Moises

Jun profeet sa’ li Najter Chaq’rab’ li kixk’ameb’ xb’e laj Israelita chi elk chaq chi moosil sa’ Egipto, ut kixk’e reheb’ jun siir chi chaq’rab’ chirix li paab’aal, chirix li wank sa’ komonil, ut chirix li tzakemq, chi k’utb’esinb’il xb’aan li Dios.

Lix k’anjel laj Moises ink’a’ kiraqe’ rik’in xraqik lix yu’am sa’ li ruchich’och’. Laj Jose Smith kixk’ut naq rochb’een laj Elias, kichal sa’ li Tzuul re Jaltesiik-u ut kixk’e xlaawil li tijonelil sa’ xb’een laj Pedro, laj Santiago, ut laj Jwan (Mat. 17:3–4; Mar. 9:4–9; Luk. 9:30; Tz. ut S. 63:21).

Laj Moises kixk’ut rib’ chiru laj Jose Smith ut laj Oliver Cowdery sa’ 3 Abril 1836, sa’ li santil ochoch sa’ Kirtland, Ohio, ut kixq’axtesi reheb’ xlaawil lix ch’utub’ankil Israel (Tz. ut S. 110:11).

Eb’ li na’leb’ k’utb’esinb’il sa’ roso’jikeb’ li kutan neke’aatinak chi naab’al chirix laj Moises. A’an yeeb’il resil chi kok’ aj xsa’ sa’ lix Hu laj Mormon, ut sa’ li Tzol’leb’ ut Sumwank naqatzol chirix lix k’anjel (Tz. ut S. 84:20–26), ut chirix naq kixk’ul li tijonelil rik’in laj Jetro, lix yuwa’ li rixaqil (Tz. ut S. 84:6).

Li na’leb’ k’utb’esinb’il sa’ roso’jikeb’ li kutan naxk’ut xyaalal lix k’anjel sa’ xyanqeb’ li ralal xk’ajol laj Israel, ut naxch’olob’ naq a’an tz’aqal li kitz’iib’ank re li oob’ chi hu li wankeb’ sa’ xtiklajik li Najter Chaq’rab’ (1 Ne. 5:11; Mois. 1:40–41).

Kikole’ xb’aan lix rab’in laj Farahon, Exo. 2:1–10.
Ki’eelelik toj Madian, Exo. 2:11–22.
Lix anjel li Qaawa’ kixk’ut rib’ chiru sa’ jun toon li k’ix li naxamnak, Exo. 3:1–15.
Kixye naq te’chalq li ninqi rahilal sa’ xb’eeneb’ laj Egipcio, Exo. 7–11.
Li Qaawa’ kixtikib’ li Paswa, Exo. 12:1–30.
Kixk’ameb’ xb’e li ralal xk’ajol laj Israel chixq’axb’al li Kaqi Palaw, Exo. 14:5–31.
Li Qaawa’ kixtaqla li mana sa’ li chaqi ch’och’, Exo. 16.
Kixsak’ li pek sa’ Horeb ut ki’el li ha’, Exo. 17:1–7.
Laj Aaron ut laj Hur ke’xtaqsi li ruq’ re naq laj Josue taanumtaaq sa’ xb’eeneb’ laj Amalek, Exo. 17:8–16.
Laj Jetro kixk’e xna’leb’, Exo. 18:13–26.
Kixkawresiheb’ li tenamit choq’ re lix k’utunik li Qaawa’ sa’ li tzuul Sinai, Exo. 19.
Li Qaawa’ kixk’utb’esi li Lajeeb’ chi Taqlahom chiru, Exo. 20:1–17.
Rochb’een lajeeb’ xkaak’aal li xb’eenil kiril ru li Dios, Exo. 24:9–11.
Kixjoreb’ li tz’alam pek tz’iib’anb’il wi’ li sumwank, ut kixsach li wakax oor, Exo. 32:19–20.
Kiraatina li Dios chi k’utk’u chiru rilob’aal, Exo. 33:9–11.

Lix hu laj Moises

Jun li hu sa’ li Q’ol Nim Xtz’aq, wan wi’ li xb’een wuqub’ ch’ol re Genesis, chi jaltesinb’il ru xb’aan laj Jose Smith chi musiq’anb’il.

Sa’ li ch’ol 1 tz’iib’anb’il resil jun li k’utb’esinb’il matk’ sa’ li kiril wi’ laj Moises li Dios, sa’ li kixk’ut wi’ chiru chixjunil li k’uub’anb’il na’leb’ re li kolb’a-ib’. Sa’eb’ li ch’ol 2–5 wan resil lix yo’ob’tesinkil ut lix t’anik li winq. Sa’eb’ li ch’ol 6–7 wan jun k’utb’esinb’il matk’ chirix laj Enok ut lix k’anjel sa’ li ruchich’och’ Sa’ li ch’ol 8 wan jun k’utb’esinb’il matk’ chirix laj Noe ut li nimla b’uut’iha’.

Ro’ichal lix hu laj Moises

Li oob’ chi hu sa’ xtiklajik li Najter Chaq’rab’ nawb’ileb’ ru jo’ eb’ lix hu laj Moises. Sa’eb’ li perel ch’iich’ bronce kixk’ul laj Nefi rik’in laj Laban, ke’wan lix hu laj Moises (1 Ne. 5:11).