Li nak’ame’ wi’ li winq sa’ usilal rik’in li Dios.
Jo’ na’oksiman sa’eb’ li loq’laj hu, xtojb’al rix li maak naraj naxye xk’ulb’al rahilal sa’ xk’ab’a’ junaq maak li xb’aanuman, ut chi jo’kan risinkil chaq sa’ xb’een laj maak, wi jalb’il xk’a’uxl, li ki’ux raj xb’aan li maak, re taaruuq chixk’amb’al wi’chik rib’ sa’ usilal rik’in li Dios. Ka’ajwi’ li Jesukristo kiru chixtojb’al rix chi tz’aqal chixjunileb’ li winq. Kiru a’an chixb’aanunkil, xb’aan naq a’an kisik’e’ ru ut kik’ojob’aak chi rub’elaj sa’ li Nimla Ch’utam rub’elaj naq kik’ojob’aman li ruchich’och’ (Eter 3:14; Mois. 4:1–2; Abr. 3:27), xb’aan naq a’an tz’aqal Ralal li Dios, ut xb’aan naq a’an kiwan chi maak’a’ xmaak sa’ lix yu’am. Re xtojb’al rix li maak, a’an kixk’ul rahilal choq’ re lix maakeb’ chixjunil li winq, kihoyman xkik’el, ut kikam ut kiwakli chi yo’yo chiru chaq li kamk (Isa. 53:3–12; Luk. 22:44; Mos. 3:5–11; Alma 7:10–13; Tz. ut S. 19:16–19). Sa’ xk’ab’a’ lix tojb’al rix li maak, chixjunileb’ te’wakliiq chaq sa’ xyanqeb’ li kamenaq rik’in xjunxaqalileb’ li ink’a’ chik taakamq (1 Kor. 15:22). Lix tojb’al rix li maak jo’kan ajwi’ naxk’uub’ li b’e re taaruuq taakuymanq li qamaak ut toowanq chi junelik rik’in li Dios. A’ut li ani ak tz’aqal xchihab’ re naru chi teneb’amank ut ak xk’ul li chaq’rab’, ka’ajwi’ naru chixk’ulb’al li osob’tesink a’in wi naxpaab’ li Jesukristo, naxjal xk’a’uxl chirix lix maak, naxk’ul li k’ojob’anb’il k’anjel re li kolb’a-ib’, ut naxpaab’eb’ lix taqlahom li Dios. Eb’ li ink’a’ neke’wulak sa’ xchihab’il li teneb’aak ut eb’ li moko k’eeb’il ta li chaq’rab’ reheb’ ak tojb’ileb’ rix xb’aan lix tojb’al rix li maak (Mos. 15:24–25; Moro. 8:22). Sa’eb’ li loq’laj hu, k’utb’il chi ch’olch’o ru naq wi ta li Kristo ink’a’ kixtoj rix li qamaak, maajun chaq’rab’, k’ojob’anb’il k’anjel, malaj mayej kiru raj chixk’eeb’al li elajinb’il xb’aan li chaq’rab’, ut li winq maajun wa raj taaruuq chi ok wi’chik rik’in li Dios (2 Ne. 2; 9).