Lukas
A’an kitz’iib’ank re li Evangelio re laj Lukas ut li hu Hechos sa’ li Ak’ Chaq’rab’, ut kirochb’eeni laj Pablo sa’ lix taqlanb’il k’anjel. Lix na’ xyuwa’ a’aneb’ aj Griego, ut kik’anjelak jo’ aj b’anonel (Kol. 4:14). Laj Lukas kiwan chi tzolb’il chi chaab’il. Kixye naq kiwan choq’ rochb’een laj Pablo naq kixjunaji rib’ rik’in aran Troas (Hech. 16:10–11). Laj Lukas kiwan ajwi’ rik’in laj Pablo sa’ Filipos lix raqikil sut naq laj Pablo yoo chi xik Jerusalen (Hech. 20:6), ut ke’wan chi ch’utch’u toj reetal naq ke’wulak Roma. Laj Lukas kiwan ajwi’ rik’in laj Pablo naq kiwan xkab’ sut sa’ tz’alam Roma (2 Tim. 4:11). Seraq’inb’il naq kikamsiik sa’ xk’ab’a’ lix paab’aal.
Li Evangelio tz’iib’anb’il xb’aan laj Lukas
Jun esil kixtz’iib’a laj Lukas chirix li Jesukristo ut lix k’anjel sa’ li ruchich’och’. Li hu Hechos (xyehom xb’aanuhomeb’ li Apostol) a’an xtiqb’al ru li evangelio li tz’iib’anb’il xb’aan laj Lukas. Laj Lukas kixkanab’ jun resil lix k’anjel li Jesus li tz’iib’anb’il chi us, ut kixye resil li Jesus jo’ aj Kolol reheb’ laj Judio jo’keb’ ajwi’ laj Gentil. A’an kixtz’iib’a chi naab’al chirix li na’leb’ kixk’ut li Jesus, ut chirix lix b’aanuhom. Ka’ajwi’ sa’ Lukas tz’iib’anb’il resil lix wulajik laj Gabriel rik’in laj Sakarias ut li xMaria (Luk. 1); lix wulajikeb’ laj ilol karneer rik’in li k’uula’al Jesus (Luk. 2:8–18); li Jesus sa’ li santil ochoch naq kab’laju chihab’ xyu’am (Luk. 2:41–52); naq ke’chaq’rab’iik ut ke’taqlaak li setenta (Luk. 10:1–24); naq li Jesus ki’el xkik’el ruuchil tiqob’ (Luk. 22:44); naq li Jesus ki’aatinak rik’in laj elq’ chiru li krus (Luk. 23:39–43); ut naq li Jesus kixk’ux li kar ut xya’al kab’ chirix lix waklijik chi yo’yo (Luk. 24:42–43).
Re rilb’al xtusulal li k’a’ru kik’ulman sa’ xyu’am li Kolonel jo’ ch’olob’anb’il sa’ li Evangelio re laj Lukas, chi’ilmanq Xjunajileb’ li Kaahib’ chi Evangelio sa’ li apendice.