Santil Hu

Lix ch’utub’anb’il tz’iib’ahomeb’ laj Hebreo ut laj Kristiano, wan wi’ naab’al lix k’utb’esihom li Dios. Li aatin biblia naraj naxye “eb’ li hu.” Li Santil Hu a’an xtz’iib’ahom naab’al li profeet ut li musiq’anb’il aj tz’iib’anel li ke’k’anjelak chi eek’asinb’il xb’aan li Santil Musiq’ej (2 Pe. 1:21).

Sa’ li Santil Hu reheb’ laj Kristiano wan wiib’ jachal, nawb’ileb’ ru jo’ li Najter ut Ak’ Chaq’rab’. Sa’ li Najter Chaq’rab’ wankeb’ li loq’laj hu li oksinb’il xb’aaneb’ laj Judio sa’ Filistea chiru lix k’anjel li Qaawa’ sa’ li ruchich’och’. Sa’ li Ak’ Chaq’rab’ wan li k’a’ru tz’iib’anb’il sa’ xkutankileb’ li apostol, ut juntaq’eet xsantilal ut xwankilal rik’ineb’ li loq’laj hu reheb’ laj Judio. Eb’ li hu sa’ li Najter Chaq’rab’ ke’tz’iib’aman sa’ lix huhil li tenamit chiru k’iila cient chihab’, ut ka’ch’in chik ma chixjunil a’an tz’iib’anb’il sa’ Hebreo, a’b’an eb’ li hu sa’ li Ak’ Chaq’rab’ a’an yal xtz’iib’ahom jun tasal chi tenamit ut ke’tz’iib’aman lix k’ihaleb’ sa’ Griego.

Li aatin chaq’rab’ sa’ li Najter Chaq’rab’ sa’ jalaneb’ chik li aatinob’aal naraj naxye “sumwank.” Li Najter Chaq’rab’ a’an li chaq’rab’ li kik’eeman re laj Moises naq eb’ laj Israel ke’xtz’eqtaana lix tz’aqalil li evangelio li kik’ule’ xb’aaneb’ lix tenamit li Dios chalen chaq xtiklajik li wank sa’ li ruchich’och’. Li Ak’ Chaq’rab’ a’an li evangelio jo’ k’utb’il xb’aan li Jesukristo.

Sa’ li Santil Hu sa’ Hebreo (li Najter Chaq’rab’), ke’jache’ ru li hu sa’ oxib’ jachal: li Chaq’rab’, eb’ li Profeet, ut li Tz’iib’ahom. Li Santil Hu oksinb’il xb’aaneb’ laj Kristiano naxjacheb’ ru li hu jo’ chanru li k’a’ru tz’iib’anb’il, jo’ resil li tenamit, li chaq’al ru aatin, ut li profeetil aatin.

Eb’ li hu sa’ li Ak’ Chaq’rab’ wankeb’ chi tusub’anb’il chi jo’ka’in: Eb’ li kaahib’ chi Evangelio ut Hechos (xyehom xb’aanuhomeb’ li apostol); eb’ li hu re laj Pablo; eb’ li hu ke’xtaqla laj Santiago, laj Pedro, laj Jwan ut laj Judas; ut li Apokalipsis, a’an li kik’utb’esiman chiru laj Jwan.

Lix Iglees li Jesukristo reheb’ laj Santil Paab’anel sa’ Roso’jikeb’ li kutan naxk’ulub’a ut naroxloq’i li Santil Hu, ut naxch’olob’ naq li Qaawa’ toj yoo chixk’eeb’al li k’utb’esinb’il na’leb’ rik’in xtz’uumaleb’ re lix profeet sa’ roso’jikeb’ li kutan, li xaqab’anb’il wi’ xwankil ut k’utb’il xyaalalil li resil lix b’aanuhom li Dios rik’ineb’ li winq li natawman sa’ li Santil Hu.