Loq’laj muheb’aal

Jun rochoch li Qaawa’, xjolomil li loq’onink reheb’ laj Israel naq yookeb’ chi elk chaq Egipto. Li loq’laj muheb’aal a’an jun li iiqanb’il santil ochoch, ut kiru xkub’sinkil ut xyiib’ankil wi’chik. Eb’ li ralal xk’ajol laj Israel ke’roksi li loq’laj muheb’aal toj reetal naq ke’xkab’la li santil ochoch re laj Salomon (Tz. ut S. 124:38).

Li Dios kixk’utb’esi re laj Moises li k’utb’il eetalil choq’ re li loq’laj muheb’aal (Exo. 26–27), ut eb’ li ralal xk’ajol laj Israel ke’xyiib’ jo’ chanru li k’utb’il eetalil a’an (Exo. 35–40). Naq kiyaalo’ li loq’laj muheb’aal, jun li choql kixtz’ap xb’een li muheb’aal, ut lix loq’al li Qaawa’ kixnujob’resi li loq’laj muheb’aal (Exo. 40:33–34). Li choql a’an reetalil lix wanjik li Dios. Chiru q’ojyin, chanchan jun li xam. Naq nakana li choql sa’ xb’een li muheb’aal, eb’ li ralal xk’ajol laj Israel ke’kana aran. Naq na’el chaq li choql, eb’ a’an neke’xik chirix (Exo. 40:36–38; Num. 9:17–18). Eb’ li ralal xk’ajol laj Israel ke’xk’am li loq’laj muheb’aal rik’ineb’ chiru lix b’eenikeb’ sa’ li chaqi ch’och’ ut naq yookeb’ chi ok sa’ li ch’och’ Kanahan. Chirix naq ke’ok, kiwan li loq’laj muheb’aal sa’ Silo, li na’ajej kixsik’ chaq ru li Qaawa’ (Jos. 18:1). Chirix naq eb’ li ralal xk’ajol laj Israel ke’xyiib’ li santil ochoch re laj Salomon, kisach chi junajwa resil li loq’laj muheb’aal.

Li Qaawa’ ut laj Isaias ke’roksi li loq’laj muheb’aal choq’ reetalil eb’ li tenamit re Sion ut Jerusalen sa’ xkutankil li xkab’ xk’ulunik li Qaawa’ (Isa. 33:20; Mois. 7:62).