lix k’atleb’aal li tawasiik.

11 Choq’ we laa’in, relik chi yaal, choq’ we ajwi’ laa’in naq tinb’aanu a’in, xb’aan naq ink’a’ tinkanab’ chi tz’ajnimank ink’ab’a’, ut ink’a’ tink’e inloq’alil re jalan chik.

12 Ab’in chiwu, at Jakob, ut at Israel li b’oqb’ilat inb’aan, xb’aan naq laa’inin ajwi’ a’an; laa’in li xb’een, ut laa’in ajwi’ aj ch’otonel.

13 Li wuq’ xk’e ajwi’ xk’ojob’ankil li ruchich’och’, ut lin nim uq’ xchirib’ank re li choxa. Nekeb’inb’oq, ut neke’xaqli sa’ junajil.

14 Chejunilex, ch’utub’omaq eerib’, ut ab’ihomaq; ani sa’ xyanqeb’ xch’olob’ank re li na’leb’ a’in chiruheb’? Li Qaawa’ kixra a’an, relik chi yaal, ut tixtz’aqob’resi ru li raatin li kixch’olob’ rik’in xtz’uumaleb’ re; ut tixb’aanu li nasaho’ wi’ xch’ool sa’ xb’een Babilonia, ut taachalq lix tel sa’ xb’eeneb’ laj kaldeo.

15 Jo’kan ajwi’, chan li Qaawa’, laa’in, li Qaawa’, relik chi yaal, laa’in kin’aatinak; relik chi yaal, kinb’oq a’an chi ch’olob’ank, laa’in kink’am chaq, ut a’an tixk’e chi chaab’ilo’k lix b’ehil.

16 Jilonqex chaq wik’in; ink’a’ kin’aatinak sa’ muqmu; chalen chaq sa’ xtiklajik, chalen chaq sa’ li hoonal naq ch’olob’anb’il chaq, laa’in kin’aatinak, ut li Qaawa’ Dios, ut lix Musiq’, xtaqlank we.

17 Ut jo’ka’in naxye li Qaawa’, laj Tojol aawix, lix Santil Dios laj Israel; laa’in kintaqla chaq a’an, li Qaawa’ laa Dios li natzolok aawe re tatchaab’ilo’q, li naxk’am aab’e sa’ li b’e tento tatxik wi’, a’an xb’aanunk re.

18 Aay, kat-ab’in taxaq chiruheb’ lin taqlahom—chi jo’kan kiwan raj aatuqtuukilal jo’ jun nima’, ut laa tiikilal jo’ raj lix b’oolam li palaw.

19 Ke’wan raj ajwi’ laa wiyajil jo’ raj li samahib’; li ralom laa sa’ jo’ raj lix k’iila pekal; lix k’ab’a’ ink’a’ raj ki’isiik chaq, chi moko raj kisache’ chaq chiwu.

20 Elenqex chaq Babilonia, chex’eeleliq chaq sa’ xyanqeb’ laj Kaldeo, rik’in xyaab’ xkux li b’ichank chexch’olob’anq, yehomaq a’in, choxeyehaq chaq toj sa’ xmaril li ruchich’och’; cheye: Li Qaawa’ xtoj rix laj Jakob lix moos.

21 Ut ink’a’ ke’chaqik re; a’an kixk’ameb’ xb’e chiruheb’ li chaqi ch’och’; kixk’e li ha’ chi elk chaq sa’ li pek choq’ reheb’; kixjor ajwi’ li pek, ut kib’olb’ot chaq li ha’.

22 Ut us ta kixb’aanu chixjunil a’in, ut q’axal nim wi’chik ajwi’ chiru a’an, maajun tuqtuukilal wan, chan li Qaawa’, choq’ reheb’ laj maak.