K’ehok chiru krus

Jo’ka’in naq eb’ laj Romano neke’xkamsiheb’ li ani teneb’anb’il li kamk sa’ xb’een sa’ xkutankil li Ak’ Chaq’rab’, sa’ li kikamsiik wi’ li ani jitb’il rik’in xb’ak’b’al li ruq’ ut li roq, malaj xk’ob’b’al rik’in klawx, chiru jun li krus. A’an nab’aanuman reheb’ li loq’b’il moos ut reheb’ li ani q’axal nim li maak xe’xb’aanu. Rub’elaj xk’eeb’aleb’ chiru krus, wan naq na’ux li raplenk malaj xk’eeb’al xloob’ (Mar. 15:15). Li ani taakamsiiq chi krus namine’ ru chiriiqankil lix krus toj sa’ xna’aj li kamsink (Jwan 19:16–17). Li raq’ nakana rik’ineb’ laj pleet li xe’b’aanunk re li kamsink (Mat. 27:35). Li krus nalape’ sa’ ch’och’ re naq li roq li ani kamsinb’il yal tana’ jun metro sa’ xb’een li ch’och’. Nak’aak’aleek li krus xb’aaneb’ laj pleet toj reetal naq li ani k’eeb’il chiru krus nakam, ut wan naq oxib’ kutan nab’ay xkamik (Jwan 19:31–37).

Li Jesukristo kikamsiik xb’aan naq eb’ li ink’a’ neke’paab’an ke’xjit chi yal tik’ti’ ut ke’xye naq a’an kixwaklesi rib’ chiru laj Cesar (li awa’b’ej) ut naq kixmajewa li Dios naq kixye naq a’an li Ralal li Dios. Kik’ehe’ jun kaqi aq’ej chirix li Jesus (Jwan 19:2) ut jun koroon k’ix sa’ xb’een xjolom, ut ki’eetz’uuk (Mat. 26:67; Mar. 14:65).