Santil ochoch, rochoch li Qaawa’

A’an tz’aqal li rochoch li Qaawa’. Li Qaawa’ junelik naxtaqlaheb’ lix tenamit chixyiib’ankileb’ li santil ochoch, sa’ li neke’xb’aanu wi’ laj santil paab’anel li k’ulub’ejeb’ li loq’laj aatin ut k’ojob’anb’il k’anjel re li evangelio, choq’ reheb’ a’an ut choq’ reheb’ li kamenaq. Li Qaawa’ narula’aniheb’ lix santil ochoch, ut a’aneb’ li jun chi na’ajej q’axal sant na’ux wi’ li loq’onink.

Li loq’laj muheb’aal kixyiib’ laj Moises ut eb’ li ralal xk’ajol laj Israel a’an jun santil ochoch li na’iiqaman. Eb’ laj Israelita ke’roksi sa’ li relikeb’ chaq Egipto.

Li santil ochoch li q’axal yeeb’il resil sa’ li Najter Chaq’rab’ a’an li kab’lanb’il xb’aan laj Salomon sa’ Jerusalen (2 Kro. 2–5). A’an kisache’ 587 chihab’ rub’elaj li Kristo xb’aaneb’ laj Babilonia, ut kik’ojob’aman wi’chik xb’aan laj Sorobabel junaq 70 cient chihab’ chik chirix a’an (Esdras 1–6). Jun raqal li santil ochoch a’in kik’ate’ sa’ 37 chihab’ rub’elaj li Kristo, ut laj Herodes li Xnimal ru moqon kixyiib’ wi’chik. Eb’ laj Romano ke’xsach li santil ochoch sa’ 70 chihab’ chirix li Kristo.

Sa’ lix Hu laj Mormon, eb’ li tiikeb’ xch’ool li neke’taaqenk re li Dios ke’eek’asiik chixyiib’ankileb’ li santil ochoch ut chi loq’onink chi sa’ (2 Ne. 5:16; Mos. 1:18; 3 Ne. 11:1). Xkab’lankil ut roksinkil chi tiik jun li santil ochoch a’an reetalil li tz’aqal Iglees sa’ li jar k’ojlajik re li evangelio, jo’ sa’ li Iglees li k’ojob’anb’il wi’chik sa’ li qakutan laa’o. Li Santil ochoch re Kirtland a’an li xb’een santil ochoch li kikab’laman ut ki’osob’tesiman sa’ li jun k’ojlajik a’in. Chalen chaq sa’ li kutan a’an, wan li santil ochoch li osob’tesinb’ileb’ sa’ k’iila ch’och’ chiru li ruchich’och’.