Saqen, lix saqen li Kristo

Choxahil kutan malaj wankilal li na’el chaq rik’in li Dios sa’ xk’ab’a’ li Kristo ut naxk’e xyu’am ut xsaqenkil chixjunil li k’a’aq re ru. A’an li chaq’rab’ li b’eresinb’il wi’ chixjunil li k’a’aq re ru sa’ choxa ut sa’ ruchich’och’ (Tz. ut S. 88:6–13). Jo’kan ajwi’ naxtenq’aheb’ li winq chixtawb’al ru li yaal re li evangelio, ut naxtenq’aheb’ chi ok sa’ xb’ehil li evangelio li nak’amok sa’ li kolb’a-ib’ (Jwan 3:19–21; 12:46; Alma 26:15; 32:35; Tz. ut S. 93:28–29, 31–32, 40, 42).

Lix saqen li Kristo moko juntaq’eet ta rik’in li Santil Musiq’ej. Lix saqen li Kristo maawa’ junaq winq. A’an jun li wankilal li nachal chaq rik’in li Dios ut naxkawresi junaq chixk’ulb’al li Santil Musiq’ej. A’an jun wankilal choq’ re li chaab’ilal sa’ lix yu’ameb’ chixjunil li tenamit (Jwan 1:9; Tz. ut S. 84:46–47).

Nak’utb’esiman lix saqen li Kristo sa’ li reek’ob’aal xch’ool li junjunq, li naxtenq’a chixnawb’al b’ar wan li us ut li ink’a’ us (Moro. 7:16). Naq eb’ li winq ut ixq neke’ok chirab’inkil li evangelio, naniman li reek’ob’aal xch’ooleb’ (Moro. 7:12–19). Eb’ li neke’ab’ink chiru lix saqen li Kristo neke’k’ame’ xb’e rik’in lix evangelio li Jesukristo (Tz. ut S. 84:46–48).