Xkawilal qach’ool chirix k’a’ruhaq malaj anihaq. Jo’ na’oksiman sa’eb’ li loq’laj hu, li paab’aal naraj naxye naq kaw qach’ool rik’in ut naqakanab’ qib’ chiru li Jesukristo, ut rik’in a’an noko’ab’in chiru. Li paab’aal tento naq taawanq rik’in li Jesukristo re naq taaruuq chixk’amb’al anihaq sa’ li kolb’a-ib’. Eb’ laj santil paab’anel sa’ roso’jikeb’ li kutan wankeb’ ajwi’ xpaab’aal chirix li Dios Yuwa’b’ej, li Santil Musiq’ej, lix wankil li tijonelil, ut jalaneb’ chik li xninqal ru na’leb’ sa’ li evangelio li k’ojob’anb’il wi’chik.
Rik’in li paab’aal, na’ux xyo’oninkil li k’a’ru moko ilb’il ta, a’ut yaal (Heb. 11:1; Alma 32:21; Eter 12:6). Nalochman li paab’aal rik’in rab’inkil li evangelio jo’ k’utb’il xb’aaneb’ laj k’amol aatin li taqlanb’ileb’ xb’aan li Dios ut k’eeb’ileb’ xwankil (Rom. 10:14–17). Ink’a’ nachal li paab’aal xb’aan rilb’al li sachb’a-ch’oolej; li kawil paab’aal nakawob’resiman b’an rik’in ab’ink chiru lix evangelio li Jesukristo. Sa’ jalan chik li aatin, nachal li paab’aal xb’aan li tiikilal (Alma 32:40–43; Eter 12:4, 6, 12; Tz. ut S. 63:9–12).
Li tz’aqal paab’aal naxk’am chaq li sachb’a-ch’oolej, li matk’, li k’irtesink, ut chixjunil li maatan naxk’e li Dios reheb’ lix santil paab’anel. Rik’in li paab’aal naru junaq chixk’ulb’al li risinkil lix maak, ut moqon, chi wank chiru li rilob’aal li Dios. Xmaak’a’il li paab’aal naxk’am chaq xsachik li yo’onink, li nachal xb’aan li maa’usilal (Moro. 10:22).