Jaltesinb’il ru xb’aan laj Jose Smith (JJS)

Jun xjaltesinkil ru li Santil Hu li ak wan sa’ li aatinob’aal Ingles (King James Version), li kixtikib’ li Profeet aj Jose Smith sa’ Junio 1830. A’an kitaqlaak xb’aan li Dios chixb’aanunkil li jaltesink-u a’in, ut kixk’oxla jo’ jun raqal lix b’oqb’al jo’ profeet.

Us ta laj Jose kixchoy xk’ihal lix jaltesinkil ru sa’ Julio 1833, naq kikam sa’ 1844 toj yoo chixjalb’al naq yoo chi kawresimank li hu re taapuktesimanq. Us ta kixpuktesi junjunq raqal re lix jaltesinkil ru naq toj yo’yo, kiru raj naq wan chik li kixjal raj wi ta kikana chi yo’yo toj reetal naq kipuktesiman chixjunil li hu. Li Jalb’il ru Iglees re li Jesukristo reheb’ laj Santil Paab’anel sa’ Roso’jik li Kutan ke’xpuktesi xb’een wa li Santil Hu chi jaltesinb’il ru xb’aan laj Jose Smith sa’ 1867. Chalen chaq sa’ li kutan a’an xe’xpuktesi wi’chik junjunq sut.

Wan naab’al li k’a’aq re ru kixtzol li profeet naq yoo chixjaltesinkil ru li aatin. Junjunq raqal re li Tzol’leb’ ut Sumwank ke’k’ule’ xb’aan lix k’anjel sa’ xjaltesinkil ru li aatin (jo’ Tz. ut S. 76; 77; 91; ut 132). Jo’kan ajwi’, li Qaawa’ kixk’e junjunq li na’leb’ re laj Jose chirix xjaltesinkil ru li aatin, li ke’kana chi tz’iib’anb’il sa’ li Tzol’leb’ ut Sumwank (Tz. ut S. 37:1; 45:60–61; 76:15–18; 90:13; 91; 94:10; 104:58; 124:89). Lix hu laj Moises ut Jose Smith—Mateo, li wankeb’ anajwan sa’ li Q’ol Nim Xtz’aq, ke’isiman chaq tz’aqal sa’ li Santil Hu li jaltesinb’il ru xb’aan laj Jose Smith.

Rik’in li jaltesinb’il ru xb’aan laj Jose Smith, k’ojob’anb’il wi’chik junjunq reheb’ li k’a’aq re ru saqen ru ut loq’ li sachenaq chaq sa’ li Santil Hu (1 Ne. 13). Us ta maawa’ a’in li Santil Hu li xaqab’anb’il re taa’oksimanq sa’ li Iglees, naxk’e b’ayaq li qana’leb’, ut k’a’jo’ naq nak’anjelak re xtawb’al ru li Santil Hu. Wan ajwi’ choq’ jun xk’utb’al xyaalal lix choxahil b’oqb’al ut k’anjel li Profeet aj Jose Smith.