Markos
Sa’ li Ak’ Chaq’rab’, laj Jwan Markos a’an xyum li xMaria, li kiwan Jerusalen (Hech. 12:12); maare ralal li ranab’ laj Bernabe (Kol. 4:10). A’an xko’o chirix laj Pablo ut laj Bernabe chalen chaq Jerusalen sa’ li xb’een taqlanb’il k’anjel reheb’ ut kixkanab’eb’ sa’ Perge (Hech. 12:25; 13:5, 13). Moqon kirochb’eeni laj Bernabe toj Chipre (Hech. 15:37–39). Kiwan rochb’een laj Pablo sa’ Roma (Kol. 4:10; Filem. 1:24), ut kiwan rochb’een laj Pedro sa’ Babilonia (nak’oxlaman naq sa’ Roma) (1 Pe. 5:13). Chirix a’an, kiwan rochb’een laj Timoteo aran Efeso (2 Tim. 4:11).
Li Evangelio re laj Markos
Li xkab’ hu sa’ li Ak’ Chaq’rab’. Naru naq kitz’iib’aman li evangelio re laj Markos chi b’eresinb’il xb’aan laj Pedro. A’an kiraj xk’utb’al xyaalal li Qaawa’ jo’ li Ralal li Dios li kiwan ut kik’anjelak sa’ xyanqeb’ li winq. Laj Markos naxch’olob’ xyaalal, rik’in anchalil ch’oolej ut tuulanil, chanru naq ki’ile’ li Jesus xb’aaneb’ li ke’ilok re. Seraq’inb’il naq chirix lix kamik laj Pedro, laj Markos kiwulak Egipto, kixk’uub’ li Iglees sa’ Alejandria, ut kikamsiik sa’ xk’ab’a’ xpaab’aal.
Re rilb’al xtusulal li k’a’ru kik’ulman sa’ xyu’am li Kolonel jo’ ch’olob’anb’il sa’ li Evangelio re laj Markos, chi’ilmanq Xjunajileb’ li Kaahib’ chi Evangelio sa’ li apendice.