Hu laj Mormon (lix)

Jun reheb’ li kaahib’ raqal chi loq’laj hu k’ulub’anb’il xb’aan Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. A’an jun li esil tz’iib’anb’il najter sa’ li nimla ch’och’ America, chi k’osb’il ru xb’aan jun li najter profeet aj Mormon xk’ab’a’. Tz’iib’anb’il chixch’olob’ankil xyaalal naq li Jesus a’an li Kristo. Chirix li tz’iib’anb’il esil a’in, li Profeet aj Jose Smith, li kijaltesin ru rik’in xmaatan ut xwankil li Dios, kixye, “Keb’inye re li komon naq lix Hu laj Mormon a’an li hu q’axal ch’olch’o ru wan sa’ li ruchich’och’, ut a’an li taqenaqil pek li xaqab’anb’il wi’ li qapaab’aal, ut jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan chi sa’, chiru k’a’ruhaq chik chi hu” (chi’ilmanq “Xtikib’ankil” sa’ lix Hu laj Mormon).

Lix Hu laj Mormon a’an resil li paab’aal, tz’iib’anb’il chirix oxib’ teep chi tenamit li ke’el chaq chi junpak’al li palaw ut ke’chal sa’ li nimla ch’och’ America. Eb’ li teep a’in k’amb’ileb’ xb’e xb’aaneb’ li profeet li ke’xtz’iib’a resil lix paab’aaleb’ ut lix tenamiteb’ chiruheb’ perel ch’iich’. Sa’ lix Hu laj Mormon tz’iib’anb’il resil lix k’ulunik li Jesukristo sa’ li nimla ch’och’ America chirix lix waklijik chi yo’yo. Kiwan li tuqtuukilal chiru wiib’ cient chihab’ chirix lix k’ulunik li Kristo.

Laj Moroni, lix raqikileb’ li profeet aj Nefita aj tz’iib’ahom esil, kixtz’ap chaq li tz’iib’anb’il esil chi k’osb’il ru reheb’ li tenamit a’in ut kixmuq naq 421 tana’ chihab’ xyo’lajik li Kristo. Sa’ 1823, laj Moroni chi ak waklijenaq chi yo’yo kirula’ani laj Jose Smith ut moqon kixq’axtesi re li najter loq’laj tz’iib’anb’il esil a’in re taajaltesimanq ru ut taak’ame’q chi kutankil chiru li ruchich’och’ jo’ jun chik ch’olob’anb’il esil chirix li Jesukristo.