Xb’alb’a

Wiib’ paay chan ru naq li na’leb’ k’utb’esinb’il sa’ roso’jikeb’ li kutan na’aatinak chirix li xb’alb’a. Xb’een, a’an li na’ajej sa’ li ruchich’och’ reheb’ li musiq’ej choq’ reheb’ li ink’a’ ke’paab’an sa’ li yu’am sa’ li ruchich’och’. Naq yeeb’il chi jo’kan, li xb’alb’a taawanq roso’jik. Eb’ li musiq’ej li wankeb’ aran te’tzole’q rik’in li evangelio, ut sa’ junaq kutan chirix naq xe’xjal xk’a’uxl te’wakliiq chi yo’yo sa’ li jun tasal chi loq’alil li xk’ulub’eb’. Eb’ li ink’a’ neke’xjal xk’a’uxl, a’ut maawa’eb’ alalb’ej re li sachk, te’kanaaq sa’ xb’alb’a chiru li Jun Mil Chihab’. Chirix li jun mil chihab’ a’in re rahilal, te’wakliiq chi yo’yo sa’ jun teleestil loq’alil (Tz. ut S. 76:81–86; 88:100–101).

Xkab’, a’an li na’ajej te’wanq chi junelik eb’ li moko tojb’ileb’ ta rix rik’in lix tojb’al rix li maak xb’aan li Jesukristo. Naq yeeb’il chi jo’kan, li xb’alb’a maak’a’aq roso’jik. A’an choq’ reheb’ li ani “te’kanaaq chi toj tz’ajeb’ ru” (Tz. ut S. 88:35, 102). A’in li na’ajej b’ar wi’ laj Satanas, eb’ lix anjel, ut eb’ li alalb’ej re li sachk—eb’ li ke’tz’eqtaanank re li K’ajolb’ej chirix naq li Yuwa’b’ej kixk’utb’esi—te’wanq chi junelik (Tz. ut S. 76:43–46).

Wan naq sa’eb’ li loq’laj hu li xb’alb’a yeeb’il resil jo’ li najtil aak’ab’.