Xb’een yo’lajenaq

Sa’ xkutankileb’ li najter yuwa’b’ej, a’an li alalb’ej li xb’een yo’lajenaq li kik’uluk re xk’ulub’il li xb’een alalb’ejil (Gen. 43:33) ut chi jo’kan kireechani xjolominkil li junkab’al chirix lix kamik lix yuwa’. Ki’ajman naq li xb’een yo’lajenaq k’ulub’ejaq choq’ re xk’ulb’al li k’anjel a’in (1 Kro. 5:1–2), ut kiru kisach chiru li xb’een alalb’ejil xb’aan li maa’usilal.

Sa’ lix chaq’rab’ laj Moises, li alalb’ej xb’een yo’lajenaq kiwan chi eechaninb’il xb’aan li Dios. Li xb’een alalb’ej kixk’ul xka’ k’ihal li k’a’ru re lix yuwa’ (Deut. 21:17). Chirix xkamik lix yuwa’, a’an li teneb’anb’il sa’ xb’een xk’eeb’al li nak’anjelak re lix na’ ut eb’ li ranab’.

Li xb’een yo’lajenaq reheb’ li xul ke’wan ajwi’ chi eechaninb’il xb’aan li Dios. Eb’ li xul li moko tz’aj ta ke’oksiman choq’ mayej, ut eb’ li tz’aj kiru xtojb’aleb’ rix, malaj xk’ayinkileb’, malaj xkamsinkileb’ (Exo. 13:2, 11–13; 34:19–20; Lev. 27:11–13, 26–27).

Li xb’een alalb’ej a’an reetalil li Jesukristo ut lix ruchich’och’il k’anjel, ut kixjultika reheb’ li tenamit naq taachalq li nimla Mesias (Mois. 5:4–8; 6:63).

Li Jesus a’an li xb’een yo’lajenaq reheb’ li musiq’ejil alal k’ajolb’ej re li qaChoxahil Yuwa’, a’an li junaj yo’lajenaq chiru li Yuwa’b’ej sa’ li tz’ejwalej, ut li xb’een li kiwakli chiru li kamk sa’ li wakliik chi yo’yo (Kol. 1:13–18). Eb’ laj santil paab’anel li tiikeb’ chi paab’ank neke’ok choq’ komon sa’ li Iglees re li Xb’een Yo’lajenaq sa’ li junelik q’e kutan (Tz. ut S. 93:21–22).